RAWNGBAWLTU LEH RAWNGBAWLNA

RAWNGBAWLTU LEH  RAWNGBAWLNA    -  Chhungpuia Renthlei

Aw le, pahmei vawkpui riltam chaw ei angin, kan thupui hap nghal bawrh bawrh teh ang.

Channa tellovin Pathian rawng a bawl theih loh a, chan ngamna phenah Pathian ropuina hi a lo lang thin. Chatuana nunna kan neih nana min chhandam avang leh malsawmna chhiarsen loha min vur avang ringawt pawh hian kan hun hlu tak pe a, lawmthu sawia Krista rawngbawl  hi  a bat a kan bat a ni tih  hi thalai ten  kan hriat a tul hle.

Hetihlai hian, Rawngbawlna  value system ah kohhran huang chhunga nihna neih a, mahni inlum chhuahsana  inhmuhkhawm leh committee ringawt kan dah len ber chuan doctor  damdawia chawhfuh lo ang maiin rawngbawltu tha kan ni lo anga, kan rawngbawlna in hma a sawn lo anga,  kan ram hi a dam thei ngai bawk lovang. Kan ram leh khawtlang,chhungkua leh Kohhran  hmasawnna  ngaihtuah hi rawngbawlna vek a ni. Kan theihna inchan vek lo mahse, mitinin thiltihtheihna kan nei.Rawngbawltu hming pu si, chhungkua, zirna leh eizawnna ngaihthah  te hi Ar vawithum a khuan hma in sim ila, rinawm leh taima takin  kan nitin hna tha takin thawk ang u.

Rawngbawltu chuan Pathian a tih thin. Pathian tihna thinlung chuan thil tha ti turin a cho chhuak thin. Kan Inkhawm leh rawngbawlna peng te hi chakna thahrui kan lakna hnar nise. Hemi piahlama rawngbawlna  tak tak, midangte tana Thlarau Thianghlim luan chhuahtir turin ke kan pen a hun tawh hle. Biak In ah ringawt rawngbawlna duhtawk  lovin, Biak In pela rawngbawl hna hi uar deuh deuh turin inzirtir  ang u.

"Thu chu hril rawh, a hunah  te, ahun loah te pawh bei zel rawh" kan Lal Isuan a tih ang hian Biakin hungpawn lam, kan chhungkua, kan nitin zirna leh kan eizawnna ah Krista model ni tura  nun pum kan hman hi Pathian huatzawng anih ka ring hauh lo. Kan thalai ringtu fel tak tak te aia Pathian hre hmel manglo te leh ramthim kan tih, tuikuk leh chakma central service hial thleng thei khawpa zirna leh eizawnna a an thleng sang ta te hi kan in enfiah atul hle.Tu huatthu ni suhse, kan sorkar hna pawimawh tam tak pawh hi "Chhimbuk" tih mai turin chhimlam mi an buk tawlh tawlh mai  anih hi. Thalai ten  zirna lamah tan la ila, kan ram hnuk vuan pha in competitive exam paltlang ila, kan rama eirukna leh hlemhletna do turin rawngbawlna zau zawk leh hlawk zawk kan nei thei ngei ang.

Rawngbawltu ropui, Wesley a chuan, Pathian tana hun pe duhlo chuan A hnen atangin malsawmna a beisei thei lovang, a ti tawp mai. Hetihlai hian,  He lei ram mi kan ni lo kan tih mek lai hian  he khual zinna khawvelah kan la cham miau si a. Biakin  Inkhawm leh kohhran huang chhunga kan rawngbawlna hian chhungkua, zirna leh nitina kan eizawnna a tihchhiat a rem lova; tin, heng kan nitin mawhphurna te hian Biakin  Inkhawm leh kohhran huang chhunga kan rawngbawlna a tihchhiat a rem bawk heklo. Pakhat zawk dah pawimawh lutukna hian pakhat zawk a tihchhiat theih avangin fimkhur taka  kalpui atul hle. Heivang hian, chhungkua, zirna leh nitin eizawnna a kan mawhphurhna te nen insu buailo leh inhne rem taka kalkawp tura hunbi mumal tak kan insiamthiam atul. Hemi hrerenga  rawngbawlna ramri kan kham phawt chuan  tisa leh thlarau ah kan tisual ngai lo ang.