NOVEMBER
Er. Chhungpuia
Renthlei
( Tuesday, November
08, 2011 )
Mizo upa ten
Sahmulphah thla ti a hahipa an sawi
thin, kumpui linglet tawp lam,
mizo ten kan nghahhlelh em em,
thlasik khawvawt intanna thla ni bawk, ni chhuak eng mawi tak leh boruak vawt sur
mai, NOVEMBER thla kan lo chuangkai ta reng mai le! Khawvel pum
huap calendar-ah November hi thla 11-na ni mahse, Julian leh Gregorian Calendar-ah chuan November hi thla
11-na nilovin thla 9-na a ni daih thung si. Hei vang hi a ni ange, a hming pawh
november ti a an lo sak tak ni. Ni e, November tih hi English tawng ni lovin,
Latin tawng Novem tih atanga lakchhawn a ni a, a awmzia chu Pakua (Nine) tihna
mai a ni.
November
chhinchhiahna atana birthstone chu lung mawi leh man to tak Topaz leh critine a
ni. Critine hi lung man to quartz chi khat a ni. Latin tawng a nia, a awmzia
ber chu Yellow tihna a ni.Yellow color leh brown color ani tlangpui.Topaz hi aluminium leh fluorine chawhpawlh a siam a ni. Rawng hrang hrang wine, yellow, pale gray, reddish-orange, leh blue brown
te a ni thei. November birthstone
atan mai bakah Inthianthatna ( symbol of
Friendship) entirnan an hmang thin. November birth flower chu chrysanthemum a ni. Chrysanthemums
hi pangpar mawi tak mai a nia, a hming hi Greek tawng Chrysos leh anthos tih atanga sak a ni. Chrysos
chu rangkachak tihna a ni a, anthos chu pangpar tihna a ni.Tichuan, a awmzia
ber chu rangkachak ang maia hlu leh mawi pangpar tihna ni ber mai. Tin,
November Zodiac Sign atan Scorpio leh Sagittarious an hmang bawk.
Hmm.. a chhinchhiahna atang ringawt pawh hian
november thla hi sual rawngbawlna thla atana hman chi a nilo tih a chiang hle
awm e. Insawisak hlum, dawtsawi, eiruk, nupui ruk, sawnpairuk e.t.c thla atan
nilovin, Thla duhawm leh nghahhlehawm tak a ni zawk e. Latin tawnga 9
tihna ni na na na, 11 tihna ni awm taka thla
sawmkhatna hming atana november tih tawngkam kan han hmang hi kawng
lehlamah chuan ing euh deuhva ding
chunga leh lam hawi ang he haw a nuih
ruk vur vurna tham a tling hial ngei mai le! Tunlai ang hian hmanlai hunah khan
media lamah fakselna han awm ve ngat se
chuan calendar an siam hun lai vel chuan
November chungchang hian chanchinbu phek
a tial ve nual ngei ang le.Tul mang hlei lovah Chief Minister an sawisel nasa
leh pek ngawt ang ka ti! Engle khawle, kan
hriatna thazam chuan november hming a rik rual rual hian thla sawm pakhatna a
sawi mawlh mawlh tawh si mai zawng anih hi.
Ni e, November
thla han chuankai meuh chuan Southern Hemisphere lamah spring a ni a, Northern hemisphere ah vethung chuan
Autumn a ni thung. He thu i chhiar mek lai hian khawvel a lai taka rina hmarlam
a cheng keiniin sahmul phah thla kan hman mek laiin chhimlama
cheng te chuan Tomir thla an hmang tan
ve thung tih te pawh han ngaihtuah ve mai mai teh. Hetiang anih avang hian khawvel
chhimlama cheng te tan chuan November
thla hi keini hmarlama cheng ten May
thla kan hman
hun ang sik leh sa kha an nei dawn tihna anih chu.
He thu i chhiar mek lai hian i bul hnaiah
nikum 2010 calendar a awm anih chuan han thlek vang vang la, November thla hi Monday ah a intan tih i hmu
anga, hetiang chiah hian March thla pawh Monday ah tho a intan tih i hmu bawk
ang. Kumin 2011 Calendar han en leh la, November leh March thla hi Tuesday ah an
in tan ve ve tih i hmu leh bawk ang. Hei hi tihpalh thil thu mai a nilo,
hmanlai atang tawh a ni leh thla, arsi leh lei inkungkaih dan an chhuina atanga
siam
a ni. Calendar siam
chhuaktu ber Rom ho phei chuan an ngai
pawimawh hle a ni ang, ni leh thla hming reng reng hi an pathian hming chawi
vekin an sa thin. Eng pawh ni se, Calendar siamtu kan ni lem lo bawk a, Tin,
Rom ho anga pathian tam tak nei kan nih ve lem loh avangin, kum tin
March leh November intanna ni a in ang tih kan hriat chuan a
tawk viau awm e.
Hei mai a la nilo,
Calendar kha han en leh lawk teh, kumin November thla hi Wednesday ah a tawp a,
August thla pawh Wednesday ah chiah a
tawp ve tih i hmu ang. Kum tin November thla leh August thla hi Weekday in ang chiah chiah zelah an tawp vek zu nia. Hei
pawh hi tihpalh thil thu a nilo leh pek an tih tlat pek chu! November thla hian
bul tanpuiah March a sawma, mual liampuiah August a sawm leh a ni ber mai. Hei
ringawt pawh hi solor system lama puithuna thuk tak neitu, Rom ho phei
chuan thu tak leh hla taka khukpui chiamin
an ngai thu tak hle a ni awm e.
Tidaih teh
ang,Nupui neih mamawh tawh tak mai,Thianpa Chhuantea Khawlhring val upa in awmze nei taka kumin chu engemaw thil tha tak
tih ka duh mange aw .. a tih a tih laiin
November thla a rawn inher chu a ni leh der mai si a, hun hi sazupui kawng kan ang maia kal chakah ka han
puhthluk dawn lai takin damlo na tuara damdawiina mu hlawm reng tan erawh
satel lamlian paltlang tur ang maia muang leh fanin hun leh ni te hi an kal boh
boh leh lawi si tih te ka han hrechhuak leh lawi sia. Hun kal chak thu ka sawi
hmanlo chu vannei ka inti ngawt mai. A chhan chu, han sawi ngat ila chu, NLUP lampum leh CM
lampum takngial pawh hre miah lova titi nikhua apianga CM leh NLUP sawilang
ziah thin, India hmarchhak tlangval senior, nupui neih hun lutuuuuuk tawh mai
pawh nilo, tu nei rual daaaaih tawh, UUUUU TPa hian min nuihzat dawn lutuk
tlat. Mihring, satel leh sazupui mai
maiin hun kal danah pawimawhna an nei lo tiin min liak hrep ang tih ka hrereng
mai. Hun kal chak thu sawi hman lo tur
tawk chiah a hun kal muan thu ka hrechhuak hman chu ka va lawm em!
Roman ho ten
Calendar an siam tirh chuan kumkhatah ni 354 an neia, mahse kan leiin vawikhat
ni ( sun) a hel chhuah hi ni 365 velin an chhut bawk si, kumkhat niturin Ni 11 in a indaih lo tihna anih ber
chu. Julies Caesar-a hunlai khan Roman
ho chuan Thla( moon) hmang lovin ni (
sun) hmangin hun leh ni an chhiar ta a, ni 11 chuangbang hi thla ( months) hrang hrangah an semdarh ta
chiam maia, January, March, May,July, September, November ah ni 31 ( 31 Days)
theuh an dah ta a.February thla atangin ni khat an paih leh a, tichuan kum
khatah ni 365 a lo awm ta a ni. Hei hi vawiin thlenga kan calendar innghahna ber a ni. August Ceasar an a rome sorkar a han awp
khan August thla a ni tlem chu duh lovin
September a mi la in August ah nikhat a belh a, chutiang bawkin November ami la
in December ah nikhat a belh leh bawk a. Heivang hian vawiin thleng hian September
leh November ah ni 30 awmin August leh December thlaah ni 31 a awm zel a ni an
ti bawk. Vawiin thleng hian Calendar hi
kumtin siamthat ngaiin a awm a, Thla khata ni awm zat tihdanglam a ngai kumtin a ni ber mai.
Scientist leh mifing tam tak awm mahse, Hun leh nitehna bulfuk tak a awm thei meuh lo chu a ni ber
mai le. Kumtin mai Calendar kan siam tha a, Sorkar leh mipui ten Calendar
leinan cheng tam tak kan seng ral lo thei si lo.kum a vei zel a, ni ( Sun) leh
thla (Moon) inher dan nen a inmil thei
leh si lova, ni ( day ) chuangbang a lo awm thin, Leap year kum hetiang hunah
Calendar siamrem a tul thin.
Ni e, hun leh ni
te a inherliam zela, in tawng ngailo an intawnga, hmangaihna chi thinlungah an intuh
tawna, hmangaihna kungpui lo tiakin, a enkawl turin pumkhatah an insiama,hmangaihna
par an tlana, chu hmangaihna par chuan nausen duhawm tak tak a parchhuah tira, hun
a in inher liam a nausen te naupang an rawn ni a, naupang te tleirawl an ni a,
tleirawl hmeltha te sakhmel a lo
chuaia, nu leh pa valai te hai ang an lo
tar thin. Hun leh ni ten min herliam san zel a, tar leh upa te phei chu hun leh
niin a liamsan mai nilovin
anmahniin chatuan atan khawvel hun leh
ni te an herliam san zawk thin.
Tunlai
Politician ang nilovin, Pathian chuan mitin te hnenah hun leh ni angkhat vekin
ro a rela, ruling party kan nih avangin hun hi a kal chak lova, opposition party kan nih avangin a
kalmuang chuang heklo. Hmanlai atanga vawiin thlengin a hun takah ni a chhuaka,
a hun takah a tla leh mai zawk. Arpa
chan kan chan hun lai, kan
hriselna that lai leh kan
rilru hlim lai hian hun hi kal duak duakin kan ngai a ni ber mai. November thla hi thla
duhawm leh malsawm thla tiin hmanlai chuan ngai mahse, Kumpui lingletin
November thla hial pawh vawi duailo thleng thin mahila, a pawng atakin thil tha
min thlen ngawt theilo, thil tisualtu te tan Jail luh thla, zuk leh hmuama
insum lo tan cancer inhriatchhuah thla,
zirlai awmtha duhlo tan fail thla, mi hur herh tan AIDS kai thla e.t.c a ni
thei daih. Keimahni theuh hi kan
pawimawh ber zawk a lo ni. Taima tak, rinawm tak leh tha taka kan
mawhphurhna Siamtu in kan kova a nghah kan hlen chhuah chuan
November thla hi malsawmna thla alo ni
mai zawk dawn a ni. Hlawhtlinna meichher chhi chung leh thinlung taka nak tip
nak thai maia Remna Lalpian champha hlim
taka lawm thei turin
November thla hi i hmang phawt mai teh ang u.
No comments:
Post a Comment