WELCOME TO CHHUNGPUIA RENTHLEI BLOG

GREEN MIZORAM NGE BLUE MIZORAM ?

 Er. Chhhungpuia Renthlei

(Published  on Vanglaini Daily NewsPaper on Dated 9^th June (Tuesday),2015)

Media hrang hrangah Green Mizoram chungchang a lang leh tan ta. Sun Glass hlai tak leh Midum nihlipa nen meuha inthuamin  kan minister  zahawm tak tak te leh kan milar ten Cable TV a lang ngei turin Thing an phun leh dawn anih hmel hle mai. Ni e, Sum tam tak sengin  Mizoram sorkar chuan kumtin Green Mizoram a buaipui a, hei hian a tum ber chu  kan leilung venhim leh  leilung atanga tui leh boruak tha malsawmna  kan dawn zel theih na a ni. Kumtin Green Mizoram denchhenin thing kan phuna,Chanchinbu ah leh TV ah uar takin kan puang a, kum hnih kal ta a kan thingpun te kha Mizoram ti hring dup  thei  tur chu anni tawh asin maw le.

Kan sum senral ngaihtuah chuan  Mizoram pum hi thingkung mawi tak takin in a khuh  hrin dup a hun viau laiin fur lai ngat phei chuan GREEN Mizoram nilovin BLUE Mizoram  kan ni mah mah zawk. Silpouline in rampum deuhthaw kan tuam a,  a bikin  Aizawl  ngat phei hi chu Kei chuan BLUE CITY  emaw, SILPOULINE CITY  tia vuah law law mai a fuh berin ka hria!

Kumtin mai,  abikin furpui laia chhiatna nasa tak kan tawk fo ta mai te hi kan in enfiah a ngai hle mai. Lirnghing leh thlipui ang chi te hi chu  congress emaw MNF emaw pawh sorkar se, Pu Hawla leh Pu zoramthanga sorkar vanga pumpelh theih an nilo. Hetih lai hian, chhiatna tam zawk kan tawh te hi chu kan pumpelh theih leh kan inven lawk theih, leilung dan kalha kan chet vang veka chhiatna a ni zawk .

Mizoram,  changkha ang maia  rualrem lovah, rem leh rem lova insak leh  kawngpui sial  a tam em em avangin lei a min a, thingkung a tlu a, green Mizoram tuipui viau mahila ruah a sur dek deka sorkarin  silpouline bawk sem leh a, a tawpah BLUE Mizoram bawk kan ni leh si. Thing tiak aiin silpouline hi sorkarin a sem hnem zawk lo maw? Green Mizoram hlawhtlinna tur hian kan zavaia kan tanrual angai ani ber mai.

A bikin Aizawl leh district khawpui thenkhatah leilungin a dawl loh tur khawpa insak te, tui luan kawr (drainage system) tha tawk lo te atam mai. Kan khawpui hi khawpui mangkhawngah kan chantir a ni ber mai. Midang tana chhiatna thlentir thei  Insak thiah mai tur tam zia hre reng si a  kan sorkar thuneitu ten  an mit an siai khum a,  an vei pet leh ringawt  thin te hi an bansan a hun ta. AMC  te pawh hian motor parking leh a behbawm atanga mipui laka sum lakluhna lam ringawt buaipui lo hian  chhiatnaa kan inbarh luh theihna lak ata  kan invenna lam hi buaipui nasat zawk  a hun ta e.

Chhiatrup laka ram venhimna kawnga sorkar hmalakna thlawpin  kan zavaiin tangrual ila, kan khawsak inthlahdah thin avanga kan chung ngeia chhiatna lo thleng thin hi GREEN Mizoram denchhen hian pumpelh i tum ang u. Kan ram zimte hi   GREEN  Mizoram ah nge BLUE  Mizoram ah kan siam dawn le ?