WELCOME TO CHHUNGPUIA RENTHLEI BLOG

MIZORAM CABLE TELEVISION LEH REALITY SHOW

Er. Chhungpuia Renthlei

Aw le, kum 1992 chho atangin keini mizo te pawhin STAR TV kan hmelhriat tan anih kha. Tichuan,Television lamah hma kan sawn chho zel a, TV zuartu ten phailama mi  sang tel meuh an la chhova, phung zinga piring vawrh ang maiin reilo teah kan inchuh zo duak duak a, chhungkaw hausa ber  leh BPL chhungkaw sitting room thlengin TV kan hung  vek a ni ber mai. Tichuan, mahni inlum atangin khawvel zau zawka Television Show chi hrang hrang Movies, sports, Musics leh entertainment kan thlir ve zel a, Reality show-ah phei chuan keini Mizo thalaite chuan American Idol leh Indian Idol hi kan tuipui leh hmelhriat ber pawl tak an ni chho ta anih hi. Hetianga mipui ten kan tuipui hi Television lama sumdawnna khawvelah chuan haider chi rual ni heklo le, mizorama Television Cable Operators LPS leh ZONET te chuan Television  program kaltlangin music Icon/Idol Series program an buatsaih ve ta thuai a, mipuiin kan hlutpui hle a ni ang, vawiin thlengin an chhunzawm zel ta anih hi. Tunlaia hlawhtling taka Idol Series kalpui mek ZONET ten MIZO  IDOL ti a a hming an phuah laiin  LPS chuan MIZO ICON an ti thung. ICON emaw IDOL emaw pawh ni se, an tum chu Television program kaltlanga zaithiam inthup  talent phochhuaka, music lama thalaite career siam sak anih miau avang hian an  thuhmun reng a ni kan ti lo thei lovang.

            IDOL leh ICON   organiser ZONET leh LPS , contestants, Judges leh Musician te hi  an fakawm khawpin ka hria, an thawkrima, an haha, an hlawkpui bawk a, keini mipui, abik takin thalai  te pawhin kan hlimpui tak zet niin alang. A bik takin contestants te hian sumdawng, Vengchhung leh mi mal thahnem ngai te hnen atangin  chawimawina leh  thil pek an dawng te hi  a mizo a,  an lawmpui awm khawp mai. Tin, Vengchhung leh khawtlang  min ti lungrual  te hi   a lawmawm hle mai bawk.Hetiang reality show laia   endiktu ten contestant    an fakselna  tawngkam leh music lama thu bengvar thlak tak tak ( music terms)  tarlang te hi contestants mai bakah thlirtu te tan a bengvarthlak thin hle mai.

            Ka vei tak em em pakhat chu sponsorship leh lawmman hi a ni. Sorkar program leh NGOs program hrang hrangah zai  hi kan telh deuh vek sia, Mizoram chhunga sumdawng lian te, mihausa te leh sorkar hian kan thalaite career siamna pawimawh tak ani tih hrerenga theih ang tawka tun aia nasa a sum leh paia kan tanpui hi a tul khawp mai. A buatsaihtu te lam chuan sum hlawm lian tak an pe thei bik hauh lo ang tih chu hriatsa a nih avangin INDIAN IDOL thlenga mizo te phochhuah kan nih theih nan tun aia thahnemngaia kan tanrual a tul hle awm e. State dang te leh rampum huapa  IDOL/ ICON ten Cash award maktaduai tel leh eizawnna tlak contracts an hlawhchhuah laia eizawnna tlak ni si lova,Television Cable tihdarhzau nan ringawta zirna tibuai tawk leka program kan huaihawt fo chuan kan thatpuina lam aiin kan chhiatpuina a tam zawk ngei ang.

Television leh Mipui hma a langsar taka an zai fo avang hian a pawng ataka simple living  han tih ngawt chi a ni si lova,  sumdawng thenkhat ten an dawr tihlar nana  phal taka Pawisa  leh thuam thil tihtham vak ni silo an han pek ngawt te hian fur khat pawh an mamawh a phuhruk silo. Television leh Mipui hma a langsar taka an zai fo avang hian IDOL/ ICON top 5 chin te phei hi chu mipui ten an nitin che zia kan thlir tawh thina, chhungkaw harsa tak pawh nise, chhungkaw pangngai ang maia incheina, transportation leh khawsaknaah mi pangngai aia sang hreta awm an tum lo thei silo te hi an nu leh pa te tan chuan harsatna a tling ngei thin ang le. Engpawh ti dawn ila,  tha leh zung, sum leh pai kan sen angaia, tunlaiah phei chuan engkim mai hi a thlawn ngawta neih theih a ni si lova, .Nu leh pa tan pawh buaipui tham leh thatpui tham anih theih nan   IDOl / ICON  hlawhtlinna tura  rim taka beitu, House band ( musician) leh contestants te tan pawha  hlawkpuina tur khawp lawmman tha tawk tak kan buatsaih sak theih hi a pawimawh hle mai.

Rampum huap law law in MIZORAM IDOL /ICON  hi ZONET /LPS  kaltlangin hunbi fel tak neiin kumkhat / kumhnih dan angah te buatsaih ni thei se, Top 10 chin tal te hi chu Youth Service ,Social Welfare, Art & Culture leh YMA te hian eizawnna tlak khawp lawmman siam sak ta ila, Top 3 te phei hi chu  incentive  stipends  kum khat chhung vel thlatin  dawng ve ta se, Tin, an qualification phutawk  contract leh sorkar hna te siam siak ila, nu leh pa leh thalaite  kan va phur leh zual dawn em ve aw.Tin, Hetiang kan titheilo anih pawhin  ZONET /LPS te hian top 10 chin a an zai te hi chu Audio /Video Album leh IDOL/ ICON  magazine te siam ta se, rampumah thehdarh ni se, a boruak lai na na chuan hralh a tla viau mai thei. contestant te vawrh lar nan leh sumhmuh nan mai bakah Mizoram mipui te tan pawh IDOL/ ICON  Record tha tak a ni thei ngei ang.

Engle khawle, kan ram economics  a la hniam em mai sia, heng kan sawi te hi chu nak tip nak thai lamah te chuan a la thleng em em ang tih ring phawt mai teh ang. "Television lama hmasawnna rahbi thar tha tak  IDOl / ICON  hlawhtlinna tura  rim taka beitu, ZONET/ LPS, Judges zahawm tak te, House band ( musician) thiam tak te leh contestants chhuanawm tak tak te duhsakna sang ber  ka hlan a che u" tiin a tawpna khar tawh mai ang aw.