WELCOME TO CHHUNGPUIA RENTHLEI BLOG

MOBILE PHONE  SURVEY                                                   

Er. Chhungpuia Renthlei

 (He article hi kum 2013 kum tir lama ziah a ni)

Mobile phone  in hma a sawn nasat zia  ka ngaihtuah changin Dr. Martin Cooper hi ka hre reng thin. Dr. Martin Cooper hi  Motorola Company ah  Director of Research and Development   lo ni reng tawh thin a ni.Kum 1973 April ni 3  khan Motorola chuan an Mobile phone  siamchhuah hmasak ber an en chhin a,  Dr. Martin Cooper ngei mai chuan   Khawvel a  avawi khatna atan  Mobile phone  hmangin  a thian zinga pakhat  a bia a. Hlawhtling takin an in bia,  khawvel mihring zinga  Mobile phone hmang hmasa ber tu chu  Dr. Martin Cooper   a lo ni ta reng mai.

            Mobile phone  hmanga kum 20 dawn  inbiak anih hnu kum 1992 December thla khan  a vawikhatna atan  Neil Papworth  chuan  SMS ( Short Message Service ) hmangin  "Merry Christmas" tih thu a a thawnchhuak ve leh ta. Tichuan, khawvela SMS  hmasa ber chu   "Merry Christmas" tih thu a lo ni ta a nih chu !. Hun leh ni te rawn inher liam zelin  kum 2010 kan han chuan kai meuh chuan  USA ah ringawt pawh a tlem berah  4.1 billion SMS  nitin thawn chhuah a ni ta. Mobile Phone hmangtu  70% ten SMS  kan hmang . Mobile   buaipuitu te hian a hlawk tih hriain cheng  nuaih tam tak an seng  nitin a, hetihlai hian  an senso 20%  lai mai hi SMS   hmanga an sum lakluh hian  a phuhruk  tih tun hnai Survey chuan a tarlang.

Mobile Company  te hian kawih thleh theih ( Flip) Mobile phone    ang hi  siam tumna rilru em em an nei lo va, Mahse TV Serial lar tak mai Star Trek Series ah    duh duh a kawihthleh  leh kawihchar  mai theih a Mobile phone an  hmang  lai kha  Motorola company hotu te chuan  an lo hmu fuh hlauh mai pek a,   heta tang hian  kawih thleh theih Mobile phone   design  nachang an hrechhuak  ve chauh zu nia !  Tichuan,  Motorola chuan   Flip  Mobile phone a siam chhuak tan ta a, a hming atan   StarTAC tiin an phuah nghe nghe. Tin,  Kum 2000 hmalam ah khan Internal Antenna  nei Mobile phone an la siam chhuak lo hrim hrim a, Nokia company ten  Nokia 3210  an siamchhuah kha  internal Antenna nei hmasa ber a ni bawk .Tunah hian  USA tualchhungah  ringawt pawh atlem berah  250-300 million cell phones hman a ni. Khawvel pumah phei chuan a tam ngawt ang le ! Cell phone Signal  boruaka a chet dan atang  phei chuan, khawvel pumpuiah mipa hnih zelin Cell Phone pakhat  inhmantawm ang  kan ni. Hemi awmzia ber chu tunah hian 3.3 Billion Cell phone  ten  boruakah signal an pe chhuakin an thawn kual reng a tihna ni.

Cell phone pun chak dan atanga  chhutin  a tlem berah  minute  tin hian 1,000 cell phones     thar tihnun zel ang a chhut a ni. Cell phone pakhat ringawt  lei pawh kan harsat vei nen, America rama  cell phone hmangtu te  chuan  an  Cell phone hman lai mek bakah  hluihlawn  leh hman lohva dah mai mai pathum nei zel anga chhut a ni. Tin,  Survey report a alan danin  Cell phone  thar a rawn chhuah zel avangin Mobile model  ngai reng an hmang  reng  ngai lo. Kum khat  emaw kum khat leh a chanve  hnuah  mobile  new model  an lei thar ziah   bawk.

Nikum ang thovin Kum in 2013  hian Smart phone siamchhuaktu lar Samsung leh Apple company te an inel chho leh dawn a, hemi te hi kum liamta 2012 khan in bei tawk hle mai a,  Samsung Galaxy III chuan tun hnai lawk khan  iPhone a rawn thlawh khum a. Apple  chuan  iphone 5 kalpuiin features tharlam tak tak a hmehbel reng laiin samsung  erawh chuan galaxy S III  leh 4.8-inch display  tha zet nen a rawn inchhawp chhuak rup mai bawk a. Hetiang anih takah chuan Apple chuan  iOS 7  hmangin  iPhone 6.1 a siam ve leh ta bawk.  A pathumna nih ngei tumtu te zingah Windows Phone 8 leh BlackBerry 10  te thawm a na hle bawk.  Kumin nipui laia release hman ngei tumin  Mozilla chuan Firefox OS  a buatsaih mek bakah  Linux  Operating system hmang in  sumsung chuan Tizen-based devices a siam mek bawk. 

Mak tak mai chu ,Rt. Hon Tony Blair MP  kha   UK Prime Minister zinga  text message technology   hmanga   direct a mipuite  be hmasa bertu a ni. Kum 2004  November  ni 25  khan  Mipui ten zawhna hrang hrang   SMS hmanga an thawn te  a chhang a, hei mai bakah  bakah  Downing Street atangin  Live  telecast    mobile phone chat-room ah  mipui zawhna a chhang bawk. Hetih lai hian keini ramah ve thung chuan, zan reh tak tak ah leh  zing tak takah tul mang lova,  mi nu emaw  nula SMS leh  be zarh zarh kan  tam viau leh nghal. Zawngchhang hma a sim nghal vat chi  a ni. Thu danga ta lang chuan, Kohhran upa leh Pastor  pawh tiamin, kan Mobile phone a milem leh thu kan dah te hi  Projector hmangin Big screen ngei ah kohhran leh chhungkuain han en ta ila, kohhran atanga hnawhchhuah, rawgbawlna, nihna hlihsak, nupa inthen, e.t.c  kan awm fer fur lovang maw ? 

NORTON MOBILE SURVEY 2012 - INDIA  in  puitling mobile hmang mek te atanga  survey a neih  atanga an hmuhchhuah angsar zual te chu :-

1. 72 %  in Mahni  ngeiin  Mobile an nei 
2. 48 %  ten Mobile kaltlangin  Internet an hmang
3. Mobile hmanga an thil tih tlangpui  tealls leh  chu SMS Phone call leh Photos/videos  a ni.  94 % in SMS  an hmanga, 93 % in  Phone calls an hmanga 78 %  in  Photos/videos lam an buaipui thung
4. Mobile hmanga  internet online thin te thil tih tlangpui  - 1) Social networking (60%) 2) Reading news/feeds (44%) & 3) Online messaging (42%)
5. 60 % te hian Company atanga  tul lemlo  mobile calls leh  text messages an dawng thin  38 %  ( hmun 5 a thena hmun 2 ) ten password hmanga Mobile phone  venhim tul an tikher lo
6. 53 % ten  phone memory a thlalak leh thildang awm te an lock lem lo.
7. 43 %   ten Mobile tihbo leh ruk sak  an tawk tawh thin an ni.
8. Mobile  tihbo leh ruk sak avangin 77 % ten  contact list bo  pawi an tiber a, 54 % ten  photos &  videos bo pawi an tiber a,   52 % ten phone  calls an theih loh avangin  pawi an ti ber thung.

Kum 2013 a Mobile phones chhuak thar  tur langsar zual te chu  Samsung Galaxy S4, Nokia Lumia 720, LG Optimus L7 2 ,Nokia Lumia 520, Samsung Galaxy Young, Samsung Galaxy Xcover 2, Sony Xperia SP, ZTE Grand S leh Huawei Ascend Mate te a ni.  hetih lai hian  Cell phones chhe tawh hi paih mai  lovin Company te chuan  a thar siamchhuah nan an hmang nasa hle bawk. Tin, Cell phone hlui tawh a mi  Thir leh  hmanraw hrang hrang te  lachhuakin  Cell phone  tha tak  tak man tlawm zawkin    an hralh  thin bawk. Eng le khaw le, Mobile phone hi  kan tangkaipui emaw,  pui lo emaw,  IT  hmanrua hmuhchhuahthar zingah na na chuan   mipui ten kan hman tangkai leh buaipui ber a ni hial awm a sin.