WELCOME TO CHHUNGPUIA RENTHLEI BLOG

MIHRING TAKSA A CHIPS DAHLUH HI SUAL A NI EM ?

             Er. Chhungpuia Renthlei

Mihring nunna pawh sei nan emaw, kan duh anga kan taksa peng thenkhat hnathawh dan control na tan leh,  natna enkawl dam nan  science & Technology thiamna  hmangin  mihring taksa peng hrang hrangah  Electronics khawl  rei lo te chhung atan emaw,  damchhung atan  dahluh  thin a ni. Kan hriat theih chinah pawh medical electronics khawl ropui tak tak ni lem lo  pins, rods, screws leh plates te  ruh tliak enkawl dam nan mihring taksa ah dah luh a ni tih kan hre awm e. Hei bakah hian  medical lamah   phei chuan mihring te taksa ah an lo dah lut  teuh mai bawk a,  tlem han tarlang ila a tha awm e.

1.     Electrically-powered implants: Hei hi   lung phu tha enkawl nan hman a ni a ,  heng zingah hian Artificial pacemaker an tih hi a langsar pawl tak a ni. Lung natna nei te an lo damrei zawk nan  hetiang khawl hi taksaah dahluh thin a nia,  lithium-ion batteries emaw betavoltaic  a hmang tlangpui.

2.     Bio-implants: Hei hi  kan taksa timur  chhe lai siam tha tura  biomaterial surgical hmanga  taksa a dahluh a ni. orthopedic ( maxillofacial) re-constructive prosthesis, cardiac prostheses (artificial heart valves e.g Chitra heart valve), vun leh cornea atan  an hmang nasa hle 

3.     Dental implants : Ka chhungah  ha enkawl nan dahluh a ni. Dental doctor hoten  mandible leh  maxilla  an tih mai ah dahluh a ni a, Ha lem  vuahna hmanraw tangkai tak tiin a mawl mang berin a sawi theih awm e. 

4.     Orthopedic Implants : Hei hi  ruh lam thalo enkawlna pawimawh tak mai a ni.  Ruh tliak enkawl damna  atan taksa chhungah screws leh plates te dahluh thin a ni. A langsar zual te chu Interlocking Nail, Nails, Wires & Pins, Cranio Maxillofacial Implants, Mini Fragment Implants, Small Fragment Implants, Large Fragment Implants, annulated Screws, S/DCS & Angled Blade Plates,Prosthesis, L/PCL Reconstruction System, pine Surgery, External Fixators e.t.c te an ni.

Aw le, Medical lamah phei chuan   mithiam te an fimkhur em em a,  nunna leh thihna inkar tak meuh meuh anih avangin  a tul lovah mihring taksa chhungah  engmah an dah ngai lo.  Damlo ten a hlawkpui viau lai  pawhin taksa chhunga   medical  khawl han dahluh hrim hrim hian  panchhia, kang leh   natna tha lo dang a thlen ve mek thei bawk a,  dam lo taksa a lo chauh   viau phei chuan  damna thlentu  a nih rual rualin natna thlentu pawh ani thei bawk .Hlawhtling taka  enkawl dam an awm rualin  hlawhchhamna hrang hrang  a awm ve mek bawk a,  a bikin breast implants, hip replacement joints aleh artificial heart valves an tih mai  Bjork-Shiley valve, ah phei chuan  an hlawhchham fo thin.

Khawvelin hma a rawn sawn chho  zela, Natna enkawl nan ringawt nilo, mihringte  khawsak  inrelbawl awlsam zawk nan scientist te chuan  taksa chhunga dahluh theih  electronics  bungraw te tak te, thil ti thei tak si  an han hmuchhuak ve leh ta zel a,  a maherawh chu  mihringa  dahlut  nghal mai lovin   a enchhin nan ran vulh  bawng, beram , Sakawr e.t.c ah an han dahlut a,  a hlawhtling hle nghe nghe in, vawini thleng hian  ran vulhtu sang tam rual te chuan  an hmang tangkai hle a ni.  Animal Identification Chips (AID) an ti mai a, chhinchhiahna hrang vek nei chips te chu ransa taksa remchanglaiah dahlutin he an chips number milpui theuh hmang hian ransa  identification  te chu Computer ah dahluh vek a ni.

Hetianga hlawhtling taka ransa ah test anih hnuah kum 2006 chho atang khan mihringah pawh hman tumna lian tak a awm chho ve leh a, abik takin sipai tan leh  thlawhna leh lirthei khalhtu te tan a tangkai hle tur a ngaih a ni.  Indo na hmunah emaw, lirthei  accident ah emaw  hmel hriat theih loh khawpa hliam tuarin an lo boral thei. Tu te nge an nih tih zawh buai vak ngai lovin, Personal Identification Chips (PIC)  hmang hian an biodata leh address kimchang tak second reilote chhungin a hriat theih dawn a ni.

Computer khawvelah hma kan sawn chho zela,  Pathianin thiamna leh finna min pek te hi Damlo , Ransa, Sipai e.t.c te mai bakah  tangkai thei ang bera mipui ten kan hman theihna kawng a rawn inhawng chho zela,  tunah phei chuan  mihring bio data, Education qualification, Work experience, Blood group mai bakah  information hrang hrang  neih theih nan  hman theih tura ruahman a ni mek zel a, Electronics hmanga mihring Identification   hmahruaitu atan, ATM, VISA,  Digital finger print e.t.c  tunah hian tangkai takin kan hmang mek  a ni . Hetih lai hian ngai teh, Hlim vang ni lem lo,  hausakna tihlan tum nana ha dar vuah tle sup sup khawpa  ha lang thut a nuih duh vang a tul lem lova Ha siam te,  kohhran hruaitu  nupui za rual meuh pawh naupai indan nan  an pasal te kekawr te ah nilo, an taksa chhunga kahpathir phek  thukpum te,  Thalai  Mawngtama a reh theilova taatoo chhut te leh   pian tihnalh leh in ak sexy  nana hnute leh mawngbawra eng engemaw ni  thun puar chamchi te  han ngaihtuah ngat phei chuan  mihring taksa khawiah pawh  thil tha tihna tur  hmanrua Chips za tel pawh lo dah lut pawh nise,  pawina a awm hauhvin ka ring lo.  

Ti daih ila, Kan Lalpa Isua  nu leh pa Josepha leh Mari te khan Sorkar Chhiarpui an ngaih pawimawh zia te kha aw ,  Sumo  leh MST   a chuang ve miah lovin   an hunlaia Lalber Kaisara chhiarpui kha  rai puar chungin  ke in  an pan hnak hnak zawk anih kha. Keini Isua zuitu inti zofate hian  mahni in lumah  awlsam takin chhiarpui kan nei thei a,  kan vanneih teh  reng nen , hming   pe duh lo te kan la awm  hi chu sorkar tan chuan a thinrim thlak duh ngawt  ang. Mak tak mai chu , Medical leh financial Institution ten  Personal ID chips an  hman hian   sawisel  ni hauh lo  mahse,  dikna hlen chhuah nan  leh   hlemhletna leh pawi khawihna  laka India khua leh tui min venghim tura   Information technology  hmasawnna ataka an hman  dawn  meuh chuan  sawiselna atamin   hemi hlauva  sakawlh  ang mai a sorkar leh kohhran kal pela  buai phili chiam chiam mai  kan awm tlat mai te hi  a Pathian thu lovin a  sakawlh nunphung  riau zawk in lang .  A then  pawh kan hre lo , he luikam atang hian  tih  changchawiin  personal ID Chips  chung chang a kim lovin kan  hria a, mite hnenah a kimlo leh zualin kan hril chhawng leh a,  kan  thai let a, kan virpilh a,  a tawpah phei chuan  kan hmu sakawlh  ta hial  thin zawk a lo ni.  Kan rin angin a kawlh lem lo e.

.