Tuesday 15 December 2020

ADESTEFIDELES
(U AMA I LO FAK ANG!)

-Er. Chhungpuia Renthlei


Adeste, fideles, laeti triumphantes;
Venite, venite in Bethlehem.
Natum videte Regem angelorum.

Venite adoremus, venite adoremus,
Venite adoremus, Dominum…..


Keini mizo kristian te kut ni vang thla ropui ber leh nghahhlelh ber ni bawk, kum tina ran thisen luantir meuh a ruaipui nena kan lawm thin MASI a rawn inherchhuah apianga kan lengkhawm hla pui, "U Ama ilo fak ang" ( Ringtu zawng zawng te u) tih hla hi Latin hla (Hym) Adestefideles atanga lo piang chhuak a ni. Adestefideles tih hi English chuan come, faithful ones tihna a ni. “Ringtu rinawm te u, Lo kal rawh u” tihna a ni. Tuna kan sak dan ber hi chu mi pakhat kutchhuak leh original version ni tawh lovin, kum zabi 18 na hun laia mi hrang hrang te kutchhuak remkhawm a ni. 

Kan hriat theuh angina, he hla hi Isua pian thu Berampu ten van angel zaipawl an ngaithlak hnu a Lalthar chibai buk tura Bethlehem a an kal thu te Bible in a tarlan dan zulzuia phuah a ni a. Tunah erawh chuan a awmzia ber chu Lal piang chibai buk turin Bethlehemah kal theilo mahila, kan thinlung Bethlehem lama hawi tir a, min chhandam tura lo piang Isua Krista chawimawi leh chibai buk theuh tura min sawmna ani ber tawh mai. 

Kum 1751 khan Adeste Fideles tih thupui hmangin Latin tawnga ziah a ni. Kum zabi 18 na velah khan France hmar lama awm Douai College France ah hmuh chhuah a ni. He college hi 1561 khan din a ni a, French Revolution (1789-99) hun lai khan England ah sawn chhuah a ni nghe nghe. A tir bera Latin tawnga phuahtu hi chiang taka hriat a nilo mase, Kum zabi 18 na hun laia France ram a British Roman Catholic schoola music zirtirtu John Francis Wade (1711-86) a phuah niin an sawi. Tin, John Francis Wade-a hi college ah English musician lar tak a ni. The Adeste Fidelis Author, Dom John St├ęphan-a chhui danah chuan he hla hi 1740- 1743 khan John Francis Wade-an Latin tawnga a phuah leh a thluk (Music) pawh a siam a ni. 

Kum 1841 khan Oxford Movement laia Latin Hla (Hymns) English a letlingtu lar tak English Catholic puithiam Frederick Oakeley (1802-1880) an English in nalh takin a letling a, hei hi tunlaia English version a an sak dan ber hi a ni nghe nghe. Kum 1862 –1935 chho vel khan Rev. F.W. Savidge ( Sap upa ) khan mizotawngin a letling a, A hla thupuiah " Ringtu zawng zawngte u" tiin an dah a. hla chang tawpa "Amah ilo fak ang u" vawi thum sak nawn lai tak hi a fuh mai mai a sin. Sap ho ten “O come, let us adore Him” an tih mai mai laiin keini erawh chuan "U" hi abul ah nge a awm a tawpah tih hriat theih hauh lovin kan han thluk zet mai chu, "U Amah ilo fak ang" tiin kan sa daih bik a,a MASI bik tlat. Latin hote phei chuan “Venite adoremus, venite adoremus” an ti daih phei hi chu MASI hmel loh khawp zu nia! 

Hei mai a la ni lo, chang tin tlar tawp lama "Amah en turin Van tirhkoh te Lal hi",” Fakin awm rawh se, Pathian kan Lalber hi" tih leh "Kan tuar ai i tuar Pathian fa i ni si a!" tih atanga "Amah ilo fak ang u" tih kan sak zawm chiah lai hi a va fuh kher ve le! "U Amah ilo fak ang" tih mai bakah "Hi Amah ilo fak ang", "Si Amah ilo fak ang", ti a kan han sa dup dup mai te hian Bethlehem lamah kan ngaihtuahna min phur liam vawng vawng mai. Masi a rawn inherchhuah apiangin Biak Inah leh lenkhawmna ah kan hlimpui ber hla " U Amah ilo fak ang" tih zet hi zawng vawiin thlenga Masi ti masi tu ber a la ni zel anih hi.

KRISMAS CHIBAI VEK ULE
Venite adoremus, Dominum
O come, let us adore Him
U Amah ilo fak ang.

No comments:

Post a Comment