-Er.Chhungpuia Renthlei
Hlawhtling tura eizawnna leh zirna peng hrang hranga kaldan tur thlan hi kawppui thlan ang deuh a nia, thlan fuh chuan kan that pui a, thlan sual erawh chuan kan chhiat pui thung si. I thenawm pa vitamin ei ang kha i ngeih ve kher lo an tih ang deuhvin mi te that pui ang hi kan thatpui ve kherlo theih avangin kan tui zawng, kan mize mipui leh chhungkaw dinhmun thleng ngaihtuaha fimkhur taka thlan thiam a tul.
“Eng thil pawh ti ila, hmathlir (vision) tha tak tellova hlawhtlin hi a nung chunga chengkawl bial kher chhuah tum tluk zetin harsa “ an tih hi a dik hle mai. Kan tui zawng, kan mize milpui leh chhungkaw dinhmun thleng ngaihtuaha vision tha tak nei chunga fimkhur taka career thlan thiam atul. Information Technology ah thil thar a lo chhuak zela, hmun hla tak tak a mite nen pawh thenawm hnaivai ang maia kan ti ti theihna, (Global Village) hial Social media hmanga neih takah chuan kohhranah pawh Sual sim aiin Dual SIM a lar zawk ta hial mai.
Kan CM tawngkam takin, Internet leh Social media te hi finna tuizem, thal kang theih loh khawpa tam, lehlama khawh lut zur zur, lehlama khawh chhuak zur zur ang a hi a ni ringawt mai ! IT hmasawnna haka tlu chhe ta mai pawh kan awm ta nual mai. IT hmasawnna dan tum chu chho zawnga tui hleuh ang hlauh a ni mai si. Heng hmasawnna te hi kan career chil thluk tir lovin, phurh kal tir zawk turin hmang mawlh ang u.
Kan hnathawh leh Zirna tibuai thei khawtlang & kohhran activities hrang hrangah telna tur atam hle. Mizo society ah chuan kutsil san ngawt theih loh tluk a ni. Hlawhtlinna kawnga kan nih phak tur ni phalo a, khawtlang & kohhrana kan nih phak loh tur ni pha hial khawpa actvitities hrang hranga kan inhmang si te hi hlawhchhamna hlawhtling a tihloh theih loh! Heivang hian competition hrang hrangah kan hlawhchham thin. Hlawhtling tlaka taima vai, chakma leh tuikuk han tling dek dek se, Palm Sunday tuka tumkau nena “Hosana” ti a Biak In pana kawng zawh hnam ten “Bang rawhse” tiin CM bungalow panin kawng kan zawh leh si thin. Hlawhtlin kan tum dan hi a nung chunga vanram kai tum ang maia beidawn thlak a ni.
Mobile, Internet Social media leh khawtlang & kohhran Activities te hi Sap zu tha mi ang deuh a ni a, kan thatpuina tur tawk chiah a kan hman thiam chuan hlawhtlinna hmanraw hriam ber , a tangkai zawnga kan hman loh erawh chuan career chhiatpui vek theihna "Career killer"ani. Hlawhtlin kan duh tak meuh anih chuan activities hrang hrangah inhman dan chin tawk hriat angai. TFT (Tawi Fel Tak) a sawi chuan, zirlai tan khawtlang & kohhran Activities a zirna tibahlah thei khawpa chanvo pawimawh chelh loh a him ber.
Khawvelah hian mi vannei bik te chu awm thin mahse, vanneihna ringawt hmanga hlawhtlinna hi neih ngawt theih a nilo. Taima taka thawh chhuah tur zawk. Khawvela mi hlawhtling ber ber te zingah hian talent neih that em vang leh thiam em vanga hlawhtling ai chuan an tum ruh em vang leh hlawhtling tlaka an taimak avanga hlawhtling an tam zawk tlat. Tumruhna, Taimakna, leh Thuawihna hi hlawhtlinna formula laimu, Pa leh Fapa leh Thlarau thianghlim tluk zeta pawimawh, then hran theih loh khawpa kalkawp tlat a ni.
Thuawihna leh Thawhrimna tellovin hlawhtlinna tluantling a awm ngai lo. Thawk silova 'hlawhtlinna' awmna hmun awm chhun chu Dictionary-ah chauh a ni. Thawhrimna tel si lova hlawhtlin tum chu pial tlepa liluh tum ang a ni. Hlawhtlinna kawng hi kawng awlsam ni lo mahse, Harsatna kan paltlang hnem poh leh a tawpa hlawhtlinna hi a ropui thin. Hlawhtlinna tura kan beih eng pawh hi inthununna tha tak nena Tumruhna, Taimakna, leh Thuawihna nena kan bei a nih ngat chuan Pathianin mal min sawm anga, kan hlawhtling ngei ngei ang. Hei hi HLAWHTLINNA KAWNG ka tih ve chu a ni e.
No comments:
Post a Comment