KHUANGCHAWI
THLA
Er.
Chhungpuia Renthlei
Nitinin
Leilung danin khawchhak lama atangin
turnipui arawn chhuaka, khawthlang lamah a tla leh a. Zan lamah nise,
rinawm takin ahun takah chhawrthlapui pawh arawn de a, abiala, amang leh
thin.Chawlh zai rel hauh lova hetianga vawi duailo a inher takah chuan heile, Khuangchawi thla (October) meuh pawh kan lo
chuang chhuak leh ta reng mai chu anih hi!
Ni e, Khuangchawi thla
arawn inherchhuah meuh hi chuan khaw dur khup khup leh khawpui ri a
kiang a, vanlam han thlir ila van boruak pawh athiang dumpawl ruih ta mai. Zing
ni chhuak hliah thintu chhum chhah tak tak pawhin kianzai arel a, thlalak
ngaina mi tan pawh mahni rau raua kan lan that ve hun lai tak a ni ngei ang le!
Tin, kan tawngtai chhanna tura khuanu
ruat ani chek ang chu, kohhran hruaitu leh keini mi naran te pawhin kan
tawngtaina a kan chham lar em em "zing ni chhuak eng mawi tak" pawh
khuangchawi thla ah meuh chuan kan hmu ve leh thei thin.
Zan lam ni se, boruak a vawt deuh vur tawha, kawrlum hak
chhuahna tham erawh ala ni silo. Nula leh tlangval tan pang ti luma in urlum
tawn nawm hun lai tak a ni.Van lam han thlir ila, a hliahtu tur chhum rang
awmloh vanga intithei fahranin chhawrthlapui a lo eng paw heu maia. A bul hnaia
arsite pawhin an zah a ni ang, an eng tha ve ngam lova, an awm ve tih hriat
chang changin an de set set a; "zan lalnu" nihna hi alo khum zo thin
ber mai!
Aw le, kumin October ah pawh hian hmana miten Khuangchawi
thla eng an hmuh ang bawk kha arawn eng leh ang. A eng chu hmana mi ang mai kha
ala ni anga, a mawina pawh chhe te pawhin ala danglamlo bawk ang. Mahse, mizo culture a inher danglam zel a, a
thlirtu hringfa te rilru pawh a danglam ta. Chhawrthlapui meuh pawh hman a mite
angin kan chhawr tangkai ta silo. Hmana miten an lawm leh chhawr em em,
Chawrthlapui meuh pawh chhawr lohvin
thlangvan sang a kai ta ani ber mai.
Mizo ten hmasawnna lamtluang zawhin kan nunphung kan her
danglam ve zel a, tunah chuan khuang chawi tur an awm tawh lo. Amaherawh chu
Khuangchawi thla nawmna leh hlutna erawh ala kiang chuanglo chu anih hi.Thla
eng lawm tawh ngat tan phei chuan, nunhlui hriatchhuah tirtu, lunghlui tileng
thartu ani ve fo ngei ang le. Nupui-pasal nei turte tana hun tha leh duhawm ber
ala ni tho tho mai.
Aw le, hetiang taka mawi leh ropui, Chhawrthlapui hial
pawh khian, a mawi vanglai ber October Full Moon lai pawh hian, famkimlo
mihring ang maiin, a pang pumpui a ti engkim thei bik hauh lo nia; Eng mawi
viau mahse, apang lehlam chu a thim ve vek tho mai. Mahse, a theih tawpa mawia
arawn inlan avang khian amawi a, amahah amawi theih lai ber, a theihna sang ber
anih miau avangin, a pang lehlam thim chu theihnghilhin, a eng mawi tak chu min
hmuhtir tlat si hi kan lawm tikimtu ani si.
Chhawrthlapui
iangin keini hringfate pawh hi, ropui viau thin mah ila, kan nunah hian thim
lai hi alo awm ve reng thin a, kan famkim tak tak theilo.Mahse, kan phak tawkah, Pathian hrechunga kawng dik zawh tura
theih tawp kan chhuah a, kan theih tawka tha leh dika kan awm a, kan rilru
thatna leh kan theihna sang ber kan mihring pui leh thilsiam dang te hnena kan
hlan phawt chuan, kan mawina in midang a phalo a, kan ropuinain midang a khumlo a nih pawhin kan theihna, hlutna,
mawina leh ropuina hi hnualsuat theih ani hauh lovang le
No comments:
Post a Comment