WELCOME TO CHHUNGPUIA RENTHLEI BLOG

KHUANGCHAWI THLA  

Er. Chhungpuia Renthlei.

Khuanu remruat a ni miau mai si a le, Tuma dan rual ni hek suh. Nitinin Leilung danin khawchhak lama atangin  ni a rawn  chhuak a, khawthlang lamah a tla leh a. Zan lamah ni se, nula fel leh thu awih ber  ang zia zangin  rinawm takin  a hun takah thla pawh  a rawn  a de a, a bial a, a mang leh thin. Chawlh zai rel hauh lova hetianga  vawi duailo  hun a inher takah chuan hei le,  kum 2017 khuangchawi thla (October) meuh pawh kan lo chuang chhuak leh ta reng mai chu anih hi  ! 

Ni e,  Khuangchawi thla(October)  a rawn inherchhuah meuh hi  chuan khaw dur khup khup leh khawpui ri a kiang a, vanlam han thlir ila van boruak pawh a thiang dumpawl ruih ta mai . Zing ni chhuak hliah thintu chhum chhah tak tak pawhin kianzai a rel a, thlalak ngaina mi tan pawh mahni rau rau a kan lan that ve hun lai tak a  ni ngei ang le! Tin, kan tawngtai chhanna  tura khuanu ruat a ni chek ang chu, kohhran hruaitu leh keini mi naran te pawhin kan   tawngtaina a kan chham lar em em "zing ni chhuak eng mawi tak" pawh khuangchawi thla ah meuh chuan kan hmu ve leh thei thin. Hetiang hunah  hi chuan  furpui a liam a, fur khawchhe kara chaw zawng hlei thei lova tawmim sava leh ramsa te pawh khaw thiang  eng mawi tak lawmin hlim takin vanlai zawl ah an tualchai a.

Zan lam ni se,  boruak a vawt deuh vur tawh a, kawr lum hak chhuahna tham  erawh ala ni si lo. Nula leh tlangval  Pang ti luma in ur lum tawn nawm hun lai tak a ni.  Van lam han thlir ila, a hliahtu tur chhum rang awm hauh lo vanga intithei fahranin thla a lo eng paw heu mai a. A bul hnaia arsite pawhin chu chhawrthlapui chu an zah a ni ang, an eng tha ve ngam lova, an awm ve tih hriat chang changin an de set set a;  "zan lalnu" nihna hi a lo khum zo thin ber mai !  Chhawrthlapui a en viau chang hi chuan eng ti lo mah ila kan enge maw ti deuh tlat thin! Pi leh pu hunlai ata tawh thlahleinga zan hi chuan zofate thinlungah engemaw riau a awm tir thin Hei vang  hi a ni ange Thla eng hian mizo culture leh literature ah  hman atanga  tun thleng an hmun pawimawh tak a lo luah thin ni.

Thla en zana mahni chauhva pawnlera han din vang vang hi chuan, NLUP dawn leh dawng lo te, thlawhna chuang tawh leh la chuang lo te pawh  nun hlui ngaiin suangtuahna a kal ding leh vung vung fo thin anih hi! Lunglen lam aia lungden  tuipui tlat hmelpu thianpa Pu TPa  te meuh pawhin  khuangchawi  thla hi eng ang fakauva   special bik riau nge  a nih le  ti a  chal dawm a,” aw, aw, aw  alo nih tak hi maw…”  an lo  ti ve  vawng vawng anih pawhin mak thlir in thlir hauh suh u!

Aw le, kumin 2017 October ah pawh hianhman a miten  Khuangchawi thla thla eng an hmuh ang bawk kha  a rawn eng leh ang. A  eng chu hmana mi ang mai kha a la ni a, a mawina chu chhe te pawhin a la danglam lo bawk ang.  Mahse , Kan mizo culture a inher danglam zel a, a thlirtu   hringfa te erawh  kan lo danglam ta. Chhawrthla eng pawh hman a mi te  angin kan chhawr tangkai ta si lo. Hman a miten an lawm leh  chhawr em em,Chawrthla pui meuh pawh  tuma chhawr loh vin thlangvan sang a kai  ta a ni ber mai.  Engle khaw le, kan chhawr emaw, chhawr lo emaw,  kan hma lawkah thla hlei nga zan a lo thleng leh ngei dawn si, van rang chhumin a hliap lo anih ngat  chuan lungleng thinte tan chuan thlir vawng vawng a awl leh dawn mang e.

Mizo ten hmasawnna lamtluang zawhin kan nunphung kan her danglam ve zel a, hmana awm thin te tunah a awm tawh lo va. Tuna kan hlimpui leh buaipui nasat ber ber tam zawk te hi chu tman a awm lo a ni deuh vek mai. Heivang hian  tunah chuan khuangchawi tur an awm tawh lo. Amaherawh chu Khuangchawi thla hi  nawmna leh hlutna erawh a la kiang chuang lo chu anih hi. Nupui-pasal nei turte tana hun tha leh duhawm ber a la ni tho tho mai.Thla eng lawm tawh ngat tan phei chuan, nunhlui hriatchhuah tirtu, lunghlui tileng thartu a ni ve fo ngei ang le. Lungleng mite tan inhnemna, khawharte tan thiantha, thuruk neite tan thuruk vawnpuitu a ni a, karhla dana leng inhmangaihte tan lah, van laizawl chu tuallaia chantira, suangtuahna nena chu tuallaia lendun tir theitu thian tha a ni a, a hlu em a, Chhawrthlapui an lo ti pawh hi a awm hliah hliah mai.

Aw le, hetiang  taka hlu leh tangkai, mawi leh ropui, Chhawrthlapui kan tih hial pawh khian, a mawi vanglai ber October Full Moon lai pawh hian, famkim lo mihring ang maiin, a pang pumpui chu a ti engkim thei bik hauh lo nia; eng mawi viau mahse, a pang lehlam chu a thim ve vek tho a. Mahse, a theih tawpa mawia a rawn inlan avang khian a mawi a, amahah a mawi theih lai ber, a theihna sang ber a nih miau avangin, a pang lehlam thim chu theihnghilhin, a eng mawi tak chu kan lo lawm a ni. Mihringte pawh hi, ropui viau thin mah ila, kan nunah hian mawi lo lai hi a lo awm ve reng thin a, kan famkim tak tak thei lo. Mahse, keimahni tawkah,Pathian hre chunga  kawng dik zawh tura theih tawp kan chhuah a, kan theih tawk a tha leh dik a kan awm a, chumi tura kan theihna sangber kan hlan zel chuan, kan mawina in mi a pha lo a, kan ropuinain mi a khum lo a nih pawhin kan mawina leh ropuina chu hnualsuat theih a ni hauh lovang le.