Kan tih tur kan ti lo nge kan tih loh tur kan ti zawk !
Er. Chhungpuia
Editor in chief , ABACUS
( Mizoram IT Magazine )
Kan tih tur kan tih loh
hian nge kan tih loh tur kan tih zawk hian pawi khawih ang le ? tih hi zawhna tlanglawn ber ani awm e. Kohhran danah
chuan kawp lai nei mipa in emaw minu in emaw mi
pasal emaw mi nupui emaw a tih a a tih reng reng loh tur a tih chuan “ Uire “ a niin pawi nasa tak a khawih tihna a nia, a tih tur zawk a tih loh avang
leh a tih loh tur zawk a tih avangin kohhran pal a nek chhe ta thina, Pathian leh kohhran pawi a sawi tihna a ni. A pahnih hnihin a
pawi hle ve ve tihna anih chu! Kan ramah
chuan Sorkarin a tih tur a tih lohva
mipui ten kan tih loh tur kan lo tih hian pawi nasa tak a khawihin
vanduaina rapthlak tak “tual thihna “ thleng
thlen tih chu kan tunlai boruakah a chiang hle awm e. Aw le, thu sawi
leh ziah nikhua a thuhmahruai neih zel mai hi
ei lehin dawn a pianga tawngtai zel tum
leh insual dawn apianga exercise
leh kungfu han practice hmasak leh te te
tum nen hian a in ang deuh rohva, a
tangkai viau rualin kawng leh lamah chuan
a remchang vek kher lo thin.Tin,
thusawi leh ziak thiam ten
tunlaiah chuan an ching meuh ta lo bawk nen, keipawh
thusawi leh ziak thiam ka nih vang ni hauhlovin thuhma han nei duah tur khawpa thu leh hla
lama ka ralkhat puzawn Pu KL Liana te Pu Vanneihtluanga te anga tawngkam thiam
ka nih ve loh avang zawkin thuhmahruai
tel miah lovin pa valai nupui nei thar hlim zan mu tur ang maiin ka thupui ah
ka han bung nghal mawlh mawlh mai ang e!
Kan ram zim te hian chanchin a chhia a tha in
a ngah ve hle tawh mai. Damlo nun chhan
him nana beisei taka neih thinglungkhawng tak meuh meuh va Doctor kan pan laia tihsual thil avang nge an inthlahdah vanga Doctor ten a khampheia min thlah liam te ,
rawngbawlna leh khawtlang kaihhruaina
lama a mei zang hlaptu Mifing tak taka
kan ngaihten thil tha tih kan duhna
lama Dan leh dun bak kan kal fo mai te, Pathian theihnghilh
thak khawpa kohhran mahni ta neih taka
nei a kohhran tana thahnem ngai em em kan lo pung ta thur thur mai te, Kan leibat hnemzia leh sum leh paia kan
inremchem a tulzia au chhuahpuitu Sorkar
lam hotuten mipuite pek tur chhiah hrang hrang
an tih pun thur thur laia kan ram
economics titlahniam rawih theih khawpa sum
leh pai senso na tur Lirthei lei leh
Hotu lian hlawh tam tak tak nei kan insiam belh lai a sum leh pai
renchem nan cheng tlemte hlawha khawsa
ve tawk tawk MR kan han in ban leh ang
lawp lawp te hi a makin a na ngei e han tih mai pawh awl tak a
ni. Enge maw han thleng hlek se
chanchinbuah a dik leh dik lo chawhpawlh nuaihin a tuk lawk ah chhiar theihin a
awm zel si a ,ngaihdan atam pawm dan atam an tih angin keini mi mawl tak pawhin
He luikam atang hian a then pawh kan hriat loh tur thleng thlengin kan lo hria
a, Sawi thiam aharin sawi lova ngawih bopui thiam lah a har thin mang teh e.
Tun hnai maia kan ram mi pawimawh pakhatin Parliamentary Secy. chung changa hma a rawn la te hi keini
mimawl chuan a tih tur tak a ti
nge a tih loh tur a ti tih pawh kan hrethiam si lo a nih hi. India
constitution dan kalha kan CM zahawm
takin a party mi leh sa vulh nana tul lova pawisa hman ralna atana kan
rama la awm zen zen lo Parliamentary
Secy. te hi a siam a nih ngat chuan a rang thei ang bera thiah chi a ni awm e. Hetih lai hian
Party in itsikna avang leh ruling party kan sawisel duhna vang hrim hrim
a nih chuan Opposition party te pawh
hian a rang thei ang berin insawisel mai
mai hi sim a tha ang. Biak inah leh Pathian rawngbawlna kawng hrang hrang mai
piah lamah Thawhlawm thlengin heng kan mi pawimawh tak tak te hi a phusa
leh a inti neitu ah kan tang fur hlawm mai si a, a rawngbawl tura min
siamtu leh Christian kan nih chhan ber
Isua Krista pawh a zahawm e mai.
Dan leh hrai ken kawhna tha lem lo,
In biak pawhna harsatna hmun leh chinchang hria mithiam awm tlemna hmun
khawimaw lai khaw chengkerh takah te chuan
vantlang tana mi hnawksak leh pawikhawih ching te chu VDP, YMA, JAC, etc. te chuan lo hremin lo
sawisa ni se han dem ngawt theih a ni lem lo. Mahse hei pawh hi danin a phal
chuang lo mai ni lovin Nunna lak hial phei chu Pathianin a rem ti lo. Isua pawh
khan Amah man tum leh thah tum tu te
ngei ngei Rom Sipai hliam pawh Gesmani huanah khan a tidam a. Mizual
khenbeh a dinglama mi pawh Paradise ah a
lawm lut a nih kha. Hei mai a la nilo, Uire nu kohhran leh khawtlang in thi
tura a chungthu an rel pawh "
Sualna nei lovin deng hmasa ber rawh se " tih thu tawi te hmangin a chhandam
a nih kha. Heng te hi
Sakhuana lama kan sorkar hotu lian Isua tih dan a ni daih a sin.
Kan
NGO te pawh hian thahnem kan ngaih luat avanga
kan tih tur bak kan tih hi bansan a hun ta hle mai. Mahni inchhung,
nupui fanau kaihruai tha hman lek lovin mahni
in pawh luah lum lo khawpin pawn kan
chhuak a. Mifa te kan vei a, kan fate midangin an rawn vei hi chu a buaithlak
tak zet anih hi.. Police
department hian NGO puihna tellova an
hna an thawk thei lo a nih chuan
department ti lian mai rawh se. Thil ru leh pawikhawih an awm chuan YMA,
MHIP, VDP et.c te hian Police Station
hnai ber phone ila, an kutah dah hmiah hmiah zel ila a finthlak. Police in
dan angin an chungchang an rel mai dawn a, hei hi a fel ber.
Sorkarin hetiang lama hma la tu tur
Police , Excise department a nei teuh laia
kan han in sawisa chiam hi chu a
tul ber lo niin a lang. Ka hriat sual loh chuan
Sawisak hlum tuar te hi a tlangpuiin
Sorkar milian leh Politician fa an nilo tlangpui, Vengchhunga kohhran
hruaitu emaw NGO hruaitu fa te anni bawk hek lo. Hmeithai, mi rethei leh chhum chhia chhungkaw mi an ni tlangpui zawk.
NGO te engti kawng pawha khing ngam lo tur leh
engamaha kan ngaih loh fa te kut kan thlak chan a tam hle niin mi thilchik mi te chuan
an sawi.
Tun hnai maiah Aizawl hmarlam thalai
pahnih ngawt mai an boral leh ta
hi Natna hrikin a seh hlum nge sawisak hlum an ni tih chu kan sawi phak a ni ve lo va, mahse an thih
hun aia hma ah an thi tih erawh chu a
chiang hle mai. Mi vuakhlum permit
nei thei khawpa Pathian mithlan mifel famkim
tumah kan awm ka ring lo ang bawkin Vuakhlum phu hliah hliah khawpa misual turu lutuk an awm ka ring bawk hek
lo.Mahse, sawi neuh neuh tling khawpa
thihna kan han tawk thin hi chu a vanduai thlak tak zet zet in ka hria. A pawi
tur zawng zawng a pawi tawh hnuah Police hriattir an han ni te hi kawng engemaw ah chuan tangkai viau
mahse, kang mei chhuakin In a kan ral vek tawh hnua kang thelh
Motor thar tak rawn thleng ve leh ringawt ang mai nen a a dang vak chuang lo awm e. Rikrum
thila khua leh tui tanpui ngai pui tur
te hi chuan mahni vengchhung
theuh ten theih tawpa sum leh pai tha leh hrui kan tih tur bak bak thlenga kan
seng hi chu a kristian in a mizo nunzia
hle laiin police station biak theih reng laia
NGO ten thil sualtitu ni a kan
ngaih kan lo sawisa hrep hrep hi chu
kan tunlai khawvelah chuan a hun ta meuh lo niin alang. Dan ang thlapa hmalatu tur kan sorkar mi rawih Police te kutah hlan mai thin zawk ila a tul leh an niin hremna tiang lo lek kawh
mai zawk se la a fuh zawk hle ang.
Hetih lai hian kan sorkar lam pawh
hian a him china kan lo ui pui tuilian
thlir ngawt anih chuan kan tisual let der thei ve bawk tih hriain keimahni kan in enfiah a tul tak zet a ni. Kan population leh kan ram tet zia ngaihtuahin venhimna lama
hnathawk tur Police kan nei fer fur a, tih tur an nei lo nge a then in Mistiri tih awm tak tak in sak lam
hna an thawk a, a thenin an pu te vawk an vulh thul. hei mai a la ni lo pu te vawk chaw thleng buaipui police te kan
nei zu nia. An pu te na hlau si a engmah an sawi ngam si lo. Police a kan lak
tam tak te hi chu han pension ta sela chu Insa thiam, vawk vulh thiam, tuichawi
thiam, Insuk thiam e.t.c an ni fur hlawm mai lo ang maw ! Sorkar hriatpui
hauhlova kut tuara thihna thleng fo thin te hi kan Sorkar chak tawk loh vang a
ni thei angem tih pawh in enfiah a hun
hle tawh a ni. Tin, Sorkar lam be pawp
hmasa tura thurawn petu tura ngaih leh Sorkar hrechiang ber ber tu kan NGO ten
Zu leh ruihtheih thil lam te, Ruk ruk leh tual thih chung chang thlenga roreltu
ang hrima police hna tur kan lo buaipui
vak mai hi kan Sorkar Police te kan rin
zawh loh vang nge ni ang tih hi mi tam
zawk zawhna a ni fo si.
Mi awm tha duh lo leh ruk hmang ten kan pawi
an khawih a nih chuan a rang thei ang ber a police lam hriattir hi kan tih tur
ani fo awm e. NGO pun buai kher lova Lirthei insu leh in ruksak lama police kan ko nghal zung zung
ang hian pawikhawihtu te dan anga an
chunga rorel sak turin police station
hnai berah FIR thehlut ila anni in an hna an thawk mai dawn a ni. Police ten
chak zawka hna an thawh theih nana
phungbawm sawma pawikhawihna thlenna veng NGO te an pun anih chuan kan
lo puih mai kha a finthlak viau zawk. A letlinga vuttui thlawr bel ang
maia NGO ten hma kan la chiam mai thin
hi kan inngaihtuah chian chu a ngai awm
e. a tuartu chhung ten engkim a pawi
tawh hnua FIR an submit te hi dan ang
taka thil kan tih chuan a tlem sawt ngei
ang.
Mizoram sorkar hian keini
khua leh tui te tan kawng hrang hranga khaipa ni turin dan leh
dun, deapartments hrang hrang te,
Officer leh staffs te, misual hremna
te, mi fel chawimawina te , dam
lo dahna damdawiin te, englai pawha mipuite tana duty Security force
leh thil hrang hrang a nei vek a. A mawl mang thei ang ber chuan
keini Democracy ramah chuan heng ram leh
hnam inrelbawlna leh kaihhruaina keng
kawhtu mipui te thlan tlin Political
party te hi Sorkar kan ti mai a. Kan hrethiam vek awm e. Tin,
Sorkar inrawlh kher rem lohna hmuna mi dang te tana thil tha ti turin sum leh
pai lama hlawkna tur nilo, midang te
tana inpekna thinlung pu mimal leh kohhran din Ruihhlo ngaite enkawlna
hmun te, Non- Governmental Organization
(NGO) hrang hrang kan nei thluah bawk. Keini mizoram phei
chuan kan population leh kan ram tet zia ngaihtuahin venhimna lama
hnathawk tur Police kan nei fer fur a, pawl hrang hrang leh chanchinbu beng var thlak tak tak kan ngah em
em maia. Thlarau nun lama kan inzirna Biak In
phei chu luahlum sen loh
khawp kan nei leh nghal a. Heng kan thil neih te hi kan
hmang tangkai tawk lo nge kan ring zo lo tih pawh hriat thiam ava han har tak em! Kohhran leh khawtlang pawhin kan chhuanvawr
mifel pui pui kal khawm ten thinrim vanga na tak taka pawikhawihtu nia kan puh
kan han sawisa chiam chiam thin hi a
vanduaithlak tak zetin Kristian te hmunpui , Missionary thahnem tak tir
chhuaktu te ramah hetianga tual thihna a thlen fo mai chuan kan missionary ten engtinge Ringlo mite hmunah Lalram an din theih ang le
Aw le, tun hnai mai tual thihna ah
pawh hian tumah indem lo ila Sorkar lam te, NGO
leh rawngbawlna Home Center
te hian
kan tih tur kan ti lo nge kan tih
loh tur kan ti tih hi enfiah ila a tha awm e. Dan leh thupek ngaih
pawimawh hi khua leh tui tha tih
tur a ni tih hre reng chungin kawng
engkimah " Isuan engtin nge a tih ve ang " tih thu hi ngaihtuah fo chungin
pawi khawihna leh Harsatna kan
neih chuan Sorkar thuneitu te rawn zel ila. Thilsual titu te man chhuahna kawng ah leh dan anga hrem anih
theih nan a , kan Police ten NGO hruaitu hrang hrang te hnena phungbawm an sawm
chuan tha takin theih tawpin thudik kan
hriat ang ang te lo hrilh mai ila, keimahni thu thu a lo buaipui ve chiam chiam
lovin kan tih turah ram ri fel tak kan
kham thiam a tul hle awm e. Tin, Sorkar pawh hian hlawh neiin a sing
tel tak meuh meuh hnathawktu a neiin NGO puihna kher lo pawhin Misual zawng tur
te, zu leh ruih theih thil man chhuak tur te hian hna an thawk thei a ni tih
inhrechiang sela mipui laka tlaktlum tum
ang hrima engemaw hleka NGO puihna kan
ngai tih fo mai te hi kan sawrkar chak tak hian a bansan a hun tawh hle a ni. Hetianga rinawm
taka kan tih tur theuh kan tih phawt chuan
Pathianin min pek Nunna hlu tak hi
" Tual thih thubuai avanga FIR thehluh te, TV a insawi thiam vak
vak te leh NGO emaw rawngbawlna Home
Center in mi an sawisa hlum " tih
tawngkam hi a bo ngei ka beiseiin he ka beiseina hi a thleng dik ngei ang tih
Zawlnei Pu Isaia te khan hrllhlawk ve kher lo mahse ka ring
tlat a ni.
No comments:
Post a Comment