MIZORAM HMASAWN NAN

MIZORAM HMASAWN NAN     Chhungpuia Renthlei

Census 2011 a alan danin mizoram mi cheng  te hi 10,97,206  kan ni.  Kum 2016 kan han chuankai takah chuan

hei aia  mipui  kan thahnem tura ngaih a ni.kristian :9,56,331 kristian ni lo 140875 vel zet an awm bawk. Mizoram  Decaded Growth rate  in atarlan dan chuan  mizoram chhung mipui 75 % lai  hi khawpui ( town) ah kan awm a, lo nei mi tak tak chu 25 % vel chiah kan ni.  Tin,  Cencus report 2011 in a tarlan danin mizormah Sheduled

Tribe  1036115  kan awm a, heng zingah hian 96972 chu chakma an ni.  Aizawl khawpui bikah  Christian kan tam ber a 379134 kan ni a, Hindu  13249 an ni. Muslim 5264 an ni a Budhist 1570 niin sixh 105 leh Jain 76 an ni.

Kan ram zimte ah  kohhran leh pawl  commitee te hi kan ngah em em a.Veng khata mi pangngai chin chu committee member engemaw berah kan tel zel. Kan ram hi committee  ramah chantir  a ni ber mai. A landan atang ringawt hi chuan mizoram chu kristian ram,  eiruk tlemna, rualkhai taka hmasawnna awmna leh  thil man pawh  tlawmna ram anih hmel viau mai. Tin,  Kristian dik tak chuan midangte tana thatna a duh tlat avangin vai company tan pawh  Railways te, lamlian leh eng (electricity)  Infrastructure  din pawh ramdang te aia senso tlem zawk a tih theih leh state inphal tak kan nih pawh a rinawm hle.

Hetihlai hian  tuna kan kristianna kan kalpui dan erawh hi chu  ngaihtuah uluk angai ta khawp mai. Pawn lam lan danah chuan sual haw em em, mi  hawihhâwm tak hmelpu si  hian chhungril nuna  kan hlawkna tur anih phawt chuan sual huat chu sawi loh, mi rinawm leh thil dik ti duh tu haw tlat mai te pawh kan  va tam tak em!.

Kan politician, dan hre mi leh mipui thenkhat ten  heng infrastructure  hlawhtlinna  tithuanawp zawngin  hma an la mek a, compensation lak theihna zawngin rail kawngin a sut tlang ngei na hmun turah  ram an lei lawk chiam chiam a. MLA term khat chhung a rei an tlawh peih loh a hminga ram an neih te pawh Electricity  siamna tur tuikhuah in a chim dawn meuh chuan an  eizawnna hnar ber  tichhia a puhin dan hre mi te nen inremsiamin compensation an dil chamchi bawk a. Kawngpui chungchangah ni se chuti bawk. Kristian kan nihna kan lantir dan hi  vai company ho hian  an hrechiang teh a sin!

Kan chief minister zahawm takin NLUP thatzia a sawi kha kan la hre theuh awm e. Chief Minister  leh NLUP plocy hlawhtlin nana rim taka hnathawktu hi  mizo mipui te hian kan  thlawp tha tak zet em tih hi ngaihtuah tham tak a ni. Vawiin thlenga BPL family  kan la pun zel danah hian NLUP dawngtu tam zawk hian  NLUP policy hi an kalpui lemlo tih erawh a chiang.NLUP policy hi  Ruling party worker thenkhat te chuan  congress a inthlemluhna hmanraw thiltithei berah an hmang mek a. Tin, NLUP hi  In khatah pakhat chauh sem anih avangin  mizoram hmun thenkhat ah chuan an fa te an indan tir nasa mai bawk.

Cencus  lama tarlan anih dan chuan  Household hi Cencus chhunga a ruala inkhata khawsa ho leh chaw ei ho hi an ni. Primary Census Abstract (2001 -2011 ) a alandan chuan  lawngtlai ah household punna hi a sang ber a, 39.51 a ni.  Khawthlangh leh chhim thlang lamah hriat lohva  mihring punna a nasata viau laiin khawchhak lamah erawh

punna a awm lo thung. Mizorama chenna in (Household) punna pakhat chu tuna kan sorkar buaipui mek NLUP vang ani tih a chiang hle.

Aw le, Tual thah,  ruk ruk, eiruk  leh kut tling lova sum lakluh tam ta lutuk te hi  kristianna nen a inmil em ? Mipui te hi   sum hmanga hnuhkual mai mai theih kan ni zel dawn em?  India rama  bus fair, taxi, parking fee  leh thlai thar man to lawr lak  state kan ni te hi engtin nge kan ngaih le? Kan ram hi committee hmanga rel fel chi ni lovin, Kristianna hi kan nunpui a hun tih a chiang hle mai.  NLUP  sawiseltu te sawiselna hi party chirthehnaah emaw ngai lovin, a dawngtu mipui lam te pawh hian NLUP policy ang ngei a  kan hman phawt chuan kan ram hian a thatpui ngei a rinawm. Tin, Economy lama mizoram kan than a thut loh nan  Railways te, lamlian leh eng (electricity) te hi infrastructure peng pawimawh tak takte  hi mizoram economy thanlenna ban pawimawh tak mai a nih avangin sum hmuh nana  hmanphet tum lo ila kan ram hian  hma a sawn em em bawk ang.

e-Readiness leh Mizoram

e-Readiness leh Mizoram 

Er.Chhungpuia Renthlei

e- Readiness hi  sorkar  sum leh pai dinhmun chawikang tur leh mimal tinte tihmasawn tura information and communication technologies (ICT)  hmang thei tura kan dinhmun kawng hrang hrang a tehna pawimawh tak a ni. Kei ni ang ram hnufual, Mizoram  tan a e- readiness tehna pawimawh langsar deuh deuh te chu heng te hi a ni.

1.      Digital media lamah ram mipui te hma kan sawn em?
Kan nitin hnathawhna hrang hrangah InformationTechnology tangkai taka hmang thei turin Digital  program leh E- governance lamah inhrilhhriatna ram pum huapah neih a ni tawh em?

2.      Ram mipui ten a tak taka hnathawh nan kan ring zo chiah em? ICT hian min influence tha em?

3.      Mizo Society leh culture ah ICT  lam hawia inherremtumna a awm em?

4.      Political party, NGO, Zirlai pawl leh pawl hrang hrang te hian e- governance hi kan ram tan kan duh tak tak em? Sorkar hmalakna kan thlawp nge kan do zawk?

5.      Ramhruaitu te hian engtiang takin nge e-governance lamah kan rilru kan pek? 

6.      Network connectivity ( mobile leh internet ) hman tlak kan nei em ? hmasawnna lam hawi zawngin kan hmang em ? 

7.      ICT hian economics lamah kan ram min pui tak zet em ?

8.      Sorkar leh Office inrelbawlna leh nitin hnathawhna kawngah ICT hi a hman tlak tak zet em? A nihna tur ang takin hman a ni em ?

9.      Sorkar leh sorkar (G2G), Sorkar leh business (G2B), Sorkar leh mipui (G2C) indawrtawn na atan atak takin ICT hi kan hmang em ? hlawhtlinna sawi tlak kan nei em?

Heng te hi han ngaihtuah chuan e-readiness lamah Mizoram hi kan la hnufual hle tih kan hai awm lo e.

Awle, Sorkar  inrelbawlna ah te, mipui te hnena informationtangkai tak tak pekchhuahna kawngah te, khawtlang inrelbawlna ah te leh Pathian rawngbawlna hrang hrangah te thlengin Information technology thangduang tak chuan nghawng lian tak a rawn nei chho mek a. Abik takin sorkar inrelbawlna ah phei chuan India sorkar laipui chuan  state  hrang hrang Sorkar kalphung leh hnathawh dan hrang hrang  a siamremzel a. Heng kan tarlan tak e-readiness  hrang hrangah te hian  state dang kan phak loh lutuk  chuan harsatna namen lo min siam sak thei a ni.

Digital Cable  Television Connection pek chungchangah te, Ration Card Digitalisation ah te, National Scholarship Portal hmanga online-a scholarship dilna ah te, Online a electric leh tui billpek chuangchangah te leh kawng hrang hrangah state dang te aiin harsatna kan tawk nasa hle .

National Scholarship Portal hmanga online-a scholarship dilna ah  ngat phei chuan internet speed sang tak a ngaih avangin kan hriat theuh angin, keini mizoram, internet speed muanna zirlai scholarship dilturten harsatna an tawk nghala. Aizawl khawpui chu sawi loh, district khawpui dang leh thingtlanga zirlai, internet hman ve theih lohna hmunah ngat phei chuan an buaina hi a nasazual hlea nih hi.

Tin,  Digital Cable Television Connection pek chungchangah leh Ration Card Digitalisation ah  hlei hlei hian zoram pumin buaina namen lo tak kan hmachhawn anih kha.Awle, sawi tur dang tam tak pawh a awm, kan sawi vek seng lo.

Heng harsatna te  a hmahruai mai chauh an la ni a,  kan hma hun local turah  thil tam tak thlakthleng tur a la awm zel dawn.  Digitalisation avanga kan harsatna te hi Aizawl traffic zam ang mai hian vawikhata tihreh mai theih a ni  dawn lo. Chuvangin  e-readiness tehfung hrang hrang te hi zir chian hmasak zel a pawimawh khawp mai.

 Kan hriat theuh tur chu eng thilah pawh kalphung thlak danglamnaa awm reng reng hian atirah chuan harsatna ten au kan hmachhawn hi a tul thin. Tunlaia  digital program chungchanga harsatna kan tawh hmasak ber chu internet connection    hi a ni. India sorkarin chak takin digital India program leh e-governance  lamah hma a la a.  Keini Mizoramah pawh a that zia leh kan hlawkpui theih dan tur te han tlangau pui chiam thin mahila, Network connection lamah harsatna kan neih fo reng mai chuan awmzia a nei chuang lo ang. Kan innghahna bulpui ber hi Network connection   anih miau avang hian Mizoram sorkar pawh hian helamah hian tun aia chak zawkin hma la  thuai se a duhawm hle.   

CASHLESS TRANSACTION ( Digital Financial Services)

CASHLESS TRANSACTION  ( Digital Financial Services) Er. Chhungpuia Renthlei

Digital Financial Services, E- payment an tih hi India ram hmasawnna tura hmalakna pawimawh ber pakhat, pawisa Note tellova tunlai thiamna hmanga thil lei leh hralh “cashless economy” hi a ni.

Digital Financial Services langsar zual deuh deuh te chu : Cards, USSD (Unstructured Supplementary Service Data), AEPS (Aadhaar Enable Payment System), UPI  (Unified Payments Interface) leh E-Wallet te a ni.  

1.CARD  : Chi thum a awm a, chungte chu- Prepaid card, Debit card te leh Credit card te a ni. Card   hi bank pek chhuah a ni a, card neitu hnena pek chhuah dan a zirin a hman dan hi thliar hran a ni. 

ATM atanga pawisa lakchhuah mai bakah Petrol pump ah leh dawr thenkhatah Bank PoS (Point of Sales) khawl an neih tawh avangin mipui ten awlsam takin card kan hmang  thei tawh bawk. Card hmanga dawra thil lei dan han sawi lawk ila. 

A hmasa berin Cashier hnenah card pek la,POS khawl ah card kha an lo swipe anga, i thil leina man an lo chhut luh sak ang che. Hemi hnuah   Card PIN  nangman i type lut  ve thung ang.  Tichuan, i thil lei tur man zat kha I account a tangin an lo paih anga, dawr neitu te account ah a lut ang. 

Dawr nghaktu in receipt sign sa a pe chhuak ang che.In indawr na a zo fel tih hriat theih na turin  mobile ah SMS i hmu ang. Hetiang hian pawisa  pe lovin awlsam takin thil kan lei thei a ni.

2.USSD: Ram chhunga mi tu pawhin banking service kan hman theihna  “Unstructured Supplementary Service Data” a ni. 

National Unified USSD platform (NUUP) kaltlang in code *99# hmangin Telecom service engpawh hmang ila number pakhat hmangin Customer tu pawhin banking service i.e.  Bank account-a Pawisa la neih zat hriatna (Balance Enquiry),  Pawisa che vel report (Mini statement) leh  pawisa  inthawnna (Fund Transfer).   

3.AEPS: Aadhaar Number nena Bank account  hawng ten awlsam zawka an Aadhaar hmanga bank an dawr theihna  “Aadhaar Enable Payment System “  a ni.

 AEPS hmang hian Sawrkar laipui leh State sawrkar atanga tanpuina hrang hrang leh NREGA, Social Security pension, Handicapped Old Age Pension etc. a hmu tur dik tak ten an hmuh theih phah a ni. 

AEPS hmanna langsar zual te : Balance Enquiry, Cash Withdrawal, Cash Deposit, Aadhaar  pakhat atanga  Aadhaar danga Funds Transfer) leh Fair Price Shops a thil leina. 

4.UPI : Unified Payments Interface tihna a ni a, UPI application awmna smart phone leh Bank account nei te tana smart phone hmanga rang taka bank account pakhat atanga account danga pawisa in pek chhawnna “Unified Payments Interface “ a ni. 

UPI  application hi a mawlmang a mi zawng zawng tan hman a awlsam a ni. Khawi hmunah pawh rang tak leh him takin a hman theih a ni. Electric, tui, phone bill  leh school fee pekna atan a hman theih bawk.

5.E-Wallet :  Online a computer emaw smart phone hmanga pawisa inthawnna “Electronic Wallet”  a ni. 

A tum ber chu pawisa ken kher ngailova awlsam zawka thil lei tir a ni.  Pre-paid account ang a ni a, a neituin a mamawh huna hman atan e walletah pawisa a dah lawk thei. E-Walet ah hian  a hmangtu  hming, an thil thawnna address, an thil lei man an pek  tur zat leh debit & credit card chungchang   information chiang takin a awm vek a ni. 

E-Wallet  hmang turin  SBI Buddy download la, phone number register la, I credit/debit card / net-banking nen thlunzawm ang che.Tichuan, i phone chu i wallet a ni tawh ang. E-Wallet hman hi thil awlai tak a ni a,  phone hmanga awlsam te a thlalak i thawn ang maiin   phone/computer atangin i mamawh i lei thei a ni.

November 2016 a India Sawrkar in Pawisa Note Rs.1000/500 te a tih thih kha kan la hre theuh awm e. Hei hi sum chheprel leh hlemhletna tih bo tumna anih mai bakah digital financial services atana hmalakna chi khat a ni bawk.Tunah hian central sorkar chuan  thingtlang leh khawpui Sumdawng, Mimal, NGO leh Office hnathawk te hnenah Digital Financial Services a kalpui mup mup mai. 

Ministry of Electronics and Information Technology, Government of India (MeitY) chuan “Digital Financial Literacy” lam zirtirna chak takin hma ala meka. Keini mizoramah pawh  Central Sawrkar ruahmanna in National Institute of Electronics and information Technology (NIELIT) Aizawl chuan tunah hian Aizawlah   mipuite ziritirna a kalpui mek a.

Aw le, IT lamah hma kan sawn zela,  kum 2017 hnu lamah chuan zirna in fee, bazar nan te, petrol, gas leh bill hrang hrang pek nan digital service hi kan hmang deuh fur tawh dawn a ni.