LUNGLEI KA ZIN VE A !
-Er. Chhungpuia Renthlei
(Written on dated January 12, 2009)
Celebreties hmeltha leh lar tak tak Foreign ram fan thu Lelte Editor Pu C. Dina'n MLA Election Campainer tluk zeta uar tak maia Lelte Weekly chanchinbu a a puanzar laia 5 star Hotel, Airport leh Rail station pakhatmah paltlang ngai hauh lova Aizawl atanga SUMO ticket pakhat hmanga nikhata ban phak LUNGLEI zinthu han ziah ngawt mai chu midum zinga a nei te ber ang maiin a ruk tak chuan ka in sit ve lek lek mai. Pu KL Liana leh Pu Vanneihtluanga te nena kan pu duh tak Tirkoh Pawlan "Keini zawng kan hmuh leh kan hriat te hi sawi lovin kan awm thei lo " a tih ang maiin Pu Pawla thlarau ka chungah thuro anga a rawn fuk a, Laisuih leh kawlawm min rawn pek meuh chuan inthlahrun chu sawi loh ka hmuh loh leh hriat loh thleng thlengin ka ziak ang tih ka hlau rum rum mai zawk !
Krismass boruakin Aizawl khawpui a chim mup mup lai leh Mizo tlangval serh tan loh leh nula nalh tak tak pian tirh ata chhul la lak ngai reng reng loh te mobile hmanga an intawksir mup mup lai a " Lunglei lamah Practical Examiner turin tlawmngaiin i kal thei em ? " ti a Mizoram University atanga phone ka han dawng chu lawm tur nge lawm loh tur pawh ka hre lo. Hetih lai taka ka dinhmunah hian Thianpa Thanga ( Editor ZUNZAM Daily, Lunglei ) hi han ding ve ta se " Lawmna tur hlir a lo ni " tih hla phur taka a sak ka ring miah lo. Kan Veng Biakin dar ri leh Aizawl traffic Police hmel hmu pha lo tura hapta khat zet ka han thangbo tur chu ka huphurh ve lek lek mai. Mahse, Aizawl chhuahsan ka huphurh let sawm vel daih maia Synod khawmpui tluk zeta a rei Lunglei a ka cham hnua Lunglei chhuahsan ka huphurh zia kha han hrelawk ni ila chu thenawmpa ruaitheh tur kal lam ang maiin ka phur tur hi a nia !
Dan pangngai te in December ni 12, 2008 chu a rawn in herchhuak leh ta, ramtiam Lunglei pan tur chuan thlasik khawvawt do na tur ralthuam famkim leh document pawimawh hrang hrang te nen inthuamin "A hmel en in a tlawmna a..." tih ang maia Romantic lo leh thingtlangpa hnathawk haw lam ang maia vun pawr tak Night bus " JOSEPH TRAVEL " tih inziak kiau mai chu ka bel ve chawt mai a. Ka lunghnur hmel a hmu ni ngei tur a ni, engmah ka sawi hmain "A hmelin Passenger hip lo mahse kan tluang viau thin a ni a .." ti a Driver in min han hnem takah chuan taima taka hnathawktu taksa a fai reng theilo tih rilru pu chungin ngaihngam takin ka seat chan ve tawk "CABIN " ah chuan ka han in hnawh ve rawih mai a. Driver leh Conductor an fel ka tih em em laiin Ticket pek thuah an nei nual erawh kha chuan passenger minti chi ai deuh.
Ngaiteh heti hi ani a, Conductorin " A kal theih e " tia a signal a han pek chuan ka han hawi vela, mi paruk vel chauh chuan theihna Cabin ah chuan hmeichhia leh naupang chiar telin Isua zirtir zah zet kan lo inhnawh reng chu niin, kan chep lutuk chu lei pawh ka chhuah thei lo ni berin ka hria! Kan chuanna bus a han inher meuh chuan Lunglei lam kan pan dawn nge kan chatuan hmun tur kan pan dawn tih ngaihtuahin ka buai ru hle mai.
Thianpa Mamuana ang maiin inkhawm khat mah ila, Thlarau nun min chawmtu atan Pathianin a hmang lemlo tih hre reng chungin ngaih tih that nan kan Veng Biakin lan theih chhung ring kham urh khawpa ka thlir hnuah " Kan zinkawng khawhar tak ah hian " tih hla rilrua sa chungin tual ka lenna Zawlkhawpui chu hapta khat vel atan duhthawh tak chungin ka mangtha ta mawlh mawlh a.
Ni e, dawt a ni mawlh lo. Khawvelah hian mi chihnih kan lo awm ngei mai. Krismass dawna thlawhna leh Rail changkang tak tak hmanga Smart taka inthuam chunga Briefcase nalh tak khaia Delhi atanga rawn haw kan awm. Hetihlai hian Second hand thawm hnaw Rambo Polythen lian tawk taka khai chunga Second hand dawr a mi "BE THE RED " tih inziak ngei T-Shirt ha leh Cheng 90 dawra mi Duplicate Sniker pheikhawk bun chunga phur taka zinkawng zawh mek kan awm bawk. Thlawhna leh rela chuang pha ve lo pawlah awm mahila nu valai Khawchhak Love story Serial Film en ang maiin kawngtluanin ka phur surh reng mai.
Mizoram District Khawpui , Technical Zirna in lian awmna leh kawng hrang hrang mizoram min chawimawitu LUINGLEI khawpui panna kawng erawh chuan ngaihtuahna thui tak min pe. Ni li chauh a liam lo, kum sawm lai liam ta a , " Rul muk hnungzang ang mai a dum leh mam kawngpui kan siam dawn e .."ti tu te kha khawnge an awm tak tiin ka keimah leh keimah ka in zawt a,keimah bawkin ka hriat loh thu keimah bawk ka inhrilh leh.. Kan hotute rulmuk sawi leh ka rulmuk hriat a in inang lo a ni a nge tia ka ngaihtuah laiin kan chuanna bus chuan kawngkhuar chikhrup mai laiah chuan Bhaga Coconut ang mai a Passenger nunau taksa chak lo tak tak min han sawh dawrh dawrh mai chu , "Awle hnungzang leh Changkha ang maia chik hrep hrup kawng anih hi kan pu ten an lo siam, Rulmuk an tih kha Awle a lo ni reng alawm mawle ! tiin kum hmasa kumthar ruaithehnaa Pa Hruaia sa tuihang changlo lunghnur tlukzeta ka insehruh lai chuan Mipuite nghahfak kan sorkar thar duhawm tak hian
Mizoram khawpui pawimawh tak LUNGLEI panna kawng hi midum Puja kal lam chalsam ang maia dum leh mam hlarh in han thuam tha se ka va han ti em ! tiin ka ngaihtuahna chu Lalpa tawngtaina in ka nemnghet ta zawk a. Khasi Nula Sinior Pasal nei hlimin dim baksak lo va buh a thap anga maia tlaivar thulh thak khawpa zankhua a hmei a pa , a nau a sen, a chhia a tha, ahang a ngo , a cher a thau , a tawi a sang thliar hrang hauhlova min han thap hnuah nghakhlel taka ka thlir ka ramtiam LUNGLEI chu zing bawh ar khuan hun velah kan thleng ta a. Kan zinkawng bumboh leh Bus chuanna han ngaihtuahin " Halelluiah ! Ka lawm e Lalpa " tiin Tv. Marova chu han ni ila ka au chhuak ngei ang le. Mahse, Chhungpuia ka ni miau mai si a, ni danga ka tih loh dan pawh ni chuang lovin fingthiam takin ngawi rengin lawmthusawiin Pathian hnenah rilruin ka tawngtai ta zawk a.
Tv.Ramhlu'an awih chiah lo mahse, Lehkhabu dawr leh Library kal apianga lehkhabu tam tak aia Bible leh Pathianthu inziahnain ka mit a lak tlukzetin Building tam tak zinga Kawngpui zira inthlahrung hauh lova " HIGHER AND TECHNICAL INSTITUTE, MIZORAM " inziahna Building nghet tak maia to lur mai chuan chuan ka mit a la a, Fapa tlanbo mahni inlam pan ang maiin luh hupurh si, chak si, inthlahrung chung si, tlangnel nghal si, thian te hmuh zak deuh si, hmuh loh erawh hlau em em si .. hmanhmawh hauh si lovin chak tak leh Phur takin ka pan hnu hnu a ni ber mai ! "KA lawm zel ang, Lalpa ah .." tih ang maiin HATIM principal, Staffs leh Zirlaite hawihhawmna leh min enkawlnaah ka lawm lutuk . "
Lawmna tur hlir a lo ni " tih hla phur taka a sak bak sawi tur ka hre mawlh lo. Thianpa Rama chu ni se, " Min ngaizawng vek niin ka hria " tiin a a in sawi theih leh ka ring leh tlat pek a. Mahse, kei chu Chhungpuia ka ni leh miau avangin Mikhual anga min en chu sawi loh Fapa tlanbo kir leh a pa in duat taka a enkawl aia nasa maha min lo lawm a , unau ang maia min enkawltu Lunglei hmunah pawh Pathianin min pek avangin Lawmthu sawiin ka tawngtai leh daih pek a.
HATIM inrelbawldan leh in enkawl dan hi Aizawl lama College leh schoolah te hian han nei thei ila chu Pathianah leh zirna lamah hma kan sawn ngeiin ka ring. Instution leh a vel fai, Class room a thianghlim, Principal a thawkrim, Staff te an taima, Zirlaiten theihtawp an chhuah, Ram tana chenfakawm zirlai chherchhuaktu ni thei ngei turin HATIM in hma sawn zel se . Ka sawi vek seng lo. Hmasawnna rahbi thar zawh dan ka han sawi Principal te nupa in uluk tak min ngaihthlak sak te kha an fak awm ka ti. .Ram leh hnam tan Zirlai tlem te thiam tak neih ai chuan zirlai thanhnem zawk thiam tak neih a la hlu zawk fo tih hre renga tan lak a pawimawh tih hrereng chunga a tul anih phawt chuan tha zawnga Administration pawh inher rem a, Institution hmasawna tura pur an rawn chawk luh ngei ka ring nghet tlat.
Lunglei chu Lunglei a nih miau avangin tumah tluk loh enin kan en reng reng tur a ni bik lo tih rilru a vawng rengin Information Technology lamah pawh kan ram tan kan bei zel tur a ni. Isua in "Jerusalem atang chauhvin Pathian biak tur a ni lo.." a tih ang deuhvin IT lam hmasawnna leh zirna hi Phairam leh State khawpui Aizawl ah chauh zir tur tih Bible ah a inziak reng reng lo, Taima taka kan zir phawt chuan Lunglei khawpui atang hian HATIM hian Computer mi thiam thalai thahnem tham tak kan zirchhuak thei tih hi Zawlnei Isaia te zawt buai kher lo pawhin a chiang em em a ni.
Kan tu leh fa ten "Aw ka pianna Lunglei khawpui, Mizoramah hian i te ber tawp lo ve... i chhung atangin Ramhruai tu leh IT mithiam tam tak an rawn chhuak ta si a .." tih hla sa a Lunglei khawpui zahpui hauhlova laitual an len ve ngei theih nan "We Give our today for their tommorrow " tih thupuia neiin Min siamtu Pathian hrereng chungin keini zirlai leh zirtirtu zawng zawng te hian thahnemngai takin kan ramin information technology leh zirna peng hrang hrangah hma a sawn theih nan kan vanglaini hi keimahni tan mai ni lo, ram leh hnam hmasawnna atan i hmang theuh ang u.
