DECEMBER
Pathian zarah mi tam tak ten mual min liamsan laiin Kristian te hun pui ber MASI thla kan thleng ta der mai le. Kan vannei bik hle mai.
December hi DECEM (sawm) tih atanga phuah ania, December awmzia chu thla bi chhiar a thla sawmna tihna a ni.Massi rim a nam dawn viau emaw tih nak alaiin, Mathematics lamah min hruai lut lek lek zawk ka ti! Mak tak mai chu,10 tihna ni na na na,12 tihna ni awm ang zia zangin thla 12 na hming atan December tih tawngkam khawvel in a pawm nghet bur tawh mai zu nia. Dan hre miin an sawisel lova, Political party lahin an sawisel hek lo.
December thla hian mak danglamna em em bik nei lo mahse, tunhma atang tawhin sakhaw serh leh sang kutpui hmanna thla a ni hi a ropuina a ni ber mai. Engle khawle, kan hriatna thazam chuan December hming a rik rual rual hian Bethlehem lam min hawitir tlat si a, Keini kristian te tan chuan "U AMA I LO FAK ANG" ti a kan zai thla a nih tlat avangin thla nghahhleh awm ber a nilo theilo e.
THU KHUH
Er. Chhungpuia Renthlei
Hmanlai kan mizo society ah khan thil awm dan dik tak emaw, an rilru a awm direct taka sawichhuah hi an ching meuh lo.Tunhma kan mizo pasaltha Vanapa, Taitesena, Khuangchera .e.tc te kha an hunlai kha chuan mizo Society a public figure a kan neih an nia, an chetzia leh tawngkam an entawn nasa thin hle. Hriatthiam theih tho siin thu an khuh a, tanpui ngai ngawih ngawih dinhmuna an awm pawhin "Tanpui ka ngailove, mahniin ka ti thei e" an ti hram hram thin. Mahse, hawihhawmna leh tlawmngaihna tawngkam a ni tih miten an hria a, an tanpui tho thin. Tunlai thlengin rual u zawk te chuan thukhuhna tawngkam an la hmang uar khawp mai.
Khawvel a inher danglam zela, mizo culture pawh a danglam chho zel a, thil nihna dik tak sawi hi kan ching chho ta. Kum 1990 hnu lama piang te phei chuan hawihhawmna leh tlawmngaihna vanga thukhuhna tawngkam awmzia an hre meuh tawh lo. A bikin hnam dang zinga khawsa thin phei chuan an hrelo leh zual. Rual u zawk ten tlawmngaih vanga "A ngai love", "Ka duh lo e" an tih chuan an duhlo tak takah kan ngai hmiah zel tawh thin.
Tunlai kan society han thlir hian thu khuh tit tet lova tlang taka tawngkam mawi tho si a thil nihna sawi mai hi a tha zawk tawh mai em ? Hawihhawmna leh tlawmngaihna tawngkam mawi zawk ni a kan ngaih "A ngai love", "Ka duh lo e", "A tha viau e" e.t.c ang chi hi hman tam loh te pawh a fuh zawk viau lo maw? Enge in ngaihdan le? Han comment ve teh le
Engemaw hleka kan thinurna so sang thin
hi insumtheihna chemical nen pawlh dal (Dilute) ila, Hun kal tawh engemaw thil
vanga midang huatna thinlung kan neih te hi inrem duhna chemical hmangin
tithamral (Evaporate) ila, Kan tih tur leh tih loh tur thliar hrang (Filter)
thiam ila. Chapona leh midang aia tha ni a kan inhriat tlatna thinlung sak hi
tlawmna meisa in chhuangso (Boil) ila. A tawpah hlimna leh inremna lung
(Crystal) mawi leh tlo tak a rawn chhuak ngei ang.
BITS & BYTES
Er. Chhungpuia Renthlei.
July 2020 khan khawvela internet hmangtu te hi 4.57 billion lai kan tling.Tunah hian khawvelah mihring 7.77 billion kan awm a,4.57 billion te hi active Internet users kan ni.Hei hi khawvel mihring zawng zawng 59% lai a ni.Digital khawvelah data kan dahkhawm bakah kan in thawnkual nasa hle mai Digital Memory tam lam tehna te chu :
1 Bit = Binary Digit
8 Bits = 1 Byte
1024 Bytes = 1 Kilobyte
1024 Kilobytes = 1 Megabyte
1024 Megabytes = 1 Gigabyte
1024 Gigabytes = 1 Terabyte
1024 Terabytes = 1 Petabyte
1024 Petabytes = 1 Exabyte
1024 Exabytes = 1 Zettabyte
1024 Zettabytes = 1 Yottabyte
1024 Yottabytes = 1 Brontobyte
1024 Brontobytes = 1 Geopbyte
Phone setting ah lut la, google ah click la, a chung berah Covid-19 exposure notification a lo awm ang. Hei hi mi tam tak chuan kan privacy tichhe thei ah an ngai a, a ruka Covid-19 sensor kan phone-a an rawn dah tiin Social media ah mi thenkhat ten an thehdarh nasa hle
Google Covid-19 exposure notification hi enge anih a, engvanga kan phone setting a lo awm ve ringawt nge ani tih leh an sawi anga hlauhawm a ni chiah em? Han bihchiang ve lawk ang hmiang.
Covid-19 exposure
notification hi enge ni le?
Covid-19 exposure notification hi Application Programming Interface (API) chikhat, bluetooth technology hmanga data inthawnchhawng thei (contact tracing ) chikhat a ni.API chauh a nih avangin Turn on ringawt hian engmah hna a thawk lo. A thlun zawm tur contact tracing applications Software install tel chauhvin Phone Bluetooth radios signal hmangin contact tracing hna a thawk thei.
Covid-19 exposure notification hi COVID -19 contract tracing technology atana hman tura Google & Apple team ten kum 2020 April thla a an siamchhuah a ni. India ramah erawh chuan kan hmang velo.
BATTERY & LIFE
-Er. Chhungpuia Renthlei.
Battery negative leh positive charge hi hmanraw tangkai tak a nen dik taka thlunzawm anih chuan thil tih theihna ropui tak a nei a, kan nitin khawsakna ah kan hmang tangkai hle thin. Mihring nun hi battery ang a ni. Hlawhchhamna (negative) leh hlawhtlinna (positive) kan tawn te hi awmze nei taka hmasawn tura tumruhna thahrui nen kan thlun zawm thiam phawt chuan thil tih theihna ropui tak min pe thei.
Hmanraw tellova Negative leh positive charge direct a thlunzawm ringawt anih chuan awmzia a neilo mai nilovin chhiatna namemlo a thlen fo thin.Kan hringnunah pawh hian hlawkna emaw, chhawr tangkaina tur awm lova social network kaltlanga midang sawisel (negative) chiam chiam leh thil tha (positive) anga lang thu ho tak tak buaipui chiam chiam hian awmzia a neilo mai nilovin thatna lam aiin chhiatna namenlo a thlen thei fo zawk.
Kan thiamna leh chhungkaw dinhmun a hniam emaw, kan tih theih zawng mite angin sang lo mahse, "Hmanraw tangkai tak nena Battery Negative leh positive charge thlunzawm hian thil tha leh ropui tak a ti thei" tih hre chungin thil tha leh thalo social media leh kan hringnuna kan tawn tawh leh kan tawn mek te hi kan hmasawnna atana "Tumruhna leh rual elna hmanrua" nen kan thlunzawm tlat chuan hlawhchhamna leh lungngaihna kan pumpelh ngei ang a, hlawhtlinna engemaw tak kan nei ngei ang.
MATHEMATICS THURUK
-Er. Chhungpuia Renthlei
Mi tam zawk ten Mathematics hi a harsa zawnga thil chhutchhuahna emaw kan tih lai hian, anihna takah erawh chuan thil harsa tak pawh awlsam thei ang bera chhut chhuahna tura mihring ngaihtuah chhuah zinga mawi ber leh thil ti thei ber leh Science & Technology hmasawnna kawngkapui hawnna chahbi pawimawh ber a ni.Kan chenna khawvela thil awm mit a kan hmuh theih si loh thlengin formula hmangin a tarlang a.Suangtuah phak baka thil awm zel tur pawh "Infinity" symbol hmangin a tarlang bawk.
Mathematics tellovin kan khawsa theilo. Min hual veltu te hi mathematics vek a ni ber mai.Mathematics leh hmangaihna pawh hi ang khat a ni. Atirah awlsam tak angina lang mahse, tihfuh loh chuan a sawhkhawk chu buaithlak tak a ni. Equation ah Negative sign positive a chantir dan kan thiam phawt chuan a tawpah Hlimna leh hlawhtlinna (Positve value) engemaw tak kan nei ngei ang. Kan nitin nun dan pawh hi Mathematics equation ang a ni. Harsatna (negative sign) hrang hrang kan lo tawn tawh te kan nun siamthat na tura a tha zawng (Positive Sign) a kan chantir thiam phawt chuan heng harsatna te hi hlawhtlinna min thlentu anni thei.
Mihring nun pawh hi profit & Loss a ni ber mai.Mathematics Symbol kan hman thiam phawt chuan kan hlimna a belhchhah (Add) anga,kan lungngaihna a tikiam (Subtract) ang. Thian tha leh hmangaihtu a tipung(Multiply) anga, Hmangaihna leh hamthatna adawng tur te hnenah rual khai takin a sem (Divide) ang. Kan hlimna a let(Square) in a pung anga, Chapona thinlung a thaibo( Eliminate) bawk ang. Hetiang anih ngat chuan kan hun kal tawh kawng hrang hrangah hlawhchhamna (Loss) nei thin mahila, kan damchhung hun chawhrual(Average) in hlawhtlinna (Profit) kan nei daih thung ang.
Keini ringtu inti zingah pawh Diklo taka sum neih (2get) tum leh phut let neia thil pek (2give) kan chin avang hian harsatna kan tawk fo thin. 2 ringawt aiah Mathematic formula dik zawk (2 +2 =4) kan hman erawh chuan 2get aiah 4get( theihnghilh), 2give aiah 4give( ngaihdamna) a lo ni daih anga, Tichuan, kan buaina leh harsatna tam tak te hi a bo (Zero) ngei ang.
Mathematics hi numbers, equations, algorithms e.t.c a ni ringawt lova, kan nitin nuna thil nihna tak hriatfiah theihna a ni zawk.Kan harsatna eng pawh hian matthematical solution formula a nei vek a, kan nun dan azir zela heng formula te hi kan hman thiam phawt chuan Mathematics hi kan thinlunga nitin hmangaihna luanluh belh(Add) tirtu leh ngaihtuahna sual kan thinlung atanga paih(Subtract) chhuaktu tangkai tak a ni ngei ang.
ZORAM POLITICS KHAWVEL
-Er.Chhungpuia Renthlei
Politics hian ram leh hnam siamthatna atana duhdan leh ngaihdan thuhmun neia lungrual taka mipui ten thutlukna kan siam hmanga tualchhung,khawtlang leh ram inrelbawl dan hi a huam a. Mahni hamthatna tur ngei ngei pawh thil tha lo anih chuan kalsan ngam a, khawtlang leh ram hmasawnna tur anih phawt chuan mimal leh party ten kan tawrhna tur leh chawi belh a ngaih hun pawha ke pen zel ngamna hi Poltics laimu dik tak chu a ni.
Keini Ringtu inti ten dawt leh thutak pawlha inbeihna hmun ni a ngaia, political party ten mahni khingpuite a chhe thei ang bera inbeih nana kan hman Politics hi Uisa ang maia paih tur awm hlek lo, ram leh hnam hmasawnna atana chaw tha tak a ni zawk si.
Roreltu apiang kan ninga, kan sawisel a, Kan phu tawk roreltu Pathianin min pe tih hrereng chunga Chungu lal dil ang maia Pathian hnena Lal thar kan dil fo te hi a dik ber em? Party awn lam nei ran chunga ram hruaitu thar dila tawngtai ngat phei hi chu ringtu tih atan a mawilo tak zet a ni.Heti chunga sorkar tha neih tum chu pialtlepa liluh tum ang chauh a ni!
Khaw khat sawi kai khawpa hmeichhe hmeltha lepler tak te hi kan laka an han lerh ve meuh chuan patling tawng thei tak pawh hi vawk techhangban pek ang maiin kan ngawi hmak thin an ti. Politics khawvelah pawh hian an diklohna kan hriat chian viau leh kan sawisel nasat em em te pawh hian keimahni hamthatna kawnga ke an pen dek dek pawh tawng puah bomb kan hmuam ta nge ni kan ngawihmiah thin zu nia!
Political party hrang hrang te hian ram hmasawnna tur Manifesto tha tak an nei veka, an ngaih pawimawh a in ang lo mai a ni chauh zawk. Mipui te hian Politics laimu thianghlimna vawng tlat ila, party ruih chilh lutuk te sim ila, sorkar siamtu keini mipui kan rinawm phawt chuan Political party candidate ah hmel thar an lang hnem anga, roreltu tha kan nei ngei ngei ang. Mipui kan rinawm phawt chuan eng party pawh sorkar se kan ram hian engemaw kawng talin hma a sawn ngei ang.
RILRU LEH THLARAU A MI HAUSA TE
-Er.Chhungpuia Renthlei.
Nikhat chu mi hausa tak mai hian a fapa naupang te chu mi rethei te dinhmun hreawm zia a tak ngeia hmuh tir turin mi rethei tak mai chenna hona farmah a hruai a. Kar khat lai an cham hnu chuan a fapa hnenah chuan "An retheih zia i hmu ta a, enge i zir chhuah tak le?" tiin a zawt a.
A fapa chuan, "Keini chuan ui pakhat chauh kan nei a, anni chuan pali lai an nei.Tuikhur te tak te kan nei a, anni chuan luipui lian tak an nei a.Zanah khawnvar kan chhi a, anni chu vana arsi eng mawi tak ten eng an pe a.Mi tharchhuah sa Buhfai kan leia, anni chuan an mahni thar chhuah ngei an ei a.Lehkhabu tha tak tak kan nei teuh a, kan chhiar peih ngailo a. Anni chuan Bible hlui tak chauh an nei a, an chhiar peih em em a. Rukru kan hlau a, tahla lian takin kawng kan kalh a, anni chuan engmah an hlau lo a, kawngka pawh an kalh ngailo.
Keini chu thenawm te nen kan in be ngailova, anni chu hlim takin an inkawm thin a.Pawisa pek loh chuan tumah kan inpui ngailova, anni chu an in tanpui tawn thin.Keini chuan in lian tak kan nei a, inkawmna hun pawh neilovin mahni roomah kan awm hrang vek a, zan tin deuh thaw kan nu leh pa ten min chhuahbo san a. Anni chuan in zim tak an nei a, in hnaih taka thu in an inkawm a, nu leh pa te nen zan tin hlim takin chhungkua in an in kawm thin.
Chhungkua kan in pawhtlan loh zia te, kan intodelh loh zia te, thenawm te nena kan in pawh tlan loh zia te, Hlauh kan ngah lutuk avanga kan rilru thlamuan loh zia te leh mirethei kan hmusit em em te aia kan taksa leh rilru a retheih zawk zia min hmuh tir avangin ka pa lawm e. Anni hi rilru leh thlarau a mi hausa dik tak an ni e. Anni ang hian awm ve ka han chak em !" tiin a chhang zawk ta daih mai.
KHAWSAK CHANGKAN LEH HAUSAKNA RINGAWT AI HIAN PATHIAN HRE CHUNGA TAIMA TAKA MAHNI THAWHCHHUAHSA RING A, CHHUNGKUA LEH THENAWM TE NENA IN NGEIH TLANG TAKA KHAWSAK HI RILRU, THLARAU HAUSAKNA LEH HLIMNA A NI ZAWK.
RUAHSUR VANGA CHHIATNA HI
Er. Chhungpuia Renthlei
“Malsawm ruah te a tla ang .. “ tih pawh duh tawk lova, “Ruahpui meuh rawn tir ang che “ ti a urhsun taka khuangpui nen meuhva Pathian hnena memorandum thehluttu kan zoramah ruah han sur hlek se, TV ah leh Chanchinbu ah ruahsur vanga chhiatna hrang hrang hmuh tur a awm deuh reng mai le! Kan dilna Pathianin ataka min han chhan meuh chuan, chhei le!Leimin, lei tlahniam, luah ngam loh khawpa In che, In chhe tep, In tlu sawp nil nial, in tlusawp vek, road block a awm fer fur ta mai le.tuihawk leh chirh a luang zeih zuih na, hmeithai in tia tia lungtum thar lam tak tak kawngchhak atangin an rawn thu chhuak leh hlawl mai bawk.Chhungkaw pa ber a awm hle hle thei lova, nu ber a thlaphanga,fanau te thlamuang takin an awm thei bawk hek lo.Hetihlaiin chhiatna zarah hmingthatna leh chawimawina Politician ten an khum thung lawi si!
VALUE SYSTEM REFORM
Tunlai kan mizo society ah thalai te Infiamna leh entertainment program kan ruih chilh a, nu leh pa ten politics leh kohhran kan ruih chilh thung.Heng te hi thil tha tak chu ni mahse, thil tha anga lang kan tuipui tam zawk te hi kan mamawh ber leh min siamthatu a ni lem lo tih te pawh hi kan hriat a tul ta.Kan thalaite nun leh zirna siamthatna hmanraw pawimawh ber chu hnathawk tlaka an thiamna tipung a, an phak tawk ang zela eizawnna tlak hnathawh tur siamsak hi a nih avangin,eizawnna tha neitura zirna leh nunphung hmasawnna lama ke pen turin kan mizo socciety hi kan siam that a tul hle.
YAMAHA bike khalhtu T-Shirt dum leh Jeans kekawr ha in mi te lehpelh tuma chak deuh maia a tlan chu Pa vengva tak pakhat chuan abula scooty sen khalhtu, sam sei tak hnungzang thlenga uai thla hnap mai hnenah chuan ,”Saw lai tlangval chu aw !, ava hmanhmawh bik awm em em ve le, tu fapa nge ni ang aw ?” a han ti a. A rin loh tak mai a “Ka fanu a nih saw “a lo tih vang a mak ti hmel pu tak chungin “Tlangval emaw ka ti a, Ka tih palh lutuk, A nu ilo ni reng ani maw ?“ a ti a.“A nu ka nilo ,a pa zawk ka nia“ a han ti leh zet chu, mak ati lutuk hmel kha han pu hlen se chu nupui zawnpui a huphurh awm ve ngawt ang le!