WELCOME TO CHHUNGPUIA RENTHLEI BLOG

JUNE  THLA LEH KEINI 

Er. Chhungpuia Renthlei

Khawnge tun tum chu, kum 1970 atang daih tawh a   MLA  vote thlak rual ni  tawh si,  a  baptisma chan rualpui ten an Nupui pasal  neih  Silver jubilee an lawm  sup sup tawh  pawh a,  Senior  nihna pawm thei reng reng lo leh  in lak Young nana  a fa  rual  leka naupang  keini ang hial pawh   U chhungpui ti ngata min kotu,  U Tpa  ten  thla serha an neih bur mai,  June thla hi  khawvel  miten  an lo serh ve reng em tih leh  thla dang zawng aiin a lo hlauhawm bik  reng reng  em tih han bih thuak thuak teh ang.  

Theology leh  technical  thiamna atangin  hun pawimawh neihna thla atan a thian lohna  awm lem lo mahse,  “Nikir thla “ tia kan pi pu ten   an lo koh duat  June thla   hi  Putar Junior  ( oh ka tih sual,  tlangval Senior ka tihna ! ) U Tpa te ho mai bakah  mizo te hian  thla serhah kan nei  deuh roh nge ni, YMA  Day  tih mai loh chu tun hma atangin nupui pasal inneih nan  leh   program pawimawh dang han neih nan  kan thlang meuh lo  niin  alang.   Mi  thenkhat te chuan  hunpui  neih nan an duhlo bur mai zawng a nih hi.  Ruah sur  thla  a nih avangin Khua a nuam lo a,   veivah a hreawm deuh tih mai loh chu   danglamna em em a awm  chuang lem lo awm e. 

 June tih tawngkam hi   Latin   tawng “ iuniores” atanga lak niin an sawi a, a awmzia ber chu  Naupang zawk  tihna a ni. June thla   birthstone atan  pearl,  Moonstone (gemstone) leh Alexandrite an vuah. A awmzia ber chu  June hi  hriselna  leh damreina  entirna a ni. Hei mai a la ni lo, rin loh daihin  June Birth flower atan   hmangaihna   Rose par  hman a ni.  Heta tang ringawt pawh hian  khaw awmdanin zir se chu June thla ngei maia   hun pui han nghah  a thlanawm hle  mai. June thla ah hian rose Pangpar mawi tak tak  ten par an chhuah  thin avang hian  Rose Month  tiin an sawi bawk thin. June tih  tawngkam hi   Jupiter nupui , Roman  Inneihna pathiannu  (Juno ) atanga lakchhuah niin an sawi.  Mi ngilnei leh hmangaihna ngah tak  Greek pathiannu ( Hera )nen  ang khata sawi a ni bawk. Heivang hian tunhma chuan  Roman leh Greek  mi te chuan June thlaah hian  inneihna  a tluang duh bik riauah an ngai nghet tlat a, nupui pasal inneihna thlaah June hi an thlang thin.  Sik leh sa lamah chuan Ni 30  nei, June hi  kum khat a thla  lai hawl ber  a ni.Tin, June thla  hi Northern Hemisphere a cheng te tan  kum khata ni  rei ni ber leh  Southern Hemisphere a cheng te tan  ni reiloh  ni ber  awmna  thla a nih  avang hian ngaih pawimawh a hlawh hle mai bawk

.

       Khawvel ram zau zawkah kan mit han len ila, Pathian in June thla mal a sawm zia   hai rual lohin kan hre thei awm e. Kum 763 BC  daih tawh khan  Assyrians ho chuan  June thlaah hian  ni awk lem ( Solar Ellipse) an lo  chhinchhiah a , he an thil chhinchhiah  hi  Messopotamian History zirna atana  a lungphum pawimawh tak a ni.  Kum 1667   June thla khan “human blood transfusion “  chu   Dr. Jean-Baptiste Denys kaihhruaina hnuaiah  hlawhtling taka neih a ni, hei hi damlo mamawh te tana  thisen  pek hmasak berna  a ni. Tin,  Kum 1752 June  khan Scientist mi ropui , Benjamin Franklin chuan  kawlphe  hi  electric  a ni tih atak ngeiin a  finfiah  bawk.  Kum 1903  June thla khan   Ford Motor Company  dinchhuah  a ni bawk. Kum 1972 June thla khan  Canada rama   single-site hydro-electric power project  lian ber  chu Churchill Falls, Labrador ah ropui taka din a ni.  Tin, Kum 1762 June thla kha Austria ramin  pawisa  Note ( paper currency )  an hman hmasak berna  a ni .  Kum 1977 –June thla khan Larry Ellison, Bob Miner and Ed Oates a te thian ho chuan Redwood Shores, California  ah Oracle Corporation chu  Software Development Laboratories (SDL)  ah an  ruahman.  Hei mai a la ni lo, MHIP   mil zawng tak  June thla ah a la thleng cheu mai maw le. Kum 1963 – June thla a  Soviet Space Program, Vostok 6 Mission  kha  khawvela  hmeichhe  ( Nula Valentina Tereshkova-i ) space  a zin hmasak berna a ni..

Aw le, kan ti lak lawh bawka, chhun zawm zel teh ang aw. June thlaah hian  ram hrang hrang te chuan Flag Days  an hmang thin. e.g.  Sweden (June 6), USA (June 14), Denmark (June 15), Argentina (June 20) , Romania (June 26), e.t.c .Tin,  Luxembourg, Belgium, USA, UK, Mexico, Venezuela, Netherlands, Ireland   leh Canada  te chuan June thla hi malsawmna leh thla ngilnei ah ngaiin kum tin  June thla  ah hian Mother's Day leh Father's Day  an hmang ziah bawk Portland ah ve thung chuan  nula leh tlangval  inhmangaihna lantirna ni pahfawmin kum tin Rose  Festival  ( Rose pangpar Kut ) an hmang thin. Canada mipui te chuan June Chawlhni vawi hnihnaah  kumtin khel lovin  Canadian Rivers Day an hmang thin. Tin, Republic of Ireland sorkar chuan  June  first Monday hi  public holidays ah a puang hmiah mai bawk. Kumin kum 2010 FIFA World cup thlengtu  South Africa  chuan June 16 hi Youth Day ( Thalaite ni ) atan kumtin a hmang ve bawk thin zu nia !  Kumin phei chu an hlimna a thuah hnih  mai ni lovin,  a thuah thum, thuah li ngei ang le. Hetihlai hian keini Mizoram  tan pawh June thla hi theihnghilh rual lohvin Pathian Malsawmna thla ni ngei turin tlawmngai pawl intelkhawm lian ber YMA  day a niin kumtin June ni 15 ah hlim takin  kan hmang ve thin  a nih hi maw le. Hetih lai hian ngai teh,   Kristianna in kan ramah Puithuna atthlak leh ramhuai a um bo,  ti tu leh, hlauh neihlo ang maia Pathian thu awih inti  ten  vawiin ni thlenga  June thla hi  thla dang aia  nel loh  riau bikna kan la nei reng hi chu   kan paih bo pawh a finthlak viau awm e. Khawvel pum huap han thlir phei chuan June thla hi midang tana malsawmna tling ngei tur  thil tha tih nan  an ngai hmiah mai zu nia .

Chu ti na na, thil tha leh  ropui tak tak  hring chhuaktu June thlaah hian,  Sappui nun ngailo leh  tum sang keini zofa te pawh hian  YMA day mai nilo,  engemaw tal thil tha leh chhinchhiah tlak  tih tum ve ta ila, Hun awl kan neih phawt chuan,  ruahin min bumro lohna tur hlimna leh lawmna program hrang hrang duang  ila,  a duh duh  June ah innei se la,   Rose  Festival  ( Rose pangpar Kut )   hmang pawh an awm tho bawk nen, a inhmeh viau in ka ring.  Khaw nawm loh vanga program kan siamlo anih pawhin khawchhiat leh kawng chhiat chhuan lama “ June thla a lawm “ tih vanga  huh hlau ve em em  mi  kawng kal  motora inchil per  mai mai te  hi  sim  ila,  Thlangra tia awrh vana chhum dum  a awm dek dek a Office kal tlai leh haw hma ngawt mai zel te sim ila. Tin,  Sum leh pai aia Program neuh neuh  nei ngah, Pathian rawngbawl lova, Kohhran  rawngbawl, 

Pathian leh Angel te aia Kohhran mipui leh hmelhriat te hmai zah,  Rawngbawltu in ti te hian khawlai vah chhuah tlem deuh zir ila, Tin, thinlung taka  ram hmangaihtute rorelna hmun, ram hmangaih vang ni lem lo, hnathawh peih loh leh hun neih vang hrim hrima  awlsam taka sum  neih theihna Seki buhchhuak ang maia  ngaia Political Party  runa   lawi luh chhen mai te hi rui chunga kohhran  khawmpui lian  apianga lotel ve chhen ai daihin a inhmehlo tih hriain June thla atang a kumkhuain bansan ila,  taima takin kan theih tawkin hna thawk ila a va lawmawm dawn em !