USSD VETHUNG HI

( Mobile  Technology hriatzauna)

-Chhungpuia Renthlei

(Written on dated :23/1/2019)

Mobile  khan *#06# hi han dial teh,  Mobile  IMEI   arawn lang ang.

 *#07#  hi  han dial leh la, Specific Absorption Rate (SAR) values   a rawn lang ang.

Tin, Phone recharge na dawrah  i kal khan, code engemaw hmangin  an dial a,  balance  leh offer  te an hre mai thin. Heng  code mak tak te hi enge ni? Eng dang a ni lo, USSD  Code a ni.

USSD chu Enge ni?

Engtinnge  hetiang code kan dial a kan thil hriat duh a rawn lan theih mai?

WHATSAPP  FINGER PRINT AUTHENTICATION 
(Technology Hriatzauna)

Chhungpuia Renthlei

(Written on dated 11.1.2019)

Highlights:

Fingerprint authentication  hi finger print hmanga Whatsapp security tuna kan neih sa mek  thuam thatna tur, Whatsapp  bik chauh  lock theihna tur a ni. Whatsapp message zawng zawng tan security pawimawh tak a ni ang. Android Version 6.0 (Marshmallow)  chin  chung lam   leh , iOS Mobile atan pawh a hman theih ang.  Tun (January 2019) ah hi chuan siam mek chauh a la ni a,  tunah hian  a enchhin nan WhatsApp beta (for Android 2.19.3)  version tharah ah dah lailawk a ni.  

Fingerprint authentication hi enge ni?

Authentication awmzia chu  Software hmangtu (user) emaw, thil nihna dik leh diklo finfiahna a ni. Fingerprint authentication  chu kutzung zia rang hmanga kan nihna finfiahna  a ni. Kum 1888 daih tawh khan British  mithiam Sir Francis Galton a chuan  fingerprint authentication hi a lo enchhin tawh a. Sir Francis Galton hi  mihring chanchin zirna lama mithiam (anthropologist)  lar tak a nih bakah Scientist ropui  Charles Darwin-a chhung khat hnai vai tak  a ni bawk.

Engatinge WhatsApp ah hman ve kher anih?

Fingerprint  Authentication hian thatna tam tak aneih zinga langsar zua te chu :

Memory  a mamawh tlem em em bakah  maintenance a awlsam hle. Password dang te angin midangin an ru ve thei lo. A hmangtu tan password dang te angin  chhin chhiah angai ve lova, theihnghilh a awm theilo bawk a, hman a awlsam em em a ni. Kutze thuhmun a awm theih loh avangin a him em em. Tin, kan kutzia hi  upat hnu pawhin a danglam ve lo bawk.

Engtinge WhatsApp Fingerprint authentication kan hman ve theih ang?

Kan hman theih hun tur la sawi chiang thei lo mahse,  peih fel thuai anih tur thu an sawi. A kim changa sawi  theih  ni hrih lo mahse, a tih dan tlangpui tur chu :

Settings ah lut la, Account ah lut leh la. Privacy  kha hawng rawh.Screen  kha han scroll la, ahnuai bera Authentication option dah thar ah fingerprint tih kha  enable mai tur a ni. Hemi hnuah hian kut fai taka sil la, i duh ber kutzung zia  kha scan luh tawh mai tur. Hetianga i tih zawh tawh chuan whatsapp message hawn dawn apiangin fingerprint a ngai tawh thung tih erawh hriat a ngai ang.

Conclusion:

Mobile khawvel ah hian Password, Pattern lock leh  Phone  security tam tak awm teuh mahse, Phone theihnghilh leh rukbo atam em em a, security  tihchhiat(Hack) a awm reng bawk si. Hetih lai hian WhatsApp hi  thil pawimawh hrang hrang atana inbiak nan kan hmang nasa telh telh bawk nen, Whatsapp hmangtu te tan  bik liau liau a security siam hi  thil tul tak anih avangin WhatsApp Fingerprint authentication hi dah belh tura  ruahman a ni ber mai. Hetiang a fingerrpint hman anih takah chuan phone Security thenkhat tihchhiat (Hack) ni ta pawh nise, whatsapp erawh chu a him hle dawn tihna a ni.

Hetih lai hian  Whatsapp hman dawn apianga fingerprint a ngaih zel dawn avang erawh chuan  phone hmangtu tan buaithlakna  chin a awm ve leh mai thei bawk.Security tha leh rinawm ber chu nangmah kha i ni tih han hre phawt mai la.Keini phone hmangtu te hian phone tibo lo tur leh midang te khawih theiha  dah mai mai lo tura kan fimkhur phawt chuan hetiang tehchiama security  system hman pawh a tul ber kher lo bawk.

Eng pawh nise,  kan ban phak a  kan tana tha tur  Technology  thil thar  awm te hi  chu  han hmang ve chhin zel phawt ila, kan mamawh lem lova kan hriat tak leh hmang chhun zawm lo mai ila a fuh ber mai.

KILOGRAM TEHNA THAR  : Planck’s constant

(Science &Technology thlirzauna)

Er. Chhungpuia Renthlei

(Written on 10.1.2019)

Science & Technology hmalakna in Kum  130 lai mai  kilogram tehfung  atana  kan hman mek "Le Grand K" chu   kumin 2019  may 20 hian  "Planck’s constant"  hmanga thlak a ni dawn ta. 

Kilogram  han tih hrim hrim hi chu kan hre fur awm e. Mahse, enge anih chiah tih leh eng hmanga an chhut chhuah nge tih erawh kan hre thuk viau lo maithei.A hmasain Gram leh Kilogram an teh dan han sawi phawt ila a tha awm e.

Gram leh Kilogram

Bawm kil li nei, a chhunglam  sanzawng, hlai zawng leh chhah zawng centimetre 1  vek (cubic Centimetre) chhungah tui(water) thun ta ila, atmospheric pressure pangngaiah  tuiril anga a awm that theihna  ber melting point of ice (4 Celcius)ah dah ta bawk ila.Heta tui(water) inhlawmkhawm tam lam (mass) hi 1 gram tiin an vuah. Hei hi Kum 1795 kuma scientist  te ruahman ang a ni.Tichuan, 1 kilogram chuan  tui (water)  1,000 cubic cm inhlawmkhawm tam lam (mass) sawina atana hman a ni ta a ni.

1 kilogram tlukpui tehna: Le Grand K

Amaherawh chu hetianga tui(water) hmanga  standard measurement siam hi a buaithlak em avangin Kum zabi 18 na atang khan 1 kilogram tlukpui tehna atan Platinum  thir tlawm mum an hmang leh ta a. Hei hi Le Grand K  tiin an sawi bawk.Tichuan, kum 1889 atangin standard kilogram  atan International System of Measurement (SI) units ah an hmang ta a ni.He standard kilogram  tlukpui tehna  hi  International Bureau of Weights and Measures laboratory, Sèvres, France khawpuiah uluk taka vawn that a ni  bawk. Tichuan, vawiin thlenga  khawvel hmun hrang hranga buk lung te hi hemi mil tura siam vek an ni.Le Grand K leh tui(water)hmanga  standard measurement  siam hi a inmil leh mil loh kum 40 dan zelah an en that zel a ni thin.

Engvangin nge  tehfung thlak a ngaih tak?

Kum 1989 khan 1kg  tehna hmun hrang hrang a mite aiin 50 micrograms laiin he Platinum  thir tlawm mum hi a zang zawk tih hmuhchhuah a ni. chhan ni ber a an sawi chu he Le Grand K  hi an environmental factors hrang hrang ( sik leh sa) avangin atoms a hlauh then theih vang niin National Physical Laboratory (NPL)chuan an sawi. Kan innghahna ber a dik loh takah chuan khawvel ram tina  kan buk lung hman te hi a dik lo tihna a ni ber mai. Nitina kan hmanna naran angah chuan eng tham nilo mahse, thil rit tak tak ah Ton za telah phei chuan a diklohna hi a tam tham khawp ang. Tin, Thil  zang lutuk tak angah leh scientific & medical research angah  erawh chuan thil pawi tak a ni thei  . 

Tehfung thar tur Planck’s constant  chu engni ?

Tichuan, He harsatna sukiang tur hian Kum 2011 a  General Conference on Weights and  Measures (CGPM) chuan fundamental physical constant pawimawh tak, Planck’s constant hmanga  tehna standard siam an rawt chhuak a.Planck constant hi kan hriat theih dan awlsam ber chuan, tehna pathum, meter, kilogram leh second   hmanga thil sakhat thil mur te thei ber atom chetvel dan leh khawsazia sawina a ni. Hemi hmang hian Speed of light tluk zet a chaka meter leh  second  teh theih anih avangin  kilogram nih phung pawh  a rintlak zawkin a dik zawk em em tura ngaih a ni.Planck's constant  hi physics mithiam, Bryan Kibble a siam chhuah Kibble balance instrument  hmanga teh a ni.

Engtikah nge  tehfung thar hman anih dawn?

Nikum 2018  khan International Bureau of Weights and Measures  ten an buatsaih,  ram hrang hrang 60  palai kal khawmna  CGPM 2018  chuan  lungrual takin an  pawm  ta.Tichuan, kumin World Metrology Day  May 20, 2019 atang hian Kilogram  tehna atan khawvel pumpuiah  International System of Measurement (SI) units thar, Planck’s constant  hi kan hmang  dawn ta a ni. Keini mizoram a kan hman ang chi buk lung te hi chu a ngaiin kan la hmang tho anga, Rihzawng uluk leh dik taka teh ngaihna Measurement khawl leh buklung hrang hrang te erawh  siam rem a ni ang.

Tehfung leh mizo te

Tehna han sawi takah chuan ka han belh hram duh chu Kan rinawm loh vang leh  rilru that loh vang a Kan nitin sumdawnna leh bazara thil hralh leh leina ah ringawt pawh  bukna dik loh vang nilova, hrereng chunga kan  buk dik loh luih te  han ngaihtuah chuan Scientist ten tehfung dik leh hman tlak ber duhin hetiang hian nasa takin hma la mahse keini kristian rama cheng Pathian nung ringtu inti te ah chuan bukna dik neih chu ala harsa dawn hle mai.

Bukna dik lo hi Lalpa mit hmuha thil tenawm tak anih avangin Planck’s constant hmanga  Le Grand K tehfung  thlak ai mah hian Pathian rinna thinlung dik tak nena kan rilru dik lo leh pamham kan thlak a, moral reformation kan neih hi a tun dinhmunah chuan a pawimawh hle zawk  mai.

CITIZENSHIP (AMENDMENT) BILL, 2016  THLIRZAUNA 
  -Chhungpuia Renthlei

( Written on 7.2019) 

Citizenship (Amendment) Bill, 2016  chu dan lova rawn pem lut( illegal migrants)  Citizenship Act,1955 in a sawifiahna thlak danglama Citizenship Act, 1955 in a phal loh Afghanistan, Bangladesh leh Pakistan atanga Buddhist, Hindu, Jain, Sikh, Parsi or Christian  sakhaw vuantu engemaw zat  dan lo a India rama rawn pem/ lutru ( Illegal migrants)  te  India khua leh tui an nih theihna tura  Definition of illegal migrants hrilhfiahna  her danglam te,  1955 Citizenship by naturalisation tihdanglam leh Cancellation of registration of Overseas Citizen of India cardholder tihdanglamna a ni ber mai.   

Citizenship Act, 1955   leh Citizenship (Amendment) Bill, 2016  danglamna tur  langsar zual te

1. Definition of illegal migrants

Tuna kan dan dinglai Citizenship Act, 1955  ah chuan Illegal migrants  te hi India rama luh phalna documents (passport &visa ) tellova rawn lut ru te leh  passport &visa  dik thlapa rawn lut, hun bitiam chhunga haw leh silova India rama awm hlen tum te tiin a sawi a.Tin, heng mite hi dan bawhchhia an nih avangin Foreigners Act,1946 leh Passport (Entry into India) Act, 1920 hmanga  lungin a khung emaw, an rama thawn haw nghal tur a ni nghe nghe.Engti kawng pawhin heng illegal migrants  te reng reng hian India khua leh tui nihna  an nei thianglo hulhual.

Citizenship (Amendment) Bill, 2016 ah chuan  heng ho  hi  Kum 6 an awm tawh  chuan India khua leh tui nihna an nei thei ang a, Citizenship an neih theihna dal thei tu  Foreigners Act, 1946  leh  Passport (Entry into India) Act, 1920 te hi an chungah hman ve loh tur a ni.Hetiang anih chuan, Citizenship Act,1955 in a phal loh Afghanistan,Bangladesh leh Pakistan atanga Buddhist, Hindu, Jain, Sikh, Parsi or Christian  sakhaw vuantu engemaw zat dan lo a India rama rawn pem/ lutru ( Illegal migrants)  te India khua leh tui nihna pek an ni ang.  Khua leh tui ten ham thatna hrang hrang kan neih ang hi an rawn nei ve bawk ang. Tin, Keini  hmarchhakah pawh Chakma, Tuikuk leh  Foreigner kan ngaimawh em em te hian hamthatna an rawn nei anga, Kawng hrang hrangah Minorities ten harsatna kan nei thei bawk. Hei hi keini North East mipui pawhin kan duh lohna ber pakhat a ni.

2. Citizenship by naturalization

1955 Act  in  India  Naturalisation hmanga India khua leh tui nih theihna dan a sawi India rama rei tak cheng tawh emaw, India / India  sorkar hnuaia  kum 12  lo awm tawh  ten India khua leh tui nihna an dil thei ang  tih a ni .Citizenship (Amendment) Bill, 2016  chuan  kum 12 hi kum 6 ah a ti hniam.

3. Cancellation of registration of Overseas Citizen of India cardholder

1955 Act in a dan bawh chhiatna avanga  India khua leh tui nihna cancel sak theihna dan a sawi,  India citizenship register a a in register atanga kum 5 chhunga  OCI cardholder in  Kum 2 chhung lai lungin tan theihna khawp  a awmna rama dan a bawhchhiat chuan India khua leh tui anihna hlihsak theih a ni ang  tih a ni.Citizenship (Amendment) Bill, 2016 ah chuan  Eng dan pawh a bawhchhiat chuan  tiin a thlak bawk. Dan bawhchhiatna hrim hrim  hi a te emaw, a lian emaw  atam si a,  khua leh tui nihna cancel theihna  vek anih chuan a buaithlak khawp ang.

Citizenship (Amendment) Bill, 2016 hi BJP sorkar hian  eng vanga  siam nge a nih ?

2014 Lok Sabha election campaign lai khan BJP chuan India thenawm ram Afghanistan, Bangladesh leh Pakistan a Hindu sakhaw zuitu tihduhdah leh hnehchhiaha awm  mi tam tak an sa him nan India a an  rawn pem lut te chu  tha taka lo welcome  a India Khua leh tui nihna  pek    bakah humhimna tha tak pek  alo tiam  a.Tichuan, BJP sorkar chuan a intiamna tihpuitlin tumin  theih tawp a chhuah  ta a ni ber mai.

Citizenship (Amendment) Bill, 2016 hian sakhuana hmanga Buddhist, Hindu, Jain, Sikh, Parsi or Christian  sakhaw vuantute India khua leh tui nih theihna kawng  a hawn  laia chhan mumal taka sawina awm lova sakhaw thenkhat Muslim, Jews leh Atheists an tel ve si lo te hi  India danpui (Consititution)  Artile 14 na (right to equality) kalh tlat a ni si.

Bill hi pass a ni dawn nge dawn lo ? Pass ni ta se engtinge ni zel dawn le ?  Thlir zel phawt teh ang u

BEISEINA THAR NEN KUMTHAR
-Er.Chhungpuia Renthlei
Written on 3.1.2019 Published by MARYMA (Ramhlun North YMA weekly News)


Kum 2018 kumhlui chuan koh kir rual lohvin kan thil tih that, tih dik loh, hlim ni, lungngaih ni leh bawrhsawm ni zawng zawng te nen mual zapui min herliam san meuh chuan Lei mite hun chhiara hun thar, kum 2019 kan lo chuang kai leh ta reng mai! Krismas leh kumhlui te khan kan hlimni te ngaihawm takin a her liam pui satliah mai nge? Nak tip nak thaiah lungngaia min siamtu a rawn herchhuah pui zawk dawn le? 

Ni e, Khuanu zara famlo na na na chu, kum 2019 kumthar chuan kan la zawh ngai loh leh tawn ngai reng reng loh hun thar leh thil thar kan paltlang tur kan hmaah a rawn pharh leh ta duai mai le.Khawvel mihring leh thil siam tumahin an la rah lawk bik loh, khawvel miten a ruala kan rah tur a ni. Kum bul atang hian taksa, rilru leh thlarau inbuatsaih ila, ruahmanna duhawm leh beiseina thar nei theuh ila, kan inbuatsaihna, ruahmanna leh beiseina nung te hi kum bul atanga kum tawp thlenga chakna leh hlawhtlinna pe theitu tur an ni ngei ang le. 

Beiseina hi mihringte min ti mihringtu a nih miu avangin tu te pawh hian kumthar emaw, sorkar tharah beiseina thar engemaw tak kan nei thin. Chuvangin, rilru thar pu-in beiseina thar nen hmasawn zel tuma inbuatsaih chungin, he kumthar 2019 zin kawng hi zawh theuh ang u. Kan zavai atana kum duhawm anih theih nan mipui, zirlai, sumdawng, kut hnathawktu, contractor, office kal mi, ram hruaitu leh kohhrana rawngbawl hna vuantu zawng zawngten kan hna leh tih tur theuhte rinawm tak leh thahnemngai taka hmachhawn theuh thei turin Pathian nen bul tan hi a pawimawh hle mai. 

He kum tharah hian kan ram roreltu te Pathian malsawm se,chu malsawmna chu mipui te hmasawnna thlentu ni ngei bawk se a duhawm hle mai.Kan ramah sorkar inthlak apiang hian eng party pawh nise roreltu atana mipuiten kan thlan te hian atirah chuan theih tawp an chhuah a, rinawm pawh an tum fo thin. Israel fate ten tuipui sen an kan hlim ang maiin mipui te pawhin beiseina thar nen hlim takin sorkar fakna hla kan sa ring hle thin.

Hun a liam zel a, ruling party zingah mi duham leh pamham te , engemaw hleka Minister lehkha, party worker insawipui tir ching mi te leh thil tul hauh lova kan politician te life culture virpilh a social media hmanga thehdarh chiam thin mite an rawn inlar meuh hi chuan sorkara beiseina nei reng reng lo te pawh kan beidawng a, Israel mipui ten thlaler kawng an zawh hunlai ang maiin kan ram hruaitu te lakah vui vaina kan ngah hle thin anih hi.

Mipui moral dik hi ram hmasawnna hnuk pawimawh tak anih avangin kan aiawha rorel tura kan thlante hma lak dan um zui leh an tha tichak tura theih tawp chhuah leh sorkar dik lohna awm pawh a khalh ngil tura huai taka hmalak hi ram hmasawnna tura mipuite mawhphurhna kan kova Lalpan a nghah tlat a ni. 

Hun kal tawha kan tihsual leh fel lohna te atanga tihdan tha zawk zir zel ila. Hawh u, Kan rilru put hmang (mindset) diklo leh party ram awmpawng kan zakzeh tlat zel hi paih ila, kumthar atang hian Pathian, Ramhruaitu leh mipui te lakah rinawmna nen tangkai leh tha zawka awm turin moral development nen kumthar bul tan ang u. 

Hetianga kum bul kan tan phawt chuan Pathian tihna thinlung tak nen rinawmna leh thahnemngaihna chuan mimal nunah hlawhtlinna ropui tak min thlen ang a; chhungkaw khawsaknaah intodelh leh ram hmasawnna min thlen ngei ang. 

Kumthar 2019 hi kan tan kum tha leh duhawm, hlawhtlinna leh malsawmna dawng theuh turin, Pathian hnena inhlan chungin kum bul tan ila, kum liam ta a kan thil chin tha lo tak tak te bansanin ila, BEISEINA THAR NEN KUMTHAR kan hringnun zin kawng zawh theuh ang u.

KUM THAR  LEH SORKAR THAR 

-Er. Chhungpuia Renthlei

(Written on Dated 4.1.2019 Published at Vanglaini  Daily News on 5.1.2019)

Pathian hruainain kum 2019 kan lo chuangkai leh ta. Zoram mipui, Zirlai, sumdawng, kut hnathawktu, contractor, office kal mi, ram hruaitu leh kohhrana rawngbawl hna vuantu zawng zawngten he kum thar 2019-ah hian kan hna leh tih tur theuhte rinawm tak leh thahnemngai taka hmachhawn theuh thei turin Pathian nen bul tan vek ila a duhawm hle mai. Tin, he kum thar hian Pathian malsawmna  kan sorkarah  thlen  sela, chu malsawmna chuan kawng tin renga zoram mipui te hmasawnna thlentu  ni ngei bawk se a va duhawm  em!

Sorkar inthlak apiang hian ruling party te hian an sorkar tirh chuan theih tawp an chhuah a, mipui te pawhin kan fak thin hle. Eng party pawh nise roreltu atana mipuiten  kan thlan tlin MLA te hi an mahni tawkah an tha a, rinawm pawh an tum fo thin a, theih tawp pawh an chhuah thin. Thla aliam zela, kumpui meuh a han liam hi chuan fakna thawm aiin sawiselna thawm a ring leh thin. Mipui moral hi dik se  ram hmasawnna hnuk pawimawh tak a ni ngei ang.

Hetih lai hian ruling party  campaigner te, sum lama sponsor tu te leh party worker te zingah mi duhawm leh pamham engemaw zat an awm thin si a. Kan sorkar lai alawm ti a over taka  chet hi sorkar  mualphona  a ni fo thin. Heng mite hi  sorkarna chelhtu party hruaitu ten  an ngam meuh thin silo hi a buaithlak  viau. Tin, mipui te pawh hian engemaw hleka, Minister lehkha, party worker  insawipui tir, Block hruaitu inti thu lutuk e.t.c tih velah kan la buai chhung hi chuan  hmasawn hi a harsa ngawtin ka ring thin. Tin, thil tul hauh lova kan politician te  life culture  kan  virpilh a social media  hmanga  kan thehdarh chiam thin te hian thil tha aiin thil tha lo a thlen thin fo.

Hetiang chin dan thalo hi bansan a, mipui ten  moral development kan neih that phawt chuan kan hruaitute hian tan an lak thar sauh sauh beisei ila, eng party pawh sorkar se an tum tak tak chuan mitthlaa kan hmuh thin raltiang ramah hian engtik ni ah emaw chuan mipuite hi min hruai thleng ngei ang.Hetianga kum bul kan tan phawt  chuan  Pathian tihna thinlung tak nen rinawmna leh thahnemngaihna chuan mimal nunah hlawhtlinna ropui tak min thlen ang a;  chhungkaw khawsaknaah intodelh leh hmasawnna min thlen bawk ang a; Kan sorkar tharah nasa takin hlawhtlinna hmel kan hmuh bakah  kan ram leh kan khawtlang nun pawh a lo mawi zual zel ngei ang le.

Rorelna tha ( Good Governance) neih kan duh tak zet chuan vote thlak chauh hi kan mawhphurhna a nilo tih hi mupui ten hria ila, kan aiawha rorel tura kan thlante hma lak dan um zui leh an tha tichak tura theih tawp chhuah hi mipuite mawhphurhna pawimawh tak a ni tih hre nawn fo ang u. Chuvangin, inthlan hnu lamah hian sawisel tawk leka uipui tuilian thlir ngawt lovin, a lum tawka hnaiah sorkar meilum hi ai ila, mipuite hian kan mawhphurhna theuh hi hlen ila a duhawm hle in ka hria.

Winston Churchill-a chuan, “Khua leh tuidik leh rinawmte hi ramin a neih theih ro hlu berte an ni” a  ti a. Mi dik lo leh rinawm lo zingah sorkar tha a awm ngawt thei lo  tih hi a chiang viau mai. Ram hmasawnna kan duh tak zeta Pathian kan tih tak zet anih chuan Zoram Mipuite hian kan rilru put hmang (mindset) kan thlak danglam a hun khawp maiHlawhtlinna nasa zawk leh hmasawnna lian tham zawk thawkchhuak ngei  turin keini khua leh tui zawng zawng ten sawrkar hmalakna  tha kan thlawp tlat a, dik lo lai a awm pawh a sorkar khalh ngil tura  huai taka  hmalak hi a pawimawh ber tih hi hrethar leh ang u.