WELCOME TO CHHUNGPUIA RENTHLEI BLOG

FACEBOOK  CHEAT SHEET                           

Er. Chhungpuia Renthlei

Pa valai thingtlang kirkhawr a awm,  kum khata Aizawl vawi hnih lai zin thei ngat khawpa changkang  chin ten FACE TOWEL   hman nachang kan  han hriat meuh chuan mizo thalai tam zawk te chu Facebook khawvelah kan cheng der tawh mai ka ti ! Ni e, FACE tih lam hawia changkanna a in ang lo a  ni e.

 Facebook awmzia ber chu internet ( cyber) khawvela awlsam taka kan inbiaktawnna, thian kawmna, thlalak inthawn tawnna, group discussion  leh a huhova Games khelhna  social network websites  pawimawh tak pakhat a ni. Facebook hi  Mark Zuckerberg chuan Harvard University-a a zirpui - Eduardo Saverin, Andrew McCollum, Dustin Moskovitz leh Chris Hughes te puihnain Facebook hi February 2004 khan a siam a. A tirah chuan Harvard zirlaite hman theih tur chauha siam a ni naa,  an huang an zauh zel a, tunah chuan khawvela social networking service hman nasat ber a lo nit a hial mai. Khawvel hmun hrang hranga awm, kum 13 chin chunglam tan chuan a hman theih vek tawh a ni. September 2012 thleng khan Facebook hmangtu hi billion 1 chuang kan tling der mai, heng zinga 8.7% te hi ‘fake profile’ an ni a. May 2011 thleng khan Facebook hmangtu zinga million 7.5 te chu kum 13 aia naupang an ni a, kum 10 hnuailam pawh million 5 lai an awm bawk. 2012 chhung khan Facebook sum lakluh hi $5.1 billion lai a tling phak a, a vawikhatna atan Fortune 500 list ah langin, May 2013 ah khan 462 na a ni.

            Tunlaia kan hman lai mek Mobile phone changkang tak tak Smart Phone kan tih  mai ho hi  kan hre theuh awm e. Khawvela Smart phone hmasa ber siamtu chu BellSouth Cellular company a ni. kum 1993 khan  Florida Wireless World Conference ah tlangzarh a ni.  A hming ah Simon tiin an vuah a,  a design tu hi IBM ( International bussiness Machine )  ani.  kum 2013 kan han chuan kai meuh chuan Remote control hum chunga Television  thlir reng thin kan thalai te chuan IT lamah chapter thar kaiin  Mouse hum chungin  computer leh Mobile  hmangin  khawvel tukverh ah kan dak chhuak ta fer fur mai le.  Face TOWEL aia FACEBOOK  ngai pawimawh kan pung thur thur a ni ber e. Internet hmangtu tam zawk ten social networking atana kan hman tangkai em em,  a bik takin thalaite  buaipui leh thenrual kawm nan bera kan hman Facebook hi  keini mizo thalai zingah phei chuan a lar hle tawh mai. facebook tellova  cyber laichhuat chhir peih kan awm ta meuh lo a nih hi.

Facebook hian lawm a hlawh em avang leh rualkawm nana a tangkai em avang hian internet khawvela pawikhawihtu pawl hrang hrang ( Cyber Criminals ) te pawhin suahsual rawngbawl nan an hmang tangkai ve hle tih erawh kan hriat a tul hle mai. Facebook hmangtu te tan tawkdarh tha tak tak siamin nitin mai thang an kam a ni ber mai si a, chung zinga tlem te chauh han tarlang ila a tha awm e.

1. CHAIN LETTERS: Thuziak chikhat, donation thil emaw, lucky ticket leh message  chhan ngei ngei ngai chi engemaw a rawn lang ang. Heng ho hi a lem a ni. Website dangah a hruai peng ang che anga, User name leh password te a rawn dil ang che. I type luh rual rualin cyber criminal hnenah i himna chahbi i pe tihna a ni. An duh hun hunah i thlalak leh information an ru chhuak anga, I hriat loh hlanin khawiah emaw thilsual tihnan an hmang tawh mai dawn che a ni.

2. CASH GRABS : Facebook  kaltlanga dawt hmanga pawisa indilna a ni ber mai. Nangma friend list- a mi thenkhat hming leh thlalak hawhin cyber misual ten pawisa thawn turin an rawn dil thei che tih hriatreng a tha. Cash Grabs zinga lar thenkhat chu I thian hnai vai tak hming hawhin wallet/purses tibo anga insawiin  pawisa thawn turin an rawn dil ang che. Hetihlai hian nangma friend list ami tumahin pawisa an dil tak tak lo ang che. Hetiang i lo tawng anih chuan a diltu kha phone hmasak ngei ngei tur a ni.

3. HIDDEN CHARGES : Facebook hmanga  Games leh information eng engemaw lakhawmtute hnenah  phone number emaw e-mail account leh password  an dil thin. Tichuan, subscription bill  leh  cell phone bill an charge ta thin a ni. Hei hi  a tak tak ang chiah ni mahse, misual ho tih a ni tih hriat reng tur.

4. PHISHING REQUESTS : Thlalak leh engemaw tawkdarh hmanga facebook thlunzawm tura milem emaw message te hi phishing an ti. Internet website, Email  leh Mobile ah emaw  i thlalak  nangma  dah ni miah si lovin a lo awm ringawt ang. I click veleh dan pangngai ang thlapin nangma facebook account login turin  user id leh password a rawn dil ang che. Mahse heng hi inbumna vek anih avangin i facebook i hawn rual rualin nangma user id leh password kha misual hnenah i hrilh tihna a ni. An kutah engkim a awm a, duh hun hunah a rukin an hawng thei tihna ani ber mai.

5. HIDDEN URLS : Hei hi a ruka internet website danga luhna  shortcut a ni ber mai. Facebook ah emaw, twitter leh email ah te Uniform Resource Locator (URL) a rawn inziak ang, hemi i click rual rual hian website dangah a hruaikawi daih mai ang che. A chang chuan  click veleh virus chikhat  computer ah a install ang.

Hei bakah hian tunlaia Facebook hmangtute  cyber criminal hoten min beihna awlsam ber chu friend list atang hian a ni bawk. Facebook hmangtu thenkhatte chuan friends list kan ngah hlawm hle mai. Kan mizo public figure thenkhat phei chuan za chuang fe mai an nei del dul mai a, hei hi cyber criminal tan chuan suahsual rawngbawlna kawngka tha tak a ni thei tih kan hriat a tha. Cyber khawvel ah mai nilo, a tak taka kan hmelhriat thate chauh friend list-a dah hi a fuh ber fo. A tak takah pawh min kawm ngai mang lo leh keini pawhin kan kawm nel em em loh, Facebook anih vanga friend list-a a tlar chiam hian tangkaina a nei tlem hle tih kan hriat a tul hle mai. Friend  atana Facebook suggest leh request nazawng friend list ah add (telh) kher loh tur. Uluk taka ngaihtuah hnuah  friend list a telh thin tur a ni.

Facebook ah hian a tlangpuiin kan thlalak tunlai leh kan hmel lan thatna kan hmang deuh ber thin. Hetihlai hian  thlalak a lan thatna  neih loh chu sawi loh, hmel hrim hrim  kohhran huat zawng tak mai U Tpa te chuan thlalak aia  helmet leh tarmit an dah mai lai hian mi thenkhat chuan hmelchhiat  vang em em ni chuang lovin fiamthu thawhnana hmangin  midang thlalak hmangin Facebook wallpaper kan siam ve mek bawk. A thenin mahni hmel tilang lem lovin rosepar, ramsa lem, milem maksak deuh e.t.c kan hmang deuh nuaih bawk nen, Facebook a thlalak kan hman hi a tak leh a lem thliar hran a har hle mai. Heivang hian kan hmelhriat ngai lem loh hmeltha kan tih zawng nazawng friendlist a dah hi a him lo khawp mai. Inbawlna lam rawngkai anih theih mai bakah cyber criminals tam tak ten thlalak nalh tak tak hmangin  friendlist ah an rawn invite thei che tih i hriat ngei a tul. Hmeltha  i tih vanga friend list a i lo add zel anih chuan engni ah emaw chuan i Facebook an la khawih chingpen  sak ngei ang che. Heivang hian fimkhur taka friendlist siam a tul tak zet zet a ni.

Facebook friend atan kan  hmelhriat ngai lohin min rawn request  hian, a pawng ataka hnawl mai loin, tunge anih kan chhui chiang tur a ni. Keimahni thian hnaivai tak pawh an lo ni thei Hemi hnuah ngaihdan kan siam fel tawh mai dawn ani.

Aw le,  Facebook hi fimkhur taka kan hman loh chuan a him lo hle tih chu tuma hrilh kan ngai awm lo ve. Harsatna laka kan inven theih nan keimahni kan pawimawh ber. Heivang hian Smart Facebook user kan nih a tul hle tawh a ni. Smart Facebook users awmzia ber chu Facebook inkaihhruaina mumal tak zawma Facebook hman hi a ni ti ila kan hrethiam ber ang. Kan zawm ngei ngei tur tlem han tarlang leh hram ang aw.

Login notification siam rawh : Computer leh mobile hmanga facebook luh theih anih avang hian kan hriat loh hlanin kan facebook midangin an hawng thei tih hriat a tha.  I facebook an hawn leh hawn loh hriat theih nan login notification siam a tangkai khawp mai. Facebook home page sir dinglam a “Account Settings,” ah lut la “Account Security.” tihah  khan   “Would you like to receive notifications from new devices?” tih ah khan Yes tih kha click ngei ngei tur a ni. Hetiang a kan siam chuan tupawhin kan account lo hawng ru se, awlsam takin kan hre thei anga , remote logout hmangin  kan logout hmiah hmiah thei dawn a ni.

Remote logout siam rawh. Hei hian a tum ber chu Facebook kan sign out theihnghilh emaw, midangin kan Facebook an lo hawng ru emaw anih pawha Mobile atanga duh hun huna sign out theihna a ni ber mai. Facebook Account Settings atanga siam mai theih a ni. Tin, https ( Hyper text transfer protocol with security) setting hman hram a tha. Account Security ah khan  option a awm a, kha kha select mai tur a ni. Hei hi a thatna  chu connection a him hi a ni ber mai. Hetianga secure connection kan hmang anih chuan kan URL kha http chauh ni tawh lovin https a ni tawh ang.Tin, Public computer (e.g Cyber café ) thenkhatah hian virus vang leh software buai avanga logout hma in computer  hman theih lovin a in off thei  thei bawk. Fimkhur a ngai hle mai.

Strong password  hmang  thin rawh : Facebook Account kan venhim a tul em em bawk ang. Hemi atan hian password chak chi ( strong password ) kan hman ngei ngei a ngai. Password hriat awlsam lutuk kan hmang tur a nilo. Tin, kan password hi kartin emaw, thlatin kan thlak danglam ngei ngei tur a ni. Awle, sawi tur tam tak awm mahse, tuna kan sawi tlem te pawh hi tangkai taka kan hman chuan  tuna kan harsatna thenkhat te hi chu a kiang ngei ang. Facebook tellova kan thalai te kan khawsak theih tak meuh loh avangin, nitin a hmangtu te kan pung zela, kan hmang tangkai zual zel sia, harsatna kan pumpelh theih nan hawh u, a pawng ataka facebook hman hi a himlo tih hria ila, inveng fimkhur hram hram  ang u.