ONLINE LEH OFFLINE KHAWVEL
-Chhungpuia Renthlei
(Written on : Dated
12/4/2018)
I FB ngai em? Ngai lo . Anih WhatsApp?
Ngai chuang lo.Twitter tih vel pawh maw? Ka hriat vawikhatna. I va’n
changkang lo em em! A bikin, thalaiten changkang kan tehna
bulpui pakhat chu Information Technology (IT) hi a ni a, changkanglo kan tehna
ber pawh IT tho hi a ni leh bawk a. Tunlaiah chuan changkang nih
aiin changkanglo nih hi awl tak a ni. Changkan duh si, tehnnology hmasawnna kalh
zawnga awm tum talh chu hnar hup chunga thawk tum ang hlauh a ni ta.
Online khawvel chu Mobile leh computer
hmanga internet leh social media WhatsApp, Facebook leh chi dang danga kan hun
hman hi a ni a, a bak zawng chu Online khawvel a ni mai
. Online in social media ah group leh thian kan
siam a, pawn chhuak kher lo va kan in
kawm te hi engemaw kawng zawnga ngaihtuah phei chuan a awlsam mai bakah a him zawk phian. Kan
society a inher danglam zela, Mi
pangngai chin chu Online khawvelah kan cheng ta fur mai .Offline a thenrual
inkawmna hun kan nei meuh ta lo.
Hmasawnna lawmawm tak
anih laiin, Online leh Offline
hring nun balance thiam erawh hi a har hle. Kum1990 ah khawvelah mobile hman lar tan
a ni a,kum 1996 ah India ah mobile service kan nei ve.Kum1998 ah India
hmarchhakah kan hmang tan ve leh a, kum 2004 ah mizoramah (BSNL prepaid
leh Post paid) mobile kan hmang tan. Khang hun lai khan mobile neilo ten a nei
te kawm har an ti. Kum 2018 a rawn inher meuh chuan mobile nei ten
a neilo te kawm har kan ti thung ta.
Online khawvelah thu tak
aia thu lawilo mai mai kan tuipui zawk te, sawiho aia inhnial peih zawk t Pathian
thu eng emaw lai bik chauh tuipui ta em em mai te leh hmingthatna ûm a
kohhran rawngbawl thin te thlengin Whatsapp group khatah Online khawvel hian
min funkhawm chu a ni ber tawh si. Ngaihdan tum tlang deuh han sawi dek dek la, a
har asin, a theih loh, a ngai hi a tha mai ti pawl an awm nghal ang.Thu nawi te
te han sawi la, patling pui si, ka rin aiin i ho an ti leh tho si ang.
Hetih lai hian Rosepar
mawi tak hian hling a nei ,Khanghu pawhin hling a nei.Chawhmeh atan chuan
khanghu ka thlang zawk mi thenkhatin rawn ti se an like leh sup
sup thung si ang. Mi dik leh fel,
zahmawh fiamthu pawh sawi ngailo, WhatsApp groupa a thu post reng
reng group member ten an pawmpui leh an star mark thlap thin ang mihring
hi a awm theih loh a ni ber e. Kan awmna awm tak groupa kan awm a, kan hriat
tur kan chhiar a, a hun taka kan sawi tur awm tak kan sawi ve mai
te hian mi pangngai chu kan ni mai awm e. Mi ril leh thiam, a ruka kan mi ngaihsan
leh ka entawn, tuifinriata lawng khalhtu ang maia thu leh hla lama daizau
te nena WhatsApp group khata awm ho ngat
phei te hi chu a nuam a, a hlawk thlak duh ngei mai.
Zofa te zinga Radio
mechanic hmasa Dr. Rv Thangluaia khan kum 1954 khan Aizawlah Radio
Repairing dawr a hawng a. Kha tih lai khan mizoramah Radio 3 chauh a awm a, an
ti chhe zen zen si lo, a thiam hle nachungin a hna a nei lo hle.Tunlaiah erawh
eng line ah pawh kal ila, kan thiam phawt chuan ei zawnna tling a ni thei zel
ta.Keini erawh chuan tangkai taka kan thiamna te kan hman phawt
chuan hna kan ngah phah ang a, hma kan sawn phah viau
ang.
Online khawvelah hian
Electric bill, tui bill, Mobile recharge, Online shopping, Online air ticket
booking mai bakah zirlai te tan Online fee pekna, exam routine &
result enna leh schoolarship dilna leh thil tangkai tam tak online
khawvelah kan ti thei ta.Hetih laia kan thalai zingah ram leh hnam
hmasawnna chu sawi loh mimal leh chhungkaw hmasawnna pawh ngaihtuah
peih lo, Sports, Music ,Motor leh TV serial chanchin thar ber ber tlaivar
thulh thak khawpa zan khua a sawi tur hre si kan pung tual tual si. Mahni
zirlai leh thil dang an hriat tur awm ngawih ngawih an hrelo leh tlat si
te hi finna at thlak tak leh changkan dan changkang lo tak a ni. Thalai changkan
dan changkang lo inpelh suau suau na ramah chuan future hi a
bright viau lem lo.
Online khawvela thil tha
zawk duh vanga sorkar leh kohhran sawiselna dawhthei taka dawnsawn mai
tur anih laia mitdel serh khawihsak ang maia vir vut leh phu deuh
zuk kan ching te, mi chanchin chhe lai hmuh fuh apianga
rangkachak hmu ang maia lawm tlat zawk te leh bandh awm apianga a
nei lian ber ta khawihsak ang mai a hlima phûr sûrh mai te hian kan
mizia a tilang chiang hle.
Online leh Offline
Khawvel hi kut dinglam leh vei lam ang mai a inbuk tawk taka hman thiam
hi hlawhtlinna leh zahawmna a ni. Offline a chinfel chi tam tak a
awm a, Online a awlsam zawka chinfel theih a awm bawk. Kan tui zawng leh lam ngawt
thlir lo va, tun leh nakina kan mamawh leh tangkaipui tura kan
thiamna te kan hman a hun tak zet. Online
hmasawnna in a chil thluk ni lova, a phurh kal kan ni theuh theih nan mimal,
chhungkua, kohhran leh NGO ten kalphung mumal tak kan siam a tul ta
a ni e.
No comments:
Post a Comment