Tuesday 29 August 2017


CYBER  KHAWVEL  MAWLH HI   
Er. Chhungpuia  Renthlei   
“I FB ngai em?”
“Ngai lo..”
“Anih WhatsApp?”
“Ngai chuang lo”
“WeChat tal pawh?”
“Ka la hre ngai lo hrim hrim”
“Skype, Twitter tih vel pawh maw?”
“Ka hriat vawikhatna”
“I va’n changkang lo em em!”

Kha daih kha a sin …. Kan thalaite  zingah chuan  changkang lo nih awl tak a ni aw ! Tunlai thalaiten changkang kan tehna bulpui pakhat chu ‘Information Technology ’ hi a ni a, changkanglo kan tehna ber pawh ‘Information Technology ’ tho hi a ni leh bawk  a. Information Technology rahchhuah zinga kan hriat hlawh tak, social networking  software   Facebook, WhatsApp, WeChat, Skype, Twitter leh a dang tam tak hmangin khawvel hmun hrang hranga awmte pawh an inbe zung zung thei tawh a. A thain a awlsam phah phian a.

Social networking hian Mizo thalai chauh pawh ni loin, khawvel pumpuiah thalaite nunah bu a khuar thuk tawh hle mai a. Thil reng reng chu a thatna lai a awm rualin a thatlohna pawh a awm ve zel a, Mizo thalai zingah pawh tangkai taka hmang an tam viau laiin a thalo zawnga hmang pawh an lo awm ve teuh zel tho a ni.  

Thalaite nun hi a zalenin a nuam em em a ni. Kan tha chak lai leh rilru ngaihtuahna chak hun lai tak a ni  
Mitin hian he khawvelah hian vawikhat chauh hun kan nei a, kan piang nawn leh ngai tawhlo ang. Hei ngaihtuah reng a tha; vawikhat chauh tleirawl, thalai i ni dawn a, nu leh pa i nih hunah chuan nula tlangval, tleirawl i ni leh ngai tawh lovang. I hun hman englai mah hi kohkir (rewind) leh theih a ni tawh lo. He khawvelah hian vawikhat chauh hun i nei a, I piang nawn tawh dawn lo a nih si chuan I nun kha tu tan nge hmang la tha ber ang. Heng ahnuai a thu te hi han chhiar teh. A dik viau lo maw?

1.       Kawthler aNula chhe lo deuh i thutpui chuan Darkar-1 hi reilote a ni a, Gas bur  i thutpui  erawh chuan Minute 5 hi rei tak a ni.
2.       Whatsapp leh Facebook i khawih chuan Darkar 2 hi reilote a ni a, i inkhawm chuan Darkar 1 a pelh hlek hi chuan rei tak a ni.
3.       I online chuan engtik laiin nge khua a var i hre hman lova, mitthi ina i tlaivar erawh
chuan engtik laiin nge i mutthluk hman i hre lo ve thung!
4.       I len chhuah dawna chhungte pawisa i dil a,Rs 50 an pek che chuan tlem i ti viau mai thei, Biak Ina thawhlawma i thlak dawn erawh chuan Rs 50 chu i hmu tam leh viau si!
5.       Thusawi i ngaihthlak chuan Min 10 chu engtikah nge a ral ang tiin sana i lo en sek a,
Phone-a chhass i biak erawh chuan sana en nachang pawh hre lovin darkar 1 a lo liam mai thin!

 Heng hi kan dinhmun dik tak a ni tlat si.  Hei mai a la nilo cheu . Mi thiam te chuan  khawvel mipui te  hian tooth brush aiin mobile an ngai pawimawh zawk niin an sawi bawk. Khawvelah hian  6.8 billion  mipui kan awm a, 4200 million chauhvin tooth brush kan neih laiin 5.1 billion ten mobile kan nei thung.  Tooth brush nei aiin mobile nei kan tam zawk anih chu.  
Ni tina kan hriat leh hmuh, khawsak dan hi nun kawng chu a ni mai a. Kan kawng zawh tur hi eng ang nge a nih tih kan chhut ngai em le? Hring nun lamtlung kan zawh chho mek zel a.
Chu chu keimahniah hian kan kawng zawh tur kan thlan thiam a tul a ni. Kan nun kawng (dam hun) hi a rei dawn nge a tawi dawn tih kan hre si lo. CYBER KHAWVEL  Nun kawng zawh tur hian mahni lam inen a, kan khawvel hun tawn mek hi kan hmachhawn thiam a tul takzet a ni.



2 comments:

  1. Unknown6 October 2017 at 12:13

    Ka phak tawka ka ngaih pawimawh em em ani ve tlat keipawh. Kan fate idol kan nih ve zel theih nan, a hawi a lo tawka kan hriat ve hram hram tal hi nu leh pate hian kan tum a tul khawp mai. Fate hian thing min tih loh nan in update ve hram hram theih a tha ngawt mai. Kan hriatthiam phakloh avanga thil tullo anga kan chhuahsak vaih chuan, an rilru hi kan hmin tak tak thei ngai lovang. Hmasawnna min chimtu hi tawngpawng do emaw hnualsuat emaw ngawt chi anilo.

    ReplyDelete
  2. chhungpuia11 October 2017 at 21:40

    Comment bengvar thlak min pek avangin ka lawm hle mai

    ReplyDelete

Subscribe to: Post Comments (Atom)