WELCOME TO CHHUNGPUIA RENTHLEI BLOG

NSQF  mawlh hi

Er.Chhungpuia Renthlei 

Certificate in anglo a va tam ve?

Sorkar Approve ani em?

Hna dil nan pawm a ni em?

A tlukpui thiamna enge ni?

Entry qualification enge ni ang?

Enge zir zawm theih tur?

Sorkar funding in a zir theih em?

Heng a chunga mite hi hman atanga vawiin thlenga hna dilna hrang hranga Computer Certificate  leh skill development courses Certificate  chungchanga zawhna chhan sen loh kan neih a ni.University leh Technical Education  hnuaia Qualification  (MA,BA, BE, MBBS .e.t.c) te hi chu awlsam takin a hriatthiam theih mai a. Hetihlai hian Skill Development Agency (NSDA) hnuaiah skill development courses hrang hrang a awm teuh mai si. Heng te hi thalai hnazawng mek te tan sorkar hna mai bakah entrepreneur development lamah ngat phei chuan eizawnna siam saktu pawimawh tak a ni. Heng course  hlutna leh a tlukpui thiamna te hi hriat a tul hle.

NSQF hi enge ni?

NSQF lampum chu National Skills Qualifications Framework a ni.Ram pum huapa skill development courses (formal leh none formal) zir ten an zir zawh hnua hriatzauna (Knowledge), thiamna(Skill) leh hnathawk tura theihna (Aptitude) an neih theih tur a zira quality tehna ruhrel(Framework) a ni.NSQF zulzuia courses siam te hi NSQF Courses tiin an vuah. He Framework hi Skill Development Agency (NSDA) ten an buaipui a, National Skills Qualifications Committee (NSQC) kaltlanga hman a ni.

Tichuan, NSQF chu (Knowledge), thiamna(Skill) leh hnathawk tura theihna (Aptitude) hmanga skill development courses hrang hrang quality Assurance pawimawh tak a ni ti ila kan hrethiam mai tawh awm e.

Tunah hian Sorkar laipui chuan NSQF hmang hian India ram chhunga Vocational education, vocational training, general education leh technical education zirna hrang hrang te hi knowledge, skills and aptitude awmze nei takin level hrang hrangah a thliar hrang deuh vek tawh a, zir zel duh tan course sang zawk zir theihna tur emaw, a kaihhnawih course dang an zir theihna tur zirna kawng hrang hrang a ruahman vek bawk.

NSQF Level hrang hrang chu enge ni?

Level hrang hrang ( L1, L2, L3... L10) a awm. Level 1 hi a hniam ber a, Level 10 hi a sang ber. Course rei zawng atang ringawta Level hi siam a nilo a, Course harsat zawng, san zawng  leh zir zawh hnua an thiam tur a zirin Level hrang hrangah ah then a ni.  

NSQF Level Proposed Academic equivalence :

Level 1-4  School(10 or 10+2) level education

Level  5 Diploma

Level -6 Advance Diploma

Level 7 Graduation

Level 8 Honours at Under-Graduate level

Level 9  Master

Level 10 Doctoral

NSQF hi engtik atangin nge India ramah hman a nih?

27th December 2013 khan India ramah NSQF hi kan hmang tan.NSQF hmang tura noticifation chhuah ni atanga kum 5 na (27.12.2018) atang khan SQF nena in mila training /educational programmes/courses zawng zawng siam rem ngei ngei tawh tur a nih vangin India sorkar hnuaia zirna in leh Central sorkar hnuai PSU zawng zawng ten NSQF Level hmang hian  eligibiulty criteria an siam vek tur a ni bawk. Tin, Sorkar funding  zirna  ang chi reng reng hi NSQF a ni vek tur a nih avangin NSQF nilo course dang hrim hrimah sorkar funding pek theih a nilo. State sorkar leh PSUte pawhin hna lakna (recruitment rules) ah NSQF hmang zel tura tih a ni.

NSQF hi enge a tangkaina?

1.     Zirna pangngai leh Vocational Education zir ten an zir zawm theih zel tur bithliahna  ruhrel(Framework)  a ni.

2.     Hna zawnna kawngah criteria felfai zawka bithliah theihna a ni.

3.     Ram pum huapa course hrang hrang  san dan awmze nei taka tehfung tangkai tak a ni.

4.     Ram chhung leh foreign a thawk duh te tan awlsam zawka an thiamna tehfung a ni.

5.     NOS/QP approval kaltlanga Skill development course zirna a ni

Skill development courses Certificates te hi hnazawnnaah a pawimawh em em a, hna zawnna atana supporting documents zinga pawimawh ber zinga mi an ni.Mahni pianpui finna lam hawia hnazawnna  leh  hun leh sum tam tak sen ngailova College /University  kal lova zir theih anih avangin kum tin mi tam takin an chhuak thin. Anihna takah chuan ram chhung development  project work tam ber khawihtu te hi skill development courses zirchhuak te an ni.

Aw le, NSQF aligned courses hi hna zawng mek te leh sorkar hnathawk a bikin hnalakna buaipuitute hian  uluk takin zir chiang zel ila a duhawm hle mai. Computer thiamna kaihhnawih ah ngat phei chuan hna hrang hrang dilnaah Computer Certificate a ngaih zel tawh avang hian  NSQF Courses hi  sorkar pawh hian ngai pawimawh chho zel se, hnalakna kawngah  nasa takin kan awlsam phah ngeiin a rinawm.