YAMAHA bike khalhtu T-Shirt dum leh Jeans kekawr ha in mi te lehpelh tuma chak deuh maia a tlan chu Pa vengva tak pakhat chuan abula scooty sen khalhtu, sam sei tak hnungzang thlenga uai thla hnap mai hnenah chuan ,”Saw lai tlangval chu aw !, ava hmanhmawh bik awm em em ve le, tu fapa nge ni ang aw ?” a han ti a. A rin loh tak mai a “Ka fanu a nih saw “a lo tih vang a mak ti hmel pu tak chungin “Tlangval emaw ka ti a, Ka tih palh lutuk, A nu ilo ni reng ani maw ?“ a ti a.“A nu ka nilo ,a pa zawk ka nia“ a han ti leh zet chu, mak ati lutuk hmel kha han pu hlen se chu nupui zawnpui a huphurh awm ve ngawt ang le!
Ni e, kan incheina leh kan awmdan hian hmuh dan dik lo in kan bul vela mite kan in hmuh tir theih mai bakah,thil dik kan hmuh theihna tur kan mit ngei hian thil dik min hmuh dik tir lo fo thin.Kohhran huang chhungah ngei pawh hian kan inhmu fuh thei meuh ta lo.
Kan khawtlang nun inthlak thleng thut thut hian kan kristianna hi a chelh ding zo lo mai ang tih hlauhawm khawpin kan inrin hma hian inthlakthleng (social transformation & social change) hi a awm zel a. Chu chuan ngaihhlut zawng leh ngaihsan zawng a sawi danglam thut thut thin. Kan zoram khawvel thlir hian thalaite zingah mai ni lo, nu leh pa, naupang te chenin kan mit tihdelin a awm phah ta a nih hi.
Mit fiah lo ten an hmuh fiah theih nan tarmit an bun thin ang hian Kohhran rawngbawlna peng hrang hrang hmu fiah thei lo a sawisel thin te leh Pathian ram aia kohhran ram zauh tum tlat te pawh hian rinna tarmit, thlarau thianghlim pawlna kan neih chuan kan hmufiah uarh ngei ang le.
Kohhranah kalphungah tha lo a awm a nih chuan Pathian Kohhran a ni a, kohhran mipui kaltlangin Pathian vekin a siamtha thin. Hei hi kan hriat fuh loh avangin Kohhran ramchhungah hruaituten pal puah bomb an kam teuh emaw ti a, a lo aluat a meng fiah te em em te,committee na ah tawng puah bomb hmuam ang hrim a ngaihdan pawh sawichhuak ngam lo a tawng hunah pawh ngai tlat mai te kan awm thin. Pawi sawi kan hlauh avang pawh a ni a nge. Kan mihring pui pawi sawi aiin Pathian pawisawi a hlauhawm tih hria ila, zalen takin rilru thianghlim takin kan ngaihdan kan sawi tur a ni zawk.
Pathian hian mi tupawh mai hi pianphung, hriselna, finna leh thiamna tha tak nen tumah duhsak bik nei lovin min siam vek a, Kan chhia leh tha hriatna hmanga kan kan nun kan hman theih nan zalenna min pe vek bawk.Hetihlai hian Kan chanvo leh mawhphurna min petu PATHIAN aiin hmasawn kan duh lutuk a kan duh dan leh tui zawng kan dah pawimawh zawk fothin. Pathian min siamdan phung baka kal chhoh tumtu chu vangtlang chunglam pawh nise Pathianin a duan chhuah aia hniamah kan tla leh thin.
Kan boruak tawn chi hrang hrang te hi, Kristaa ‘nun tak’ nei tute nun dan tur nena in mil hauh lo ava tam teh reng em? Tun lai bawnghnute tui pawlh loh, ‘Pani’ erawh an pawlh ruk hram ang deuh hian, Isua Kristaa siam danglam tawh inti te nun hian pawlh daltu a va nei nasa em ve aw.
Tih tak zeta Isua nun nghahchhan atana hmanna hi ‘NUN TAK’ chu a lo ni e. Social activities kan ngah tial tiala, kan hun neihin a daih ta meuh lo.Chhhungkua leh kan eizawnna ngaihthah hial khawpa in hman ral thak theihna a ni. Hna kan ngah a kan buai poh leh Pathian hnena tawngtai tam a pawiimawh leh zual tih hi kan hriat a tul.
Kohhran hi thlarau lama inchhemalhtawn tura duan a ni tih hrerengin NUN TAK nei zel turin kohhran rawngbawlna tan hun pek hi kan mawhphurhna a ni.Thinlung taka Pathian kan biaka, kohhran dah pawimawh a, mahni theih phak ang zela kohhran kaltlanga Pathian rawngbawl kan bawl chuan, NUN TAK chhungril lamah chhem alh in a awm reng a nga, pawnlam lang thei ah mawina tinrengnen a alh chhuak ngei ang.
No comments:
Post a Comment