WELCOME TO CHHUNGPUIA RENTHLEI BLOG

TAEKWONDO ! 
- Chhungpuia Renthlei 
(Written on : 16.2.2019)

TAEKWONDO GENESIS

Taekwondo tih hi Martial arts chikhat a ni. Korean thumal pathum, Tae =Foot(ke), Kwon=Fist(Kuttum), Do= Style (chetdan)  atanga phuah a ni. A awmzia chu  kut leh ke awmze nei taka tihchet vel dan tihna a ni.Invenhimna mai bakah rilru leh taksa sawizawi nan an hmang uar zela.Tunah chuan khawvel pumah intihsiakna Sports discipline pawimawh ber te zinga mi a lo ni chho ta.

Kum 1909-45 chho a Japan in  Korean a  awp beh lai khan Japan culture leh martial arts an vawrdarh nasa hle a.Korean ho hian an mahni pual  ngei a martial arts  neih an duh avangin  Kum 1955 a Japan hoten Korea an chhuahsan khan  South Korean Army general leh martial artist lar tak mai General Choi Hong Hi chuan  Korean style in martial arts  a ruahman ta a.Tichuan, khawvel miten kan  ngaihsan  em em, keini mizo ten Kungfu kan tih mai, Taekwondo  chu arawn piang ta a ni.

TAEKWONDO SPORTS KHAWVEL

Khawvel ram hrang hrangah a darh zau zela,Kum1973 ah World Taekwondo Federation (WTF) hial an din ta rup mai. Hemi hnu lawk Kum 1975 khan 1st Dan Black Belt Jimmy R.Jagtiani-a chuan India ah zirna a siam a.India mipui ten kan ngaihlu hle maia, reilo te chhungin alar chho nghala, mi za tam takin an zir a.Taekwondo Federation of India (TFI) kum 1976 ah a din a ni nghala, president hmasa ber a ni bawk.

Taekwondo  hi  khawvel mipuiin an hlut hle a, WTF Taekwondo chu World Games event ah kum 1981 khan official an pawm bawka.Seoul Olympic Games 1988 leh Barcelona Olympic Games 1992 ah te demonstration an neia, hei hian nasa takin Taekwondo a promote a. Kum 1992 khan Olympic Council of Asia chuan Taekwondo chu Asian Games official sports ah telh ta a. A lar chho zela, Athen, US, London, Beijing leh ram hrang hrang ten official sports ah an telh bawk.Kum 2006 khan World Taekwondo Federation hnuaia affiliation ti  te chu ram 182 lai an tling chho hial mai.

Tichuan, India ram hmun hrang hrangah alar chho zela, keini mizo te pawhin kan ngaisang hle a, kum 1989 khanMizoram Amateur Taekwondo Association (MATA) din a ni ve leh ta. MATA din atanga vawiin thleng hian Taekwondo hi  Mizoram State Sports Council(MSSC) hnuaia sports discipline  thianghlim leh discipline nei tha ber a ni.Mizoram district hrang hrangah  Taekwondo club a ding chho zelin  MATA hnuaiah  affiliation an ti a, kum tin Tournament leh Championship neih a ni thin.

TAEKWONDO COLOR BELTS

Taekwondo thiamna hi  Belt( kawnghren) Color chi ruk  white, yellow, green, blue, red leh black hmanga chhinchhiah a ni. A sang ber chu Black Belt  10th Dan a ni. Color belt sang zawk hreng tur hian Examination paltlang ngei ngei angai. Mizoramah chuan kumtin MATA in exam a buatsaih thin. Color belt langsar zual leh awmzia, asan dan indawt in :

1.White Belt (Paper/ piang tir) :Thianghlimna  leh thuawihna nena bultanna.

2.Yellow Belt: (Ni eng/ Thlaichi): Dikna leh rinawmna nen thil thar zir zelna.

3.Green Belt: (Thang chho) Hmasawn zel tura thanchhohna.

4.Blue Belt: (Tuifinriat/Van dumpawl): Beidawng lova tumruhna nena hmasawn zelna.

5.Red Belt: (Ni sa,hlauhawm):Hlauhawm tak an ni tawha, rilru leh taksa thunun zir zelna.

6.Black Belt: (Chhum hmin/Puitling): zirzo tawh mahse, thil thar zir zel tura inserh.

TAEKWONDO PLAYERS  HMANRUA TE :

Taekwondo  uniform hi Dobok an tia, a zirna  hmun hi Dojang an ti bawk. Carpet (8 Sq.metre) rawng sen leh pawl  an phah a, banners flags, belts leh  zirna poster an tar thin.Taekwondo zirnaah hian Korean  tawng  hman a ni thin. Taekwondo zirna leh intihsiakna atana players hmanraw langsar zualte :

1.Head guard :Lu venna,

2.Chest protector :Awmbawr venna.

3.Groin guard :Kap venna

4.Forearm guards :Ban venna.

5.Hand protectors :Kut venna.

6.Shin guards :Ngal venna.

7.Mouth guard :Ka chhung/Ha venna.

TAEKWONDO POINT SYSTEM

Intihsiakna dang ang bawkin Taekwondo intihsiakna hi Point System a ni a, point pekdan tlangpui :

1.Lu a pet fuh (3points),

2.Vir chunga  taksa a fuh (2 points),

3.Vir lova Taksa a fuh pangngai  (1 points)

Intihsiakna ah hian Hmaia hnek, Khup a do, kawng aia  hnuaia inkhawih, ring/mat  pawna ke pahnih dah chhuah, thinrim, official te chunga mawi lo taka khawsak te hi khap tlat a ni.

Heng dan bawhchhia te hi hremna ( Penalty)  Gam-jeom  pek an nia, point an paih sak thin.

TAEKWONDO GOLDEN RULES:

Mipui ten inhnek (Punch) leh inpet (Kick) kan hmuh piahlamah hian Taekwondo ah hian zawm ngei ngei tur  thil panga a awm a, chung te chu :

1.Courtesy:Hawihhawmna leh Inzahna

2.Integrity :Inpumkhatna.

3.perseverance: Insumtheihna.

4.Self-Control : Mahni inthununa

5.Indomitable Spirit: Ingaihtlawmna thinlung

Heng te hi Taekwondo students leh players bakah, Instructor leh Taekwondo pawl hrang hrang a tel  ten an zawm ngei ngei tur a ni.

TAEKWONDO HMANGA KHAWTLANG NUN SIAM THAT

Awle, Color belt awmzia atang ringawt pawh hian Taekwondo hi sports thianghlim leh discipline tha  anih mai bakah, Intihsiakna atan kherlo pawh Hriselna, displine tha leh thuawih  zirna, taksa thang lai tan ngat phei chuan rilru leh taksa sawisawina  tha tak a ni ngei mai!A bikin, Naupang, tleirawl leh thalai te nung chang tha leh hriselna petu atan kan hman tangkai thiam a pawimawh  hle.

Mizo Naupang, tleirawl leh thalai tenTAEKWONDO SPIRIT kan neih ngat chuan, zanah kan mu hma anga, zing kan tho hma bawk anga, thu kan awih bawk anga, kan rilru a chak bawk anga, zirnaah hlawhtlinna tha zawk kan nei anga, kan taksa in a hrisel phah bawk  anga, kohhran leh khawtlangin kan buaipui em em ruihhlo lakah pawh kan fihlim phah ngei ang.

CONCLUSION

Awle, Mizo  Naupang, tleirawl leh thalai ten an zirna leh thil tihna hrang hrangah Tumruhna taimakna  te,Thu awihna leh inzahna te, Hun dik taka an vawn theih nan leh  rilru thianghlim tak an neih theih nan TAEKWONDO  hi Educational Institution  leh khawtlangah uar thar zel ila a duhawm hle mai.