WELCOME TO CHHUNGPUIA RENTHLEI BLOG

COMPUTER  SEX VIDEO.  
Er. Chhungpuia Renthlei

Zan danga ka tih loh dan ni chuang hauh lovin, hman zan chu nula inleng nei ngai lovin  inleng an neih thut zana chhuanlam a  TV Channel hrang hrang  an hmet kual zung zung  ang maiin,  Isua  zirtir zah zet  channel hrang hrang  ka  hmeh lawr   dun dun hnuah chuan TV ka off ve thei hram a. Zawlnei Daniala anga  Jerusalem  hawizawng a tukverh  hawn  ka tum mek laiin,   Jerusalem awmna zawn tak ka hriat loh avang ni lovin,   Jerusalem chu sawi loh, Aizawl Bethlehem veng  lam hawi zawng tak ngial pawh   a awm loh avangin   zemabawk   hawizawngin  tukverh ka hawng sauh sauhva,   Kan Lalpa grep huan  Celebreties leh  Kaisara Celebreties zinga  Computer bawng ek rappherh te chanchin, THE AIZAWL POST  leh LELTE chanchinbu  a inziak   chu uluk deuhvin  ka chhiar  ta zawka.  “Ngaihdan atam, pawm dan lah  atam,  keimah mai chuan kal ngaihna ka hre lo “ tih ang mai, ngaihdan leh  pawm dan  a tam hle in,  mi hrang hrang  sawm rual vel lek  zingah pawh ngaihdan sawmthum vel lai awmin ka lo hre leh pek  a!  Computer bawng ek rappherh te zingah  laina leh thian tha em em ka neih lo bawk a,  huaisen leh  zalen takin, felfai deuh nuaih leh tawifel  duahin Computer sex video chungchanga ka rilru a awm  te  kan Christmass thingphur keuh ve  dawp dawp teh ang .

A hmasain Computer hi kan mizo mimal nun, quality leh rilru sukthlek  lantirtu, darthlalang pawimawh tak a ni ti ta ila dawt sawi vanga kohhranin min phuar ka ring lo mai nilovin bialtu upa hawizau te chuan  lawmna chibai min buk hial zawka ka rin thu kan sawi phawt teh ang. Ringtu inti, berambo zawnga fehchhuak te, mizo thalaite entawn tura  rimawi khawvela kan pangpar te, kan sorkar hotu te  leh  ram hruaitu hrang hrang te nihna tak tak  phochhuaktu chu   “An computer ngei mai hi  a lo ni “ .Hun pumpui pea Pathian  rawngbawltu Pastor, speaker, counselor, zaipawl leh  kohhran rawngbawlna peng hranga rawngbawlna chelhtu  te computer a thil awm zawng zawng te hi Biak inah BIG SCREEN   ngei maiin  kohhran mipuiin en ta ila, piangthar engzat tak awm ang maw ?  Kohhran thurina telh tlak,  thlarau nun min chawm thei khawpa thlamuanna thu engzatnge awm ang ? Kan thalai hrang hrang te Computer hi kawtthler lun laiah  lepse ta ila,  vengchhung mipui te tana Big screen meuhva  ngaisang taka en zui zel tlak te, sumdawngtu te leh mihausa thil phal ten sum leh paia an  tanpui duh tur, function pawimawh  apianga  Hunserh  leh  Lal tawngtaina  kan hun khar  inkarah   zaia min awi tura  sawm tlak  engzat tak awm ang maw?  Sex video  leak out loh vanga la hming tha ta hram hram, tuna kan hmuh leh kan hriat aia che nasa engzat tak awm ang maw ? Pathian hian Computer Judgement day  rawn nei ta rup mai se, Beram pu tha, beram tha ang taka lang te  hi kelpui hur leh kelpa hur an lo ni fur mai lovang maw ? Kan  computer check turin tun atanga  darkar khatah hian  Pathian lokal dawn ta se enge kan tih ang le ? Ka unau !

        Tunlai zoram dungleh vangah  rawngbawltute  leh kan zaithiam milar hrang hrang te computer vanga an hmingchhiatna  ti ti  a len nasat hle laiin kei chuan  han sawi vak tur ka hre hlek lo mai.  Jerusalem lam hawi tuk verh awm miah lohna pindan, Zawlnei Daniala tawngtai pindan aia fianrial leh nuam zawkah,  Sodom leh Comora  mi hurherh ho taksa chetna changin UPC kohhran zawlzai tluk zeta a rei,hmeichhe chhul lak  loh leh mipa til reh loh, chak leh chak an han in pangpui zial   takah chuan, Ngai teh, thukna pui a lo keh sawm ta rup maia, Eden huan , oh ka tihsual ! hmeichhe huan  laia thei kha a lo rah hmin ta a, mipa chil a puta,  chu  thei hmin chu a chhuk lawh ta a,  an pahnihin an ei ta bawrh bawrh a ni ber mai. Tuma hriat loh tur leh Pathian chauhvin hriat leh hmuh tur, Rorelna ni a Pathianin  Mizoram mipui mai nilo, khawvel mipui hmaa a puanzar tur kha, Camera hmangin  thla an  han la khere khera Tin, heti hi a nia,  an thil tih te chu Master of  Ceremony  atana Pu C Dina  sawm hran ngai hauh lovin Pathian chuan  A Release ta a ,  Computer khawvelah  puanzar a lo ni ta. 

An duh a, sex an hmanga, an ngama, computer camera in thla an la a, mualphona meipui anmahni chhem alh ngei maiah, an la inhal kang zuia, an kang duh nasa kung kung mai si a le,  zoram mai pawh nilo, khawvel hmun hrang hranga mizo te zingah mualphona mei  chu lo alh ta in, keini he lui kama thu te thleng thleng pawhin chu meipui chu kan lo ai ve  a ni   ber mai. Anmahni ngei kha a lawm, Pornography/ Cyber Criminal bulpui chu. Setana zanriah Sakrament kiltu Anmahni leh an thurualpui bak tu te nge han dem tur le? An mahni khan an mahni duhthlanna ngeiin Anmahni an intihmingchhia a ni mai. Heng  mualphona ramhuai, zoram dung leh vanga  darh mek te hi, midang hminga hnawhbo  chi a ni mawlh hian a lang lo. Thilsual tih tawh  hnua midang dem kan la tum tlat thin hi  a buaithlak  thin.

Thlalera Mosia in Dar rul a khaikan laia en duh loh vanga  maimichhing tlat  zinga mi te ang kha  kan ni mawlh si lo, Zakaia ang zawkin  theipui kung a lawn meuhvin Computer nei zo ve lo te pawhin heng kan rawngbawltu te leh  thalai te entawn atana kan thlanchhuah te hi kan “ransa inpawl “ en huai huai a ni ber mai. Kan Pathian pawh hian  mi thenkhat  hurherh avang ngawtin an thlalak lo kawltu te nazawng hi  vanram kawngkhar a khar hnan ka ring thei mawlh lo a ni. Euvi leh Adama te, Davida leh Uria nupui chesual chanchin pawh khawvel pumpuiah a darh huai huaia, A film hial te an siam a, tun thlengin tawng tinrengin  Bible Society of india chuan an letling chur chur anih ber hi.  

Women Protection Act, 1986   ah leh   Khawvel ram changchang zawkah phei chuan phalna neilova sex video siam te, Computer a hmeichhe saruak leh mipa nena in pawl lai thehdarh phei chu hremna a sang hle. Phalna nei lova ralthuam kawl ru pawh thilsual anih angin   leak out miah lo mahse, sex video electronics media a an siam hrim hrim hi cyber crime mai piahlam, Pathian mithmuhah hlei hlei thilsual lian tak a ni. China leh Japan sorkar phei chu Computer a sex video lo siam leh sex lam hawi SMS chungchangah an thikthu a chhe hle. Tu te pawh nise, an man hmiah hmiah zel. Sex an hmangtu leh thla la tu awm lo se , leak out tur a awm lovang , Mahni sex hmanglai ngei  computer camera hmang latu te leh an thurualpui te hi   Pornography/ Cyber Criminal Defamation/ Intimidation Case    292/500 IPC R/W 67/72 IT Act 2000 R/W section 6 of indecent representation of Women Protection Act, 1986 leh Section 501(b)/509 IPC r/w 67/72 IT Act 2000 hmang hian kan sorkar hian computer hmanga setana rawngbawltute hi kar phawng  se,  phoro se  kan sim mahna le. 

Sex video avanga   thil awmzia an hriat avanga, computer sex video lama  mi tam zawk te muhil an harh tawh hnu,  Kum 2009 meuh kan thlen tawh hnu pawha Computer camera  a  mahni sex video thla an la duh fo erawh hi chu,  a mak ka tiin ka mak ti hmel hi pu hlen  ta vur vur reng ila chu nupui hmu lova len tar a harsa lo ngawt ang. Chhuan lo awm leh zel tur thang leh thar te thlenga  Mizoram Computer history ah reh leh ngai tawh lo turin,  Computer Sex video hian min ti hmingchhe thei tih  kan hre reng tur a ni.  Vengchhung mipui te, chhung leh khat leh  mimal nun zahawmna  tibawrhbang   tura khawsak hi sim hmiah a hun tawh nak a laia, Computer Camera hmanga  thla kan la han la fo mai te hi chu,   Thlalak kan lawm mah mah lo maw ka ti deuh ! Sex hmang bawk, mahni thla la bawk,  Kaisara saihlum pakhata   Setana sava pahnih perhtlak angah ka ngai mai.

  Hetianga sodom leh comora mi hurherh anga khawsa thin te hian  kan rawngbawlpui te, kan zaithiam  leh  rawngbawltu mizo hmechhia te kan  tibawrhbang tih kan hre reng tur a ni. Hnam dangin kan hmeichhia an zuam phahin pawngsual hial an tawkin kan mizo politicians ngei te pawhin  kan Celebreties zahawm tak tak te   keuh thluk theih mai anga ngaiin an hmu khaw lo mek a nih hi.  Hmingchhiat hi  a harlo in, hun pawh a duh rei lo hle,   mipui te thinlung atanga kan hmingchhiatna  thaibo tur leh kan zahawmna neih let leh erawh chu  a harsain  hun pawh a duh rei hle a thung. Hawh u kan rawngbawltu, Celebreties leh  mizo nula leh tlangval te hian  kan zahawmna venghim zel turin  Computer communication  leh electronics media lamah  bawng ek  rap pherh tawh lo hram ang u.