WELCOME TO CHHUNGPUIA RENTHLEI BLOG

RIGHT TO FREEDOM OF SPEECH LEH IT ACTS & IPC

-Er.Chhungpuia Renthlei

India dan pui, Constitution of India,1950 Article 19 (1) (a)  chuan India khua leh tui tupawhin kan ngaimawh zawng apiang sawi  thei tura zalenna kan neih thu (Right to freedom of speech and expression)a tarlang a.He dan tlawhchhan hian vawiin thlengin Printing media leh Social media ah zalen takin thu kan sawi thin.Printing media leh Social media in nasa taka hma a sawn a thuziak, Audio, video hmanga message kan uar zel takah chuan he dan hian thatna tam tak a neih laiin harsatna thlentu lian tak a ni fo ta a.India sorkar chuan Social media a thu post khuahkhirhna dan khauh tak a siam ta a.

India ram chhunga Social media khuahkhirna dan, Information Technology Act (IT Acts 2000) chu kum 2000 khan hman tan a ni a.Social networking sites hrang hrang hmangtu te hi he dan hian min phuar vek a, dan zawmlo te chu hrem theih vek kan ni. Kum 2008 khan he dan hi siamthat(Amended) a ni a, IT Acts 2008 a rawn chhuak leh a.Vawiin thleng hian hei hi kan la hmang a, dan bawhchhia te hi IT Acts mai bakah an thil tih sual azirin Indian Penal Codes (IPC) leh hremna awm thei hrang hranga hrem an ni thin.

Hetianga IT Acts a lo awm takah chuan online-a thil post avanga man theihna dan (IT Act Section 66A) chu freedom of speech a kalh a ni tiin mitam tak chuan an sawisel nghal a, 24th March 2015 khan Supreme Court chuan IT Act-a Section 66A chu a hnawl anih kha. Hetih lai hian  Indian Penal Code (IPC) Section hmanga hrem theih tho kan nih avangin zalen takin duh duh kan sawi thei tihna a ni chuang lo tih erawh kan hriat pawimawh hle.

Hei bakah Sakhaw  tihbawrhbanna na lam reng reng kan post chuan  IPC Section 295A hmanga hrem theih kan ni. Sakhua, leh hnam bil inhuatna thlen thei reng reng IPC Section 153A hmanga hrem theih kan ni. Intih hmingchhiatna lam kan post chuan  IPC Section 499 hmang hrem theih kan ni. Midang tana hreawm leh pawi thei kan post chuan IPC Section 509 hmanga hrem theih kan ni. Midang tihlau leh mangang a siam thei kan post chuan IPC Section 506 hmanga hrem theih kan ni.Sorkar laka hel tura infuihpawrhna leh sorkar pawisawina ang chi kan post chuan IPC Section  124-A hmanga hrem theih kan ni. Heng hremna te hi  pawisa tam tak chawi tir leh lungin tan a ni. 

Social media a midang tibuai thei leh timualpho thei thu diklo kan post anih chuan IPC Section 499 &500 hmanga na taka hrem theih kan ni tih hi kan hriat a tul hle. Mizoramah ringawt pawh Electronics media ( Facebook, WhatsApp, Telegram, SMS,e,t.c) a mipui tithlabar thei, mualphona, pawisawina  e.tc ang chi post avangin mi engemaw zat  police ten an man tawh. Heivang hian Right to Freedom of Speech  a awm alawm tih vanga duh duh sawi hi dan kalh tlat ani tih kan hriat nawn fo a tul hle.

Keini mizo zingah ngei pawh Right to freedom of speech and expression chauh  la vawng a, printed leh social media hmanga thu belhchian dawllo, mipui tithlabar thei leh sorkar pawisawina  kan thehdarh nasa hle. India dan puiin klan duh zawng sawi thei tura zalenna min pek avang ringawta duh duh sawi thei kan ni chuang lo tih kan hriat a pawimawh hle. Right to freedom of speech and expression hi mipui leh ram tana thatna tura Central leh State sorkarin ruahmanna a siam zawm  hi  khua leh tui ten kan mawhphurhna leh kan tih ngei ngei tur a ni.

A bikin mipui ngaihven thil lian tak  COVID-19 chungchangah phei chuan Central sorkar a strick hle a, March 20 khan Ministry of Electronics & IT chuan Internet leh social media sites hrang hrang te hnenah  thu dik lo leh mipui tithlabar thei thil post reng reng control a, arang thei ang bera tibo turin thu a pe hial a ni. Tin, Mizoram sorkar pawhin uluk takin an enthla reng bawk. Zalenna ka nei alawm ti ringawt lova, Sorkar leh thuneitu te thu zawm chung zela social media  a pawng ataka kan thil hmuh leh hriat apiang post lovin, post tul  ngei nia kan hriat  pawh Look before you post an tih angin uluk taka chhiar leh en hnuah fimkhur taka kan thehdarh a tul tak zet e.