rUaLrEMLo !
- Er. Chhungpuia Renthlei
Changkha iang a Zoram pianphung rualremlo
tak chhunga cheng keini mizo te nunphung
hi han bihchian chuan a va rualremlo tak
em ! Mizoram hi 21,080.000 Sq.km a zau a ni. Mak tak mai chu Sorkar
record LSC land holdingah 16,10985.660 Sq.km lai a zau zu ni daih a! Kan ram let 76 a
zau LSC
a awm anih chu. Hei mai a la nilo, LSC nei lem lo nena belhkhawm
phei chu 45,34,46,533.200 Sq.km a tling daih nia. Sorkar record ah chuan
Asia khawmualpui (4,45,80,000
Sq.km) let sawm velin mizoram hi a zau
anih chu. Thu mak kan sawi nin theih loh chu Kalvari tlang nilovin, mizoram zau
zia leh a chhunga cheng te pawn lama kan
lan dan leh a tak taka kan nun inperhsan si zia chanchin hi a lawm ni zawk!
Rethei leh Hausa te nun kawng
inthlau lutuk te hi a va rualrem lo leh pek em!
Thenkhat in sangha zawrhna bula
mi kan leia kan lawm em em laiin show room tanga leiin
an la haw tau nghawng nghawng a. Eichhiat leh thawhrim lutuk avanga kan dam
loh laiin ei that lutuk leh awm awl luat tuar lovin a then kan damlo ve mek a.Ruah
han sur se, mawngtam kara underpen rawng pherh nuaih khawpin2-wheelers khalhtu
te kan
huh laiin, thenkhat 4-wheelers ah hul phiangin an chuang ang
lawia. Mi rethei kan huh, Hausa an hul a ni ber mai.
Chanchinbu hringnun lah rualrem
hek suh, engemaw thil thleng awm se, thu dik
leh rintlak huaisen
taka ziah mai tur anih laiin mipui tana thudik
hriat hleih theih loh khawpin political party ten thu an chhuah a. Keini
chanchinbu chhiartu te lah kan rualrem
lo bawk.Dawhkan tihnawk tham lawiha chanchinbu kan dah el ul laiin, mamawh hun
lai taka chhiar tur pakhat mah awm
lawilo te, mamawh tawh loh tlai khaw hnu
a him piala hmuh leh te, zing lama ema uluk taka nu berin
fa tlum duat tak a a duat te kha belian
mun hun ah erawh phek hnunglama Pu Laduhawma hnungzang kul pawp
khawpin therhlo ilo fun nan bazaar nu
hovin dim baksak lovin an hmang leh ang
lawp lawp a.
Sumdawnna lamah nise ringtu sumdawng
kan nih chuan hlawhtling tlak leh Pathian
malsawm tlak, min dawrtu ten min dawr leh zel theihna tur khawpa rinawm tur kan nih laiin Pathian faka lam leh
thusawi thei tak te pawh hi han dawr ila, Vanram kawtchhuahah Pu Abrahama te kan zawrh ngam lohna tur khawpa
man to vin “ Kan lakna a to va, tunlai chu
an ti to lutuk “ nui sanga ti pahin
anmahni pawhin lei dawn se an duh miah loh tur khawpa tovin kan inzuar ve leh bawk nen. Kan in duhsak loh zia atang
hian mahni ringtu pui te chala tho fu tihlum nana hachhek hmang hreh lo pawh
kan kat nuk lovang tih pawh sawi har tak a ni!
Damna duhin damlo ten damdawiin
kan pan laiin tidam tura kan beiseite
inthlahdah avang leh thahnemngaih tawk lohna avangin YMA thuthleng leh
mithi pangpar ten kan riahrun sang an rawn lawi a. An Designation leh
qualification han chhiara a thlamuan thlak teh reng nen Malaria, khawsik, khawihli zai sual, e.t.c kan la thih pui zel
zawng chu a nih hi. Hring nun rualrem
loh dan hi a va lungchhiat thlak thin ve le. Rualrem tak angin rualremlo takin kohhran leh politics kan kai
kawpa. Kan rawngbawlna tam ber hian kohhran ram a kal pel thei meuh si lo. Thlarau
thinghlim tel lova kristian chu khawl la
tel lova kekawr mawng pawp thui pin tum
ang chauh a ni. Kohhran tana thahnem kan
ngaih tluk zeta Lalpa tana thahnem kan
ngaih hun a va nghahhlelh awm ve aw.
A kaw lai chu a pawp nge nge thin.
Kan nun pawp hi Pathian tihna nen tiphui
ila, kan hringnun rualremlo tih rualrem hi enge a rualrem lohna la awm cheu ang
le? Rualremlo tih thupui hawrawp ziah
dan pawh hi rualrem taka RUALREMLO ti a han ziah awm tak
ni mahse, heng kan sawi phiangsen te avang hian a rUaLrEMLo ve bawk em a ni!
No comments:
Post a Comment