E-READER
Er. Chhungpuia Renthlei
Mizoram hi population density nena khaikhin India ramah Chanchinbu ngah ber state kan ni hial awm e. Computer Technology avangin Printed Media lamah nasa takin hma kan sawn chho zela, zing thawh hma atanga zan mut dawn thlengin chanchinbu hrang hrang ten kan kawngkhar an rawn kik nitin tawh mai a nih hi. Nitin mai hian Silchar lam atangin Paper tam tham tak tak an rawn phur lut thur thur reng mai. Nikhat a kan paper hmanral zozai te hi Truck trip engemaw zat a tling hial in ka ring. Ni e, Paper hmangin zirlaibu leh chanchin thar kan buatsaiha, hei mai a la ni lo, Bible leh Pathian thu pawh Paper hmang thovin kan buatsaih,Information dahthatna leh lakchhawnna bul ber Paper hi media lama tisa leh thlarau nunna hnar, Damchhung finna leh thiamna hmanrua, Chatuana nunna kan neih theihna tura hmanraw tangkai tak , Vanram kailawn chahbi pawimawh tak a ni kan ti lo thei lovang.
Khawvela Company lar tak SONY chuan tunhnai mai khan Paper hmang miah lova information print dan an hmuchhuak ta. Hei hi SONY Reader tih emaw E- Reader tiin an vuah. Paperless Book tiin an sawi lar hle bawk. Sony Scientist te chuan Electronics Ink an hmuchhuak a, hei hian Positively charged white particles leh negatively charged black particles hmangin Plastic film te tak teah thu tam tham tak an khawlkhawm thei a ni. Tunah hian Electronics Ink hi E- Reader atan hman a ni mek a ni. Tichuan, power tlem te hmang chi khawl te tak te duh duha ken sawn theih ( portable ) bawm tereuh te chhungah Information tam tham tak awlsam taka a dah theih leh chhiar theih a siam a ni.
News paper han chhiar hluai mai hi kawng thenkhatah chuan a hnawkin a rem chang lo hle thin. Tin, Computer Screen atanga thu han chhiar reng lah a remchang lovin mit a kham duh bawk si nen, Paperless Book Electronics Inks leh E Reader hmanga siamchhuah a han ni ta hi a tangkai hle tura ngaih a ni. Tunah chuan Paper ang maiin plastics screen duh duha thleh tet theih kan keng anga , kan duh ang ang thuziak leh milem kan en thei tawh dawn ta. Hei mai bakah kan mamawh information chi hrang hrang he plastic ah hian kan download thei bawk ang.
Tunah hian E- Reader hmangin Adobe PDF files, blogs, RSS feeds, photos leh e-books chi hrang hrang kan Save (khawlkhawm) thei a, awlsam takin kan chhiar thei bawk a ni. Tin, E – Ink Scientists leh E Reader Scientist te chuan tangkai leh zuala Zirna school ah te, Library ah te kan hman theih nan nasa takin research an bei mek reng bawk.Hei mai bakah Power a mamawh thlem em avangin E Ink hi cell phones ah leh watches ah te a lar hle tawh bawk. Heimai bakah hian Credit Cards atan te, fresh food shelf labels ah te leh Cell phone Display ah te hamn a ni bawk. A bik takin hun bi nei a a man leh hlutna inthlak reng angah te hian E reader hi atangkai hle . Entirn nan, Mulco bawnghnute hi Rs 15 man ni ta se, tlai lamah Rs 16 man in lo sang ta se, E Reader hmanga Label siam anih chuan automatic in a man in bel kha a lo danglam ve dawn tihna anih chu. E reader hman dan hrang hrang hi The Human Factors and Ergonomics Society leh IEEE-USA te chuan TV ah a takin an lo entir tawh a ni.
Petrol in van hun a neia, Ei rawngbawlna Gas leh Tui pawhin van hun a nei. Paper supply pawh hian khaihlak hun a nei ve ngei ang tih pawh chiang sa a ni.Kum hnih chhung vel paper man hi to ta viau se, supply lamah harsatna han awm ta bawk se, India rama Chanchinbu nei tam ber State hi India ram mai pawh nilo khawvel a chanchinbu nei tlem ber kan ni hial mai lovang maw tih te ka ngaihtuah mai mai thin. Ni tla seng lova roreltu , Kumpinu sorkar leh mizo te bung lera inti thei taka kan lawn lai hun daih tawha Thla a han lawn thei tawh America Sorkar te chuan Paper ringawt hmanga information buatsaih leh thehdarh hi theih loh hun leh buaithlak hun a awm dawn tih an hria a, harsatna hrang hrang Media lam pawhin an lo tawk nual tawh bawk. Information Technology khawvelah pawh he harsatna hi uluk taka ngaihtuah ania, vawi duailo Scientist ten research an bei tawh bawk.
Kum zabi 20 kan han pelh meuh chuan Pian leh hmel han bihthuak pawha tumbailek tum sual ni awm tak tak a lang Pu Tpa te hial pawhin Mobile handset chhuak thar ber ber inthlahrung hauh lovin an hum fer fur mai chu a nia, Facebook kaltlangin thu pawimawh lem lo leh tangkaina nei eih lo te min rawn post sak thul. Hmm.. Bramaputra chhak lama a cheng te hi IT lamah hma kan sawn ani tih hairual a ni lo ve. Ni e, Electronics leh IT khawvelah hmasawnna a zuan a zuan tak meuh meuh avangin kum sawm a liam leh meuh chuan, tuna I chhiar mek chanchinbu pawh hi E Reader hmanga siam ani tawh mai thei. E Ink leh E Reader hmanga siam Paperless- Electronics Paper magazine chi hrang hrang mizoramah kan neih ngei a beisei awm bawk. Bazar ah te leh dawr hrang hrangah E reader hmanga Price Label pawh siam pawh a awm fur mai thei bawk. Khawmpui lian leh huau huau tamna keini mizoramah ngat phei chuan Electronics Banner hawh tur te kan nei fur mai anga, hlawk thlak tak tur a ni.
No comments:
Post a Comment