WELCOME TO CHHUNGPUIA RENTHLEI BLOG

HRINGNUN SANA 
  Er.Chhungpuia Renthlei
Written on : 8/8/2019 

Hringnun hian sana a zawnga sana rinawm ber leh mitin mil tura khuanu lo duansa HRINGNUN SANA a neia, kan pianchhuah atanga kan thihni thlenga kan hun leh ni min chhiar sak turin man leh mual awm lovin Siamtu in lei mite min buntira. Lungngaihna, hlimna,hlawhchhamna leh hlawhtlinna, thihna leh damna, bawrhsawmna leh hriselna, tahna leh nuihna ruai kil turin HRINGNUN SANA hian kan khawvel zin kawng bul min tan tira.

Kan Lal Isua zirtir zah zet thla bi kan chhiar zawh meuh chuan, ni leh thla te kan nguihban a, kumpui a tawpa, a linglet thawk a, kumthar a rawn inher chhuak leh thin. Hetiang reng reng hian lei miten hun leh ni kan chhiar kumhlun a ni ber mai. Kan hlim ni leh kan lungngaih ni rawn inher thin mahse, he HRINGNUN SANA hi tlai hlauvin a hmanhmawh hran lova, hma hlauvin a muangchang heklo. HRINGNUN SANA hi mahni duh dana herh hma leh herh tlai chi a ni mawlh hek silo.

Hawilopar tawna, rihsang mual kan liam hma chuan kan duh emaw, duhlo emaw, mitinin HRINGNUN SANA hi kan bun atul dawn si a. HRINGNUN SANA pakhat chiah siam anih avangin kan hringnun sana mila kan khawsak thiam leh thiam loh ah kan hma khua a eng in a thim mai dawn a lo ni. Hringnun luikam kan pelh hun chuan Siamtu chuan he kan lei HRINGNUN SANA hi min phelh sak anga, Siamtu hmaah lei sanna kan bun laia kan chanchin ziahna lehkhabu release a ni ang.

HRINGNUN SANA buntu zawng zawng ten rorelna kan hmachhawn ang a, hlim taka chatuan a Amah faktu tur leh hremna hmachhawntu tur te he leia kan thil tih ang zelin min then hrang ang a, kan HRINGNUN SANA hi chatuan in kan hnuchhawn tawh ang. Eng hunah pawh kan HRINGNUN SANA phelh tura inpeih chung leh rei tak hringnun sanabun zel tura beiseina thar nen HRINGNUN SANA second tin te hi uluk takin hmangzel ang u.

Tunah hian kan HRINGNUN SANA ah dar engzat nge a ni ang le? Siamtu chauhvin a hre si a.