Education leh IT Er. Chhungpuia Renthlei
''Education chu ralthuam pawimawh tak, Khawvel sukthlek tih danglam dawrh theihna hmanrua a ni'' tih thu Nelson Mandela sawi hi kawng engkimah a lo dik thluam mai. Tunlai khawvelah sorkar hnathawh nan, sumdawn nan leh mimal thilah IT hmanrua kan chelek nasa em em tawh mai. Heivang hian Education ang bawkin IT hmanrua te hi hmanraw pawimawh tak, Khawvel sukthlek tih danglam dawrh theihna hmanrua a ni tih chu a chiang hle mai bawk.
Education nei tha mithiam ten a hun tak leh a hmanna hmun taka IT hmanrua an hman hian hmasawnna nasa tak a thleng thin. Hetih lai hian Kan Hmanraw changkang ringawt hian mihring hi min ti changkang ve kher lo tih kan hriat a tul hle mai. education tello a IT hmanraw changkang tak tak kan chelek fo hian a letlinga vut tui thlawr bel ang maiin hmasawnna leh changkanna lam nilovin, tul lova sum leh pai khawhralna leh kan nih tur ang ni phak lova min siamtu a ni zawk tlat si. Hei vang hian Education leh IT hi a kalkawp ngei ngei a ngai a ni. IT hmanraw thil tum tihlawhtling tur chuan education kan ngaih pawimawh a tul hle mai.
Ani taka, Education chuan mihring te hi kaihhruai theih, bawl theih si loh, thunun theih, nimahsela, sal beh theih si lohah a chher chhuak thin. Smart phone changkang tak nei si, mahni smart miah si lo te hi a lo awm thei na meuh mai. Digital divide an tih mai, digital khawvela a nei leh neilo inkar zau ta telh telh hian kan zoram mipui sukthlek pawh a tidanglam ve mek chu a nih hi. Hetihlai hian Internet connection thlen lohna leh IT hmanraw changkang nei phak ve lohna hmun a cheng mihring te hi mi hmantlak loh leh mi mawl a chhiar vek erawh a fuh lo ang. Mi fel tak tak, zirna leh IT lama degree nei lem lo, pianpui BA na nei tha tak tak mi engemaw zat an awm tlat. IT hmasawnna leh Education-in a thlen phak loha awm mihring hman tlak tak chu mi vannei tak an ni phawt mai le.
IT hmanrua leh Education hian mihringa thiamna leh theihna awmte hi phawrh chhuah a, chu chu a țangkai thei ang bera hman tir min tum a nih tlat avangin kan thlen chin apianga hmasawn leh hmantlaka kan in chherchhuah hi kan tih makmawh a ni ta. Hei vang hian Education hian degree neih san sa tliah ngawt lam a kawk lo, IT hmanrua te hi a hmangtu keimahni personal quality in a zir loh chuan awmzia nei bawk hek lo.
IT hmanrua te hi in tihchangkan nan ngawt nilo, changkan nan tak tak kan hman phawt chuan mi thiam ( Well educated) a chhiar kan ni chauh zawk a ni tih te hi kan hriat a tul hle mai. Education leh IT hi keimahni ah a kalkawp phawt chuan zirlai ten an zirna ah hma an sawn anga, sorkar hnathawk ten an hnathawhna ah a hmang tangkai bawk ang. Tin, sumdawngtu te leh mimal pawhin hlawk zawk leh senso tlem zawk siin, hmasawnna leh changkan nan kan hmang thei ang.
Aw le, Education leh IT hi a inkawp tlat a ni tih hi hre reng ang u. Education hi hetiang taka pawimawh, kan nih tur ang leh kan nihna pawchhuak theitu anih mek laia kan thlahthlam hle lawi si te hi kan hmasawnna daltu lian tak a ni ngei mai. Kan mihring mizia, khawsakna environment, Zirna lama kan degree leh hnathawhna te chu eng pawh nise, kan phak tawk tawk ah tunlai khawvel a IT hmanrua te hi min tihmasawntu anih ngei theih nan kan hmanrua chauh nilovin, kan nunzia ti hmasawn hmasa zel ang u.
No comments:
Post a Comment