WELCOME TO CHHUNGPUIA RENTHLEI BLOG

Ka buai lutuk, hun ka nei lo
-Er. Chhungpuia Renthlei

 He tawngkam hi kan hriat zin pawl tak a ni ngei ang. Enge maw tih tur han sawi dek dek ila, Ka buai lutuk, hun ka nei lo tih hi kan hre leh thin.Tu te pawh hian kan tana tangkai leh tha tur ni a kan ngaih atan te leh kan duh zawng tih atan chuan hun kan pe thei vek mai. Indaih lo hle mahila kan nuam tih zawng, hmingthatna leh ngaih pawimawh tak mite tan chuan hun tlem tal kan pe thei thin.

 Kan tangkaipui tur lemloh a kan ngaih te tan erawh chuan hun awl nei mahila, hun nei theih loh hram dan kan ngaihtuah a, chhuanlam kan siam a, hun kan pe theilo thin. Indaih loh lai tak tak chu a awm teh meuh mahse, “Ka buai lutuk, hun ka nei lo” tih nazawng hi chu a nihna tak zawk ah chuan kan ngai pawimawh tawk loh vang  a ni  zawk thin. Kan ngaih pawimawh tak tak thilah chuan kan program duan lawk sa pawh kan tidanglam zawk  thin.

Mihring hi in mamawh tawn vek kan ni a, a bikin kan chenpui, unau leh chhungkhat te, thian te leh nitin eizawnna a kan thawhpui te hi kan in mamawh tawn hun a tam hle mai.Tu te pawh hian program hma chhawp kan nei vek thin. Kan buai lai tak te hi miten min mamawh hunlai a lo ni ve fo thin. Kan hunawl hnawhkhah nan chauh a midang tanpui kan tum hi a fuh chiah lo. Kan hun neih te hi kan nuam tih zawng leh kan hamthatna tur ringawt atana hmang vek lovin, a tul hunah chuan kan nuam tih loh zawng leh kan chawi belh zawk hialna tur pawh ni se midang te tana malsawmna ni tura hun kan pek a tul thin.

Hming that theihna khawtlang leh kohhran thila hun nei tak, mimal tanpui ngai ngawih ngawih te tan erawh hun nei thei reng renglo te leh khawtlang leh kohhran hnatlan huna chhuanlam siam reng thin te pawh kan awm thei awm e. Mahni hmasawnna tur thil tih nana hun in pe a taima taka hnathawk thin te hi "Mahni tan chakai an khawrh" a ni. Midang ten min mamawh viau laia mahni tan chauh a hun inpe phal te rawh chu "Mahni hmasial" a ni leh thung si.Mi dang tana Ka buai lutuk, hun ka nei lo ti fo thin te hi chu mahni hmasial takin mahni tan chakai an khawrh a ni ber mai.

Sapin "A sat laiin chhu rawh" an tih leh kan pipu ten "Sem sem dam dam ei bil thi thi" an tih hi kan hun neih sem zai thiam nan a pawimawh khawp mai. Nitina kan hun neih te hi keimahni tan leh midang tana tangkai thei ang bera hmang tura sem zai thiam hi a tul thin.Khawtlang leh mimal tana a tul huna hun pe thin te hi mi tlawmngai, bengvar leh taima an ni fo.

Midang te tanpui hi Pathian chawimawina a ni. Bible ah “I sumin Lalpa chawimawi rawh” tih  thu kan hmu. Sap thufingah.”Time is money”  tih  kan hmu bawk. Eng mi pawh ni ila, kan phur zawng leh ngaih pawimawh aia atulna avang zawka keimahni tan mai bakah midang tana hun semzai thiam hi Pathian chawimawina  duhawm ber a ni ngei ang.